1 Corinthians 11
11
1အကျွန်ုပ်သည်ယေရှုခရစ်တော်ကိုအတုယူသကဲ့သို့ သင်တို့လည်းငါ့အားအတုယူကြလော့။ 2သင်တို့သည် အကျွန်ုပ်အားအစဉ်သတိရသကဲ့သို့ ငါပေးအပ်ခဲ့သောသွန်သင်ချက်များကိုထိန်းသိမ်းကြသော ကြောင့် သင်တို့ကိုအကျွန်ုပ်ချီးမွမ်းပါသည်။ 3ယခုသင်တို့အားအကျွန်ုပ်သိစေလိုသည်ကားယောက်ျားတိုင်း၏ဦးခေါင်းသည်ကား ယေရှုခရစ်တော်ပင်ဖြစ် သည်ကိုလည်းကောင်း၊ မိန်းမတိုင်း၏ဦးခေါင်းသည်ကား ယောက်ျားပင်ဖြစ်သည်ကိုလည်းကောင်း၊ ယေရှုခရစ်တော်၏ဦးခေါင်းသည် ဘုရားရှင်ပင်ဖြစ်သည်ကိုလည်းကောင်း သင်တို့သိမှတ်ကြရန်ဖြစ်သည်။ 4ယောက်ျားသည် မိမိ၏ဦးခေါင်းကို ဖုံးလျက်ဆုတောင်းလျှင်သော်လည်းကောင်း၊ ရှေ့ဖြစ်ဟောလျှင်သော်လည်းကောင်း၊ မိမိဦးခေါင်း၏ကျက်သရေကိုရှုတ်ချရာရောက်သည်။ 5မိန်းမသည် မိမိ၏ဦခေါင်းကို မဖုံးဘဲဆုတောင်းလျှင်သော်လည်းကောင်း၊ ရှေ့ဖြစ်ဟောလျှင်သော် လည်းကောင်း၊ မိမိဦးခေါင်း၏ကျက်သရေကိုရှုတ်ချရာရောက်သည်။ 6မိန်းမသည် သူမ၏ဦးခေါင်းကိုမဖုံးလျှင် သူမသည်ဆံပင်ကိုရိတ်သင့်ပေသည်။ ဆံပင်ကိုဖြတ်ခြင်း သို့မဟုတ် ရိတ်ခြင်းသည် မိန်းမအဖို့အရှက်ရစရာဖြစ်လျှင် သူမသည် သူမ၏ဦးခေါင်းကိုဖုံးထားသင့်ပေသည်။ 7ယောက်ျားသည် ဘုရားရှင်၏ ပုံသဏ္ဌာန်၊ ဘုန်းအသရေတော်ဖြစ်သောကြောင့် မိမိ၏ဦးခေါင်းကိုမဖုံးရ။ မိန်းမမူကား ယောက်ျား၏ဘုန်းအသရေဖြစ်သည်။ 8ယောက်ျားသည် မိန်းမကြောင့်ဖြစ်သည် မဟုတ်။ မိန်းမသည် ယောက်ျားကြောင့်ဖြစ်ခြင်းဖြစ်သည်။ 9ယောက်ျားကို မိန်းမအတွက်ဖန်ဆင်းသည်မဟုတ်။ မိန်းမကို ယောက်ျားအတွက်ဖန်ဆင်းခြင်းဖြစ်သည်။ 10ထိုကြောင့် နတ်ဒေဝါများကိုထောက်ထား၍ မိန်းမသည် မိမိ၏ဦးခေါင်းကိုဖုံးရမည်ဖြစ်သည်။ 11သို့သော်လည်း ဘုရားရှင်၏လူများထဲတွင် ယောက်ျားသည် မိန်းမဖြစ်သူကိုမှီခိုရသည်မဟုတ်သကဲ့သို့ မိန်းမ သည်လည်းယောက်ျားကိုမှီခိုရသည်မဟုတ်။ 12အဘယ်ကြောင့်ဆိုသော်မိန်းမသည် ယောက်ျားကြောင့်ဖြစ်ရသကဲ့သို့ ယောက်ျားသည်လည်း မိန်းမအားဖြင့်ဖြစ်ရသည်။ သို့သော်အရာအားလုံးသည် ဘုရားရှင်ကြောင့်ဖြစ်ကြရသည်။ 13မိန်းမသည် ဦးခေါင်းကိုမဖုံးဘဲ ဘုရားရှင်ကိုဆုတောင်းလျှင် သင့်လျှော်သည်မသင့်လျှော်သည်ကို