मत्ति 4
4
सैतानडे़ॽ येसु पापबेॽ रेम्एम्मा योक्पॽआ
(मरकुस १:१२-१३; लुका ४:१-१३)
1मोबा सैतानडे़ॽ जाँच ले़टुरो लुनुङ पबित्रा होङ्निवाडे़ॽ येसु रे़क्रे़क्मा ठाउँबेॽ चिक्खे़ॽटु। 2इडोॽ येसु रिबोङ लेन्डा, सेन्डा इमाङ्सो मे़न्चारेॽ पेम्बॽआसे़ॽ सगे़ॽ सिसु। 3मोडोक्पेॽनोॽ येसुबेॽ सैतान लेन्नुङ लुसु, “हे़न चइबानोॽ निवाहाङ्मि पसा ले़येहोङ लो इघा रुङ्गोॽवा ‘चरेपा लिसे’ लुसे।” 4तर येसुडे़ॽ लुसु, “धारमिक नेॽचिराबेॽ इडोॽ साप्पॽआ ले़ये ‘याॽमि चरेपाडे़ॽरेॽनोॽ हिङ्निबा, तर निवाहाङ्मि याबुकबाङ्ए इक्को इक्को बचनडे़ॽ हिङ्इये।’”
5मोबा सैतानडे़ॽ येसु पबित्रा सहर यरुसलेमबेॽए मन्दिरमि वाचेनमि धुरिसोक्पेॽ चिक्खे़ॽनुङ लुसु। 6“लो हे़न चइबानोॽ निवाहाङ्मि पसानोॽ ले़येहोङ इगोबाङ मिम्मु आम्युसे, इन्ढोङ्होङ धारमिक नेॽचिराबेॽ इडोॽ साप्पॽआ ले़ये-
‘निवाहाङ्डे़ॽ हे़न जोगा ले़ॽसिॽ थाङ्सिरिदुतजि पाङ्इन्डुजे।
आम्मि सराङ रुङ्गोॽवाबेॽ मे़न्ठोक्लो लुनुङ माहा दुतजिडे़ॽ हे़न हुक हुकपेॽनोॽ टाःप्मिम्मे#भजनसङ्ग्रह ९१:११-१२’।”
7फेरिसो येसुडे़ॽ मो सैतान लुसु, “धारमिक नेॽचिराबेॽ इडोक्सो साप्पॽआ ले़ये, ‘हे़ने़ॽ परमपरभु आम्मि निवाहाङ्मि जाँच ए़ले़ःॽमे’#यहुदि धारमिक नियम ६:१६।”
8मोबा फेरि सैतानडे़ॽ येसु इक्को अग्लोमा टोकटोक्माबेॽ चिक्खे़ॽनुङ इगो मक्खाक्डेमबेॽहा चोप राज्य सुख बिलासनुङ्हा थोक खाङ्मुसाङ लुसु, 9“हे़ने़ॽ उःक्युनुङ का ढोग ले़ःॽङाहोङ, इघा खाङ्मुहा चोप राज्य हे़न पिन्ने़।” 10येसुडे़ॽ मो लुसु, “हे़न सैतान, इगोबाङ खे़प्पेसे! इन्ढोङ्होङ धारमिक नेॽचिराबेॽ इडोॽ साप्पॽआ ले़ये, ‘हे़ने़ॽ टाङ्बामि निवाहाङ्रेॽ ढोग ले़ःॽमे, मोबा खोमिरेॽनोॽ सेवा ले़ःॽमे।’”
11सैतान येसु याःॽयानुङ खे़ॽपेसा। मोबा थाङ्सिरिदुतजि लेन्नुङ खोमि सेवा ले़टुजि।
येसुडे़ॽ गालिल ठाउँबेॽ टाङ्बामि योम्बोक तरिक्पॽआ
(मरकुस १:१४-१५; लुका ४:१४-१५)
12युहन्ना तिरिङ्गा खिमबेॽ से़क्सिघे़ॽपॽआ खा खेम्नुङ ए़क्साङ येसु गालिलराजि खडा। 13मोबा खो नासरत सहर याःॽयानुङ कफरनहुमबेॽ पेम्बोगा। इगो सहर चाहिँ गालिल माहोङ्मामि के़क्पेॽ नप्तालिनुङ जबुलुन कुलजिमि ठाउँबेॽ सिॽटे़। 14यसैया अगमबक्ताडे़ॽ लुबॽआ बचन इडोॽ पुरा लिसा,
15“जबुलुननुङ नप्तालिमि मुलुकबेॽहा याॽमिजि,
यरदन होङ्मामि मेए़रेङ्हा ठाउँबेॽ मोबा गालिल टोम्लिॽवामि के़क्पेॽ पेङ्घुबा अयहुदि याॽमिजि खेप्सानुमे!
