Fwile 5
5
Moizi valé Arɔn go Faraɔn va
(Fw 3:18–19; 2 MNzfs 32:13–19)
1’Bɛ zuo Moizi valé Arɔn go Faraɔn va yé wo lé a lɛ léé: Gakelebale, Izraɛl lé Bale léma: ’I daan ’élé munu ma, ’wo go fɛti kɛlɛ nyéné la ’é tɔ bɔle we gi. 2Faraɔn a zi pa léé: De ɛ ke Gakelebale nya yé maa a dére lɛdɔma yé maa daan Izraɛl maa? Maa ’ka Gakelebale dɔɔa lo yé maa ’ka dan daan lɛ Izraɛl ma pelo. 3Wo léé: Ébrunu lé Bale bɔra ko va. ’I zi nɔ ko lɛ léé, ko yi yaa tawo nyéné la yé ko sarakanu bo Gakelebale lɛ, té é ko gyɛ migyɛgyɛ valé gwɔun nya lo we gi. 4Éjipiti mununwiinzan blɛn lé wo lɛ léé: Moizi valé Arɔn, mɛmalé ka munu si wolé nyanama laa? ’Ka go kalé nyanama pa.
Faraɔn nyané taa pa Izraɛlnu ta
5Faraɔn léé: Bé ye, munu ’ko kɛlɛ kiɛre kolé tɛrɛ la yé ka ’ka wo vona flee yé wo ’wolé nyanama pa lo. 6’Bɛ yi duo nya munu lé nyanama taginizannu valé Izraɛlnu lé wo wo dɔ kominu nya ’wo bwenu zuo, Faraɔn wo bélidɔ léé: 7Té ka lɔɔ nɔ munu lɛ é dɛrɛ briki gyɛle we ma bélé é vinin zo lo; wobozen ’wo go lɔɔ so. 8Naa, briki ’léé lé wa gya é vinin, ’wo yee ’léé duo gyɛ, té ka a do kpen si a ta lo; wa kun‐anwozannu nya, bɛwemalé woo siaan léé, ’wo go ’wolé Bale ban lɛ. 9’Ka nyanama taa nɔ wo lɛ yé wa pa, yé té ’wo tɔné dɔ vié dére lɛ é dɛrɛ lo.
10Munu lé nyanama taginizannu valé kominu lé munu lɛ léé: Faraɔn léma: Wo ’ka lɔɔ no ka lɛ é dɛrɛ lo; 11kabozen ’é go lɔɔ so, dé ka a ye fɛana, ana, naa, wo ’ka kalé nyanama do kpen sina a ta lo. 12Munu nwɛɛn Éjipiti tɛrɛ faa la ’sapun soowɔlale we gi lɔɔ lɛi. 13Nyanama taginizannu wo tunu yé wo léé: ’Kalé nyanama lɛ sɔɔ yi do do ma, ka kɛla turu ’té wo lɔɔ no ka lɛ fɛan zo bɛ, a zo. 14Izraɛlnu lé kominu lé Faraɔn lé nyanama taginizannu wo dɔ Izraɛlnu zuo, wo ’bɛnu bla yé wo léé: Briki ’léé lé wa fe ka lɛ, mɛmalé ka ’ka a lɛ sɔɔ lɛ yese valé kyɔ bélé é vinin zo loo?
15Izraɛlnu lé kominu go ’wo ma dunnu lɛ Faraɔn lɛ, yé wo lé a lɛ léé: Mɛmalé i we kɛlɛ i wuozannu lɛ a zoo? 16Wo ’ka lɔɔ no i wuozannu lɛ lo, yé wo lé ko lɛ léé, ’ko briki gyɛ. Yé bé ye, wo i wuozannu bla bélé fɛan zo lé ilé munu a wegyɛmunu nya, a zo. 17Faraɔn léé: Ka a kun‐anwozannu nya. Bɛwemalé ka léé, ’wo go Gakelebale ban lɛ. 18Sin, ’ka go nyanama pa; wo ’ka dan lɔɔ nɔ lɛ ka lɛ lo, yé ’ka yee briki ’léé duo gyɛ.
19Izraɛlnu lé kominu a ye léé, dé wa fe léé, té ’wo briki do kpen si a ta lo, ’wo yi do do zé gyɛ, ’té wo ’wo kɛlɛ nyanéblezannu baba nya. 20Wo si Faraɔn va aan wo, wo kee Moizi valé Arɔn nya, ’té ’bɛnu a wo lɛbɛnna. 21Wo lé wo lɛ léé: Gakelebale ’é ka ye ma, yé é a we ble ma. Ka ko gin dɔ Faraɔn valé é wuomunu nyé gi, yé ka gwɔun pa wo lee ko gyɛle we gi.
22Moizi go Gakelebale va é ziin yé é léé: Mizan, mɛmalé i we tɔntɔn kɛlɛ munu ’ko lɛɛ? Mɛmalé i an nwunvɔɔ? 23É sia bléyian va lé maa go Faraɔn va wefele i tɔ nya we gi, éé nyané paan munu ’ko ta, yé i ’ka ilé munu si lɛ we gi lo.
Obecnie wybrane:
Fwile 5: GOURU
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Alliance Biblique de Cote d'Ivoire 1979