သင်တို့ ကိုယ်တိုင်ဆင်ခြင်သုံးသပ်ကြလော့။ 14ယောက်ျားသည် ရှည်သောဆံပင်ရှိလျှင် ရှက်ဖွယ်ဖြစ်ကြောင်းကို သဘာဝတရားအတိုင်းသင်တို့သိနိုင်ကြသည် မဟုတ်လော။ 15မိန်းမတို့အတွက်မူကား ရှည်သောဆံပင်ရှိခြင်းသည် မိန်းမတို့၏ဘုန်းအသရေပင်ဖြစ်သည်။ အဘယ်ကြောင့်ဆိုသော် ဆံပင်ကို မိန်းမများအတွက်ခြုံထည်အဖြစ်ပေးထားသောကြောင့်ဖြစ်သည်။ 16သို့သော်လည်း တစ်စုံတစ်ယောက်သောသူသည် ထိုအကြောင်းအရာနှင့်ပတ်သက်၍ ငြင်းခုံလျှင် ငါတို့၌လည်းကောင်း၊ ဘုရားရှင်၏ အသင်းတော်၌ လည်းကောင်း၊ ထိုဓလေ့ထုံးစံမှလွှဲ၍အခြားသောထုံးစံမရှိ ကြောင်း သူတို့အားအကျွန်ုပ်ပြန်ပြောနိုင်သည်။ 17သို့ရာတွင် ဤညွှန်ကြားချက်များကိုပေး၌ သင်တို့ကိုအကျွန်ုပ်မချီးမွမ်းပါ။ အဘယ်ကြောင့်ဆိုသော် သင်တို့ စုဝေးကြခြင်းသည် ကောင်းကျိုးထက်ဆိုးကျိုးကိုဖြစ်စေသောကြောင့်ဖြစ်သည်။ 18ပထမအချက်အနေဖြင့် သင်တို့သည် အသင်းတော်၌စုဝေးကြသောအခါ အချင်းချင်း စိတ်ဝမ်းကွဲပြားခြင်းရှိကြ သည်ကို ငါကြားရသည်။ ထိုအကြောင်းအရာသည် အထိုက်အလျောက်မှန်ကန်သည်ဟုအကျွန်ုပ်ယုံကြည်သည်။ 19အဘယ်ကြောင့်ဆိုသော် သင်တို့အချင်းချင်းစိတ်ဝမ်းကွဲခြင်းကြောင့် သင်တို့ထဲရှိမည်သူတို့သည် ဘုရားရှင်သဘောကျနှစ်သက်တော်မူသောသူများဖြစ်ကြောင်းကိုပြသမည်ဖြစ်သောကြောင့်ဖြစ်သည်။ 20သင်တို့သည် အတူစုဝေးကြသောအခါ ဘုရားရှင်၏ပွဲတော်ကို သင်တို့စားကြရရန်စုဝေးကြသည်မဟုတ်။ 21အဘယ်ကြောင့်ဆိုသော် သင်တို့တစ်ဦးချင်းစီသည် မည်သူ့ကိုမျှမစဘဲအရင်စားသောက်ကြသဖြင့် ဆာသူက ဆာပြီး မူးသူကမူးနေကြသောကြောင့်ဖြစ်သည်။ 22ထိုသို့ စားသောက်ရန်အတွက် သင်တို့တွင်ကိုယ်ပိုင်အိမ်မရှိသလော။ သို့မဟုတ် ဘုရားရှင်၏ အသင်းတော်ကို မထီမဲ့မြင်ပြု၍ ဆင်းရဲသောသူတို့ကို အရှက်ခွဲလိုကြသောကြောင့်လော။ သင်တို့အား အကျွန်ုပ်မည်သို့ဆိုရမည် နည်း။ ဤကိစ္စတွင် သင်တို့ကို အကျွန်ုပ်မချီးမွမ်းနိုင်ပါ။ 23အဘယ်ကြောင့်ဆိုသော် အကျွန်ုပ်သည်ဘုရားရှင်ထံမှရရှိသောအရာကို သင်တို့အားလက်ဆင့်ကမ်းပေးခြင်း ဖြစ်သည်။ ကိုယ်တော်ယေရှုသည် သစ္စာဖောက်ခံရသောညတွင် ပေါင်မုန့်ကိုယူ၍ 24ကျေးဇူးတော်ကို ချီးမွမ်းပြီးမှ မုန့်ကိုဖဲ့၍ “ဤမုန့်သည်ကား သင်တို့အတွက်စွန့်သောအကျွန်ုပ်၏ကိုယ်ခန္ဓာ ဖြစ်သည်။ ယူ၍စားကြလော့။ အကျွန်ုပ်အားအောက်မေ့သတိရခြင်းအားဖြင့် ဤသို့ပြုလုပ်ကြလော့” ဟု မိန့်တော်မူခဲ့သည်။ 25ထိုနည်းတူ ညစာစားပြီးနောက် စပျစ်ရည်ခွက်ကိုယူ၍ “ဤခွက်သည်ကား ငါ၏အသွေးဖြင့်သွန်းလောင်းသော ပဋိညာဉ်အသစ်ဖြစ်သည်။ အကျွန်ုပ်အားအောက်မေ့သတိရခြင်းအားဖြင့်ဤခွက်ကိုယူ၍ သောက်ကြလော့” ဟုမိန့်တော်မူခဲ့၏။ 26အဘယ်ကြောင့်ဆိုသော် သင်တို့သည် ထိုမုန့်ကိုစား၍ ထိုခွက်ကိုသောက်ကြသောအခါတိုင်းတွင် အရှင်သည်ပြန်ကြွလာတော်မမူခင်အချိန်အထိ အရှင်သည်အသေခံတော်မူခဲ့ကြောင်းကို သင်တို့ကြေငြာခြင်း ပင်ဖြစ်သည်။ 27ထိုကြောင့် မည်သူမဆိုဘုရားရှင်၏မုန့်နှင့်ခွက်ကိုမထိုက်မတန်ဘဲစားသောက်လျှင် ဘုရားရှင်၏ ကိုယ်ခန္ဓာနှင့် အသွေးတော်ကိုပြစ်မှားရာရောက်သည်။ 28သို့ဖြစ်၍ လူတိုင်းမုန့်နှင့်ခွက်ကိုမစားမသောက်မီ မိမိကိုယ်ကိုဆင်ခြင်းသုံးသပ်ကြလော့။ 29အဘယ်ကြောင့်ဆိုသော် အရှင့်၏ကိုယ်ခန္ဓာဆိုသည်ကိုမသိဘဲ စားသောက်သောသူသည် မိမိအပေါ်အပြစ်ဒဏ် ကျရောက်စေရန်စားသောက်သူပင်ဖြစ်သည်။ 30ထိုအကြောင်းကြောင့် သင်တို့ထဲတွင် အားနည်းသောသူ၊ မကျန်းမမာသောသူများစွာရှိကြပြီး သေဆုံးသောသူအချို့ပင်ရှိကြသည်။ 31သို့သော် အကျွန်ုပ်တို့သည် မိမိကိုယ်ကိုပထမဦးစွာစစ်ဆေးကြမည်ဆိုပါက အပြစ်စီရင်ခြင်းမှကင်းလွှတ်ကြ မည်ဖြစ်သည်။ 32အကျွန်ုပ်တို့သည် အရှင်အပြစ်စီရင်သောအခါတွင် အကျွန်ုပ်တို့အား ဤလောကရှိလူများနှင့်အတူ အပြစ်ဒဏ် မခံရစေရန်ဆုံးမတော်မူခြင်းကိုခံကြရခြင်းဖြစ်သည်။ 33ထိုကြောင့် ငါ၏ညီအစ်ကိုမောင်နှမတို့၊ သင်တို့စားသောက်ကြရန်အတူတကွစုဝေးကြသောအခါ အချင်းချင်း တစ်ယောက်ကိုတစ်ယောက်စောင့်ကြလော့။ 34တစ်စုံတစ်ယောက်သည် ဆာလောင်နေပါက သူ၏အိမ်၌စားသောက်ခဲ့သင့်သည်။ သို့မှသာ သင်တို့စုဝေးကြ သောအခါ အရှင့်၏ပြစ်ဒဏ်စီရင်ခြင်းမှကင်းလွတ်မည်ဖြစ်သည်။ ဤအကြောင်းအရာနှင့်ပတ်သက်၍ အကျွန်ုပ် သင်တို့ထံသို့ရောက်ရှိလာသောအခါ ပို၍ရှင်းပြပါမည်။
Obecnie wybrane:
1 Corinthians 11: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.