मरकुस 16
16
ठारलो मोळवाट्यो
(मत्ती 28:1-8; लुका 24:1-12; योहान 20:1-10)
1जेतार शब्बाथोन दाहळू जात रोयू, ती मरीयम मगदलीनी, एने याकुबोन आया मरीया, एने सोलोमी ये गोंदायने वावा चीजे मुले लेदा कि आवीन तीना पोर लागाळे. 2हाप्तान पेहेले दाहळे भोव भाकवे सोंदारे वेगात जेतार दाहळू निकवनेत बाज रोयू होतु, चे मोळवाट्यान चा आव्या, 3एने आपोसमा कोयता होता, “आमरेन कोरीन मोळवाट्यान झोपला पोर गोथू दोगळू कून धोकलसे?” 4जेतार चे डूवा उचा कोऱ्या, ती देख्या कि दोगळू ढोबोवलू छे चू घोनु मोटूत होतु. 5मोळवाट्यामा माहाय जायीन चे एक जुवान काजे धोव्वा छिंदरा पेहरीन जेवळे धोळे बोसलू देख्या, एने घोन जुदा वाहराय गोया. 6चू तीनु काजे कोयू, “वाहरायू मा, तुमु येसु नासरी काजे, यु ख्रुस पोर चोळाव गोयलु होतु, हेरने बाज रोया चू जीव उठलु छे, न्या नि होय; देखू, जी ची जागा छे, जा चे तीना काजे मेकला होता. 7बाकीन तुमु जावू, एने तेरा चेला एने पतरस काजे कोयू कि चू तुमरे गोथू पेहेल गलीलमा जोसुजोसू चू तुमु काजे कोयलु होतु, तुमु चा तीना काजे देखसु.” 8एने चे निकवीन मोळवाट्यामा गोथा ढास गोया; काहाकि कापारी एने बिक तिंदरेमा भोराय गोयली होती; एने चे कुदा काजे काहीन नी कोया, काहाकि बिहीता होता.
मेरीयोमोन येसुक देखनो
(मत्ती 28:9-10; योहान 20:11-18; लुका 24:13-35)
9हाप्तान पेहेले दाहळे सोंदारो होयताच चू पोछु जीव उठीन आखान-पेहेले मरीया मगदलीनी काजे जीनीमा गोथी चू सात भुंडली आत्मा निकावलु होतु, देखाय पोळ्यु. 10ची जायीन येसुन सातीदारो काजे जे दुखोमा डूब रोया होता एने रोड रोया होता, खोबर कोरीन. 11चे यो सोमवीन कि चू जीवतेलू छे एने ची तीनाक देखली छे, भुरसू नी कोऱ्या.
दुय चेलाक येसुक देखनो
12इनान ओवतेन येसु दिसरा रूपमा तिंदरे मायीन दुय जोना काजे जेतार गाव भूनी जाता होता देखाय पोळ्यु. 13चे बी जायीन दिसरा काजे खोबर कोऱ्या, बाकीन चे तिंदरे पोर बी भुरसू नि कोऱ्या.
मोटली आदेश
(मत्ती 28:16-20; लुका 24:36-49; योहान 20:19-23)
14पोछु चू ग्यारा जोना काजे बी, जेतार चे खाणो खाणे बोस रोया होता देखाय पोळ्यु, एने तिंदरू अविस्वास एने मोनोन काठला पोर गुणू लागाळयू, काहाकि जे तीनाक जीवतू होयीन उठनेन ओवतेन नाक देखला होता, चे तेरे पोर भुरसू नि कोरला होता. 15एने येसु तीनु काजे कोयू, “तुमु आखा जोगोमा जायीन आखा कोवीन माणसो काजे वारली खोबरोन प्रचार कोरू. 16जू भुरसू कोरे एने बाप्तिस्मा लेये तेरूत छुटकारू होयसे, बाकीन जू भुरसू नी कोऱ्या चा गुणावा ठेराय जासे. 17भुरसू कोरणे वावामा ये चिन्ह होयसे कि चे मारा नावोसी भुंडली आत्मा काजे निकावसे, नोवली-नोवली भाषा बुलसे, 18घोळसा काजे चूट लेसे, एने कोदि चे जीव लेनेन चीज बी पी जाये ते बी तिंदरो काहनोत नुकसान नि होये; चे बिमारी वावा पोर हात मेकसे, एने चे वारू होय जासे.”
येसुन सोरगोम हाकलायनो
(लुका 24:50-53)
19प्रभू येसु तिंदरे साते वात कोरनेन ओवतेन सोरग पोर चुटाय गोयू, एने परमेश्वरोन जेवळे धोळे बोस गोयू. 20एने चे निकवीन होर जागे प्रचार कोऱ्या, एने प्रभू तिंदरे साते काम कोरतू रोयू एने तीना चिन्हान लारे यो साते-साते होयतो होतो, वचन काजे मजबूत कोरतू रोयू आमेन.
Obecnie wybrane:
मरकुस 16: BFBNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
