Nai Vakatekivu 28
28
Sa talai Jekope ko Aisake me laʼki dua na watina maivei ira na wekana, 1-5. Sa laʼki taura e dua tale na watina ko Iso vei ira na luve i Isimeeli, 6-9. A tadra i Jekope, 10-22.
1A sa kacivi Jekope ko Aisake, a sa vosavakalougatataka, ka vunauca, ka vaka vua, Mo kakua ni taura e dua me watimu maivei ira na gonealewa ni Kenani: 2mo tu cake, mo lako ki Petani-erama, ki na vale i Pecueli, na tama i tinamu; ka taura e dua me watimu maikea, maivei ira na luvena alewa ko Lepani, na gane i tinamu. 3Ia me vakalougatataki iko na Kalou Kaukauwa, ka cakavi iko mo vakaivakawa, ka vakavuqataki iko, mo yaco me tamata lewe vuqa sara; 4ka vakayacora vei iko na kalougata i Eparaama, io, vei iko, kei ira vata kei iko na nomu kawa; mo taukena na vanua ko sa tiko vulagi kina, a ya ka solia na Kalou vei Eparaama. 5A sa talai Jekope yani ko Aisake: a sa lako ki Petani-erama, kivei Lepani, na luve i Pecueli na kai Siria, na gane i Repeka, na tina i Jekope kei Iso.
6Ia ni sa kunea ko Iso ni sa vosavakalougatataki Jekope ko Aisake, a sa talai koya ki Petani-erama, ka me kauta maikina e dua me watina; ia ni sa vosavakalougatataka, sa vakarota, ka vaka, Mo kakua ni taura e dua me watimu maivei ira na gonealewa ni Kenani; 7ia sa vakarorogo talega ko Jekope vei tamana kei tinana, a sa lako ki Petani-erama; 8a sa kunea ko Iso ni sa tawa vinakata na gonealewa ni Kenani ko Aisake na tamana; 9sa qai lako ko Iso kivei Isimeeli, a sa kuria na watina sa tiko vua, ni sa tauri Mebelaci, na gane i Nepejoci, me watina, o koya na luvena alewa ko Isimeeli, na luve i Eparaama.
10A sa lako tani mai Pieri-sepa ko Jekope, ka lako vaka ki Karani. 11A sa yacova loa e dua na yasana, a sa moce maikina, ni sa dromu na siga: a sa taura e so na vatu e na yasana ko ya, ka tauca me nonai lokoloko a sa koto sobu e na yasana ko ya. 12A sa tadra, ka, raica, e dua nai kabakaba sa tu e vuravura, a sa yacovi lomalagi na muana: ka, raica, sa cabe cake ka lako sobu tiko kina ko ira na agilose ni Kalou: 13ka, raica, sa tu mai muana ko Jiova, a sa kaya, Oi au ko Jiova na Kalou i Eparaama na tamamu, kei na Kalou i Aisake: a vanua ko sa koto kina kaʼu na solia vei iko, kei ira na nomu kawa; 14ia na nomu kawa ena vaka na kuvu ni qele; ia ko na tete yani kivaka ki ra, ka vaka ki cake, ka vaka ki na tokalau, ka vaka ki na ceva; ia ena kalougata vei iko kei na nomu kawa na veimataqali kecega e vuravura: 15ka, raica, kaʼu na tiko kei iko, ka vakabulai iko e na nomui lakolako kecega, au na vakalesui iko talega ki na vanua o qo; niʼu na sega ni biuti iko, ka meʼu cakava mada vei iko na ka kaʼu a vosa kina vei iko.
16A sa yadra mai na nona moce ko Jekope, a sa kaya, Sa tiko vakaidina ko Jiova e na yasana o qo, ia kaʼu a sega ni kila koi au. 17A sa rere ko koya, a sa kaya, A kena rerevaki na tikina o qo! sa sega ni ka tani o qo, a vale ga ni Kalou, kei na matamata-ni-koro kei lomalagi o qo. 18A sa sou e na sabogibogi ko Jekope, a sa taura na vatu ka tauca oti me nonai lokoloko, a sa vakaduria me duru, a sa livia na wai wai ki delana: 19a sa vakatoka na yaca ni tikina ko ya ko Peceli [A vale ni Kalou]: ia na yaca ni koro ko ya eliu ko Lusa. 20A sa ia na vosa vavakini ko Jekope, ka kaya, Kevaka sa na tiko kei au na Kalou, ka vakabulai au e na sala o qo kaʼu sa lako kina, ka solia vei au na kakana meʼu kania, kei nai sulu meʼu suluma, 21kaʼu sa lesu vakavinaka kina ki na vale i tamaqu; ena qai noqu Kalou ko Jiova: 22ia na vatu o qo, kaʼu sa duria me duru, ena vale ni Kalou: ia na ka kecega ko sa solia vei au, au na solia vakaidina na kenai katini vei iko.
Obecnie wybrane:
Nai Vakatekivu 28: FIJ1864
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
First full Bible in the Fijian language © British and Foreign Bible Society, 1864.
