Fwile 3
3
Yiliné kyɛ blé
(Kw 7:30–34)
1Moizi é na ti, Madian balebanzan Jétro lé trubɛ tabin‐é; é go trubɛ nya nyéné lé fɛna zi yé é da Kazambale lé gɔ va, Orɛb gɔ va. 2Gakelebale lé lanje bɔra a va kyɛnéné gi, yiliné méléna. Moizi a nagini; yé bé ye, kyɛ a yiliné blena, ’té a yee ’ka zanaan lo.
3Moizi léé: Maa dan nɔla lɛ yé maa we blɛn ’ko nagini, yé wean ma lé kyɛ ’ka yiliné blé lo, yé maa a ye. 4Gakelebale a ye léé, é nɔla a naginile we gi, yé Kazambale a laa yiliné méléna, yé é léé: Moizi! Moizi! Yé é we léé: Maa lo. 5Kazambale léé: Té i bié ’ko lo, fɛana lé i ke é dɔle bɛ, ana tɛrɛ a é tinle, amalé ’i sawala si i gane ma. 6Yé é we taa fe léé: I ti koo, Abraam koo, Izak koo, Jakɔb koo, maa a wolé Bale nya. Moizi kana Kazambale naginile lee, amalé é yara yɔɔ.
7Gakelebale léé: Anlé munu lé ke Éjipiti, maa wolé nyanéblele ye, yé dunnu lé wa wona nyanépawotazannu lee, maa a ’ma, yé maa wolé we tɔntɔn gi dɔɔ. 8Maa zun wo sile Éjipiti munu lee we ma, wo sile tɛrɛ ’ko la yé ’wo go tɛrɛ blɛn zima ta we gi, wo gole tɛrɛ nyɔnɔzan ta we gi. Kanaannu koo, Étinu koo, Amorénu koo, Férézinu koo, Éévinu koo, Jébusinu koo, wa é nyanale tɛrɛ ’ko la. 9Izraɛl lé siaalenu bɔ an va, yé nyané lé Éjipiti munu a paan wo ta, maa a ye. 10Sin, ’i go, maa dan i nwunvɔ lɛ Faraɔn va, yé i dan anlé munu Izraɛl lé nénu si lɛ Éjipiti tɛrɛ la.
11Moizi lé Kazambale lɛ léé: De lé ke maa nya yé maa go Faraɔn va yé maa Izraɛl lé nénu si Éjipiti tɛrɛ laa? 12Kazambale léé: Maa dan kɛlɛ lɛ i va; dé i munu si Éjipiti tɛrɛ la ka dan Kazambale bɔ lɛ gɔ ’ko nwiin; ’bɛ dan kɛlɛ lɛ tɔmase nya i lɛ léé, maa ɛ i nwunvɔ.
13Moizi lé Kazambale lɛ léé: Maa dan go lɛ Izraɛl munu va yé maa dan a fe lɛ wo lɛ léé: Ka tinu lé Bale maa nwunvɔ ka va. Naa, dé wo a tɔ laa an lee, maa dan a fe lɛ wo lɛ nɔɔ? 14Kazambale lé Moizi lɛ léé: Mi lé maa ke a nya, maa a ’bɛ nya. Yé é we taa fe léé: ’Ko zo lé i dan we fe lɛ Izraɛl lé nénu lɛ, léé: Mi lé wa laan Maa a, yee ɛ an nwunvɔ ka va. 15Kazambale lé é ziin Moizi lɛ léé: I dan we fe lɛ ’ko zo Izraɛl lé nénu lɛ, léé: Gakelebale, wo tinu lé Bale, Abraam koo, Izak koo, Jakɔb koo, wolé Bale i nwunvɔ wo va. Yee Gakelebale ɛ ke an tɔ nya lɛɛfaama, ’bɛ ɛ ke an tɔ nya mi kulu é kulu gi. 16’I go, ’i Izraɛl mi segelenu zén ékeva yé bé fe wo lɛ léé: Gakelebale ka tinu lé Bale bɔra an va, Abraam koo, Izak koo, Jakɔb koo, wolé Bale lé. É léma: ’É ka ye, yé we lé wa kɛlɛna ka lɛ Éjipiti, ’é a ye, 17yé é léé, ’é dan ka fwi lɛ Éjipiti tɛrɛ la, fɛna lé ka ke nyané blena, ana, yé ’é go ka nya Kanaannu koo, Étinu koo, Amorénu koo, Férézinu koo, Éevinu koo, Jébusinu koo, wolé tɛrɛ la, tɛrɛ nyɔnɔzan ta. 18Wo dan tɔné dɔ lɛ i dére lɛ; yé i dan go lɛ Éjipiti mununwiinzan blɛn va, bii valé Izraɛl mi segelenu nya, yé ka dan a fe lɛ a lɛ léé: Gakelebale, Ébru munu lé Bale bɔra ko va. ’I zi nɔ ko lɛ léé, ’ko yi yaa tawo nyéné la sarakanu bole Gakelebale, kolé Bale lɛ we gi. 19Maa gi dɔɔ léé, Éjipiti mununwiinzan ’ka dan daan lɛ ka ma yé ka go lo, ’té dé an bɛ plɛplɛ ’ka a ta lo. 20Maa dan an bɛ soi lɛ yé maa dan Éjipiti munu bla lɛ, we blɛnblɛnnu gɔnɔ faa lé maa dan a kɛlɛ lɛ wo méléna, wo nya. ’Bɛ zuo é dan daan lɛ ka ma yé ka go. 21Maa dan a pa lɛ Éjipiti munu bli gi léé, ’wo wezin kɛlɛ ka lɛ, yé dé ka zi sia ka ’ka dan go lɛ ka lee koro nya lo. 22Gɔɔlifufɛnu koo, kyanfɛnu koo, sɔ lé ka dan zén lɛ ka benu valé ka lunu ta koo, le faa do do é dan wo laa lɛ é punma le valé ’bɛ va lomu lee. Ka dan Éjipiti munu lé kɔn gi fwi lɛ.
Obecnie wybrane:
Fwile 3: GOURU
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Alliance Biblique de Cote d'Ivoire 1979