16सेन्जिगुपपेॽ पेङ्घुबा याॽमिजिडे़ॽ इक्को बेॽए उज्यालो खाङ्डोक्इटुजे।
सिमवानुङ सेन्जुगुप्पेॽ पेङ्खुबाजिबेॽ इक्को बेॽए उज्यालो लेङ्इटे़।”#यसैया ९:१-२
17मोडोॽ बेलाबाङ्नोॽ परचार ले़ःॽसाङ येसुडे़ॽ लुबोगु, “पापबाङ टेसानिङे, इन्ढोङ्होङ निवाहाङ्मि राज्य के़क्पेॽनोॽ लेम्बेटे़।”
येसुडे़ॽ ङा राःप्खुबाजि चोङ्सा टोङ्बॽआ
(मरकुस १:१६-२०; लुका ५:१-११)
18इक्याक येसु गालिल माहोङ्मामि के़क्पेॽ राम्मे़ॽनिङ्सिमाबेॽ निप्पाङ ङा से़ॽखुबाजि याङ्घामा राप्मे़ॽनिङ्सिबॽआ खाङ्डोक्टु। मोजि पत्रुस लुमे सिमोननुङ खोमि निसा अन्दरियास ले़टाजे। 19येसुडे़ॽ मोजि लुसुजि, “कानुङ राप्साजे, के़ॽ हे़न्जिङ याॽमिजि काबेॽ लाआप्खुबा टोङ्इन्जिम्ने़।” 20मोबा मोजि मोडोक्पेॽनोॽ खोजिमि याङ्घामा याःॽयानुङ येसुनुङ राम्बोगाजि।
21मोबा ए़डे़ॽ मेॽयोङ खे़ॽमाबेॽ जब्दियामि निप्पाङ पसाजि याकुबनुङ खोम निसा युहन्ना चुप्टुजि। खोजि नाउबेॽ खोम्बानुङ याङ्घामा ठिःॽमे़ॽसिडाजि। येसुडे़ॽ मोजिसो के़डुजि। 22मोबा के़ःॽमासोरोॽनोॽ नाउनुङ खोम्बा याःॽयानुङ येसुनुङ राम्बोगाजि।
येसुडे़ॽ गालिल ठाउँबेॽ ले़ःॽपॽआ योम्बोक
(लुका ६:१७-१९)
23मोबा येसु यहुदिजि सुम्ढाम सभा खिमराजि सिक्छे इःॽसाङ, निवाहाङ्मि राज्यमि टुम्बेॽहा खा खेम्मेॽटुजि। मोडोक्पेॽ खाल खालहा टुक्खुबाजि नुबोक्साङ गालिलबेॽ वाइसा। 24मोडोगे़ॽ खोमि माहा खा सिरिया देसबेॽसो मुक्पोगा। याॽमिजिडे़ॽ इडोॽ बेॽलो खालहा टुक्खुबाजि, दुःखबेॽ सिॽपॽआजि, मङे़ॽमा चाबे़ॽ राःप्पॽआजि, नमदेम्बे़ॽ राःप्पॽआजिनुङ सोगुबाजि येसुमि पोम्बेॽ खिजे़डुजि। येसुडे़ॽ माहा चोप खालहा टुक्खुबाजि नुबोगुजि। 25मोबा गालिल छेत्रा, डेकापोलिस छेत्रा, यरुसलेम सहर, यहुदिया ठाउँनुङ यरदन होङ्मामि मेॽए़रे़ङ छेत्राबेॽहा बेॽलो याॽमिजि येसुनुङ सोरि राम्बोगामि।
Obecnie wybrane:
मत्ति 4: YAMP
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2023, Wycliffe Bible Translators, Inc. and Nepal Bible Society
