Maki 16
16
Yeisu ina taoyamna tetelina
(Maki 16:1-20)
Yeisu ámasa goi itaooyamna tetelina
(Madiu 28:1-8; Luke 24:1-8; Iyoni 20:1-10)
1E Sabati ikavava, Meri guma Magidara mana ebígana, tauyana Yemesa sinana be nakae Sarome taiyao sina pútuma dedevina sigimone bego sima Yeisu wowona sikatukoisi.
2Tuwo wiki ana maliyalina vakuumgoina,#16:2 Wiki ana maliyalina vakuumgoina: Kidi Diyuu idi wiki Sande goi ivatowo. níyala matavivina ikaipodume goi vevinayadi sitáoya, madi pútuma sima sisowóduwo Yeisu ana valiwoga tukubu goi. 3Enao goi simamaima go, vevinayadi taudiva sibobóbwara kadi,
‘Avatau tukubu tobuna ana kauboda gurewa bei ipuli manuda?’
4Siiketoiya go, sidobala sigite gurewayana bogina pulipulina! Tauna sikaliwoisa. Idi kaliwoisayana itoboine. Gurewayana gagaina toina! 5Sima tukubuyana goi sisiu go, kakataidi goi tubuwau tayamo sigite iitusobu. Tauyana ana kwama poowouna be maanawena. Sigite, sikainaopa be nakae atedi iyova. 6E tubuwauyana kana,
‘Taabu kokaateyōva! Yeisu guma Nasareta tupaatukoina koolusale. Yaubada ámasa goi bogina ikaitáoe. Tauna Tauyana ameko geya. Ina kaba yata kogīte, daakakaina! Tauna taabu kokaateyōva, 7go sem kōna Pita nakae Yeisu ina tovatotowanayao madabokidi kolatuwokōidi kami,
“Tauyana bei ivakumgo ina Galili#Madiu 26:32; Maki 14:28. namliyeta baige komi kōna amoko goi bei kogite nakae boi bogina ilatuwokoimi.”’
8Tuwo tukubuyana goi sisowóduwo sisiya. Simalitatátava be nakae nukotodi siwówana. Sinonoina go, enao goi geya vatau tayaamo yaina sitalavaite idi matoita pasina.
Yeisu ina sowóduwo Meri Magidara yaina
(Madiu 28:9-10; Iyoni 20:11-18)
[ 9E tutayana wiki ana maliyalina vakuumgoina nobuyana giyaina, Yeisu ina taoyamna mlina goi igimisowóduwo Meri guma Magidara yaina. Meriyana sinaena boi nimatu dimoni ainima aiyuwo sikaaiyaka go, Yeisu ivatapiyedi sisowóduwo. 10Amo Meriyana itáoya ina tauyadi boi Yeisu sivaakitau yaidi. Kidi nava madi nuwomou Yeisu manuna sitaitáiya go, ina ilatuwokoidi 11idigo kana,
‘Yeisu maa yawoina ikaaiyaka. Bogina agite!’
Ago ina livala geya sinumiseyeta.#16:11 Ina livala geya sinumiseyeta: Ame unana kidi Diyuu idi sinapu goi vavina anetava ina livala geya sinumiseyeta.
Yeisu iisowóduwo ana tosabokuliyao adi taiyuwo yaidi tetelina
(Luke 24:13-35)
12E ame dogoiyadi mlidi Yeisu ina tovatotowanayao adi taiyuwo siiketoiya sinonoina bego ituli ta kasa goi go, Yeisu ituli ta maisina goi ivataoduwe adi taiyuwokova yaidi. 13Sigite ikavava, sikaluvilamna sina Yerusalema goi sediyao silatuwokoidi go, kidi geya sinumisedita.
Yeisu iisowóduwo ina tovatotowanayao yaidi tetelina
(Madiu 28:16-20; Luke 24:36-49; Iyoni 20:19-23; Guinuwa 1:6-8)
14Niga Yeisu ina tovatotowanayao yawou tayamo sikakáika go, matadi goi Yeisu ivataoduwe. Ivataoduwe go, geya idi numisamo pasina be nakae idi dabakasa pasina ibowoidi idigo kana,
‘Komi manakae! Guna taoyamna mlina avataoduwegu sedao yaidi namliyeta moe sitalavaite yaimi go, geya konumisedita!’
15Tuwaina idigo kana,
‘Kōna asa liliudi goi Vala Dedevina kotalavāite tomota liliudi yaidi. 16Avatauwa neta sinuumisegu be nakae adi sayóyova sitagone, e tauyadi adi yava bei sibabane. Go avatauwa neta geya sinumiseguta, e nava Yaubada bei itakinoidi toogoyoidi, e adi liuna sibabane. 17E guna tonumisayadi aba kinana toogagaidi bei siguinuwedi ame nakae: Yoigu goi bei dimoni sivatapiyedi, e tomota goi sisowóduwo. Bei itoboinedi ta kaníyana ta kaníyana goi sibobóbwara. 18Neta moteta bolaausidi siyoisidi, geya sivailaita. Neta bwae bolaausina sinimnim, geya sikamaseta. Neta nimadi goi tokatówana sibisikonedi, bei siboboina.’
Yeisu ituko inonoina yábana tetelina
(Luke 24:50-53; Guinuwa 1:9-11)
19E tuwo tutayana ida Tomoya Yeisu ilatuwokoidi ikavava, Yaubada ikabi itukoe inave yábana goi, e wowoina basekoina Yaubada kakataina goi itusobu. 20E kidi go ina tovatotowanayaoyadi sina asa liliudi goi Vala Dedevina sitalavaite tomota yaidi go, ida Tomoyayana taiyao sipaaisewa. Go Tauyana aba kinana goi idi livala ikamoitamoe tomota yaidi.]#16:20 Nakona ame tomwanayadi Maki geya iginidita, go sem tokaidámana tayamo ikatusavi.
Obecnie wybrane:
Maki 16: GVS
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2019, Wycliffe Bible Translators, Inc. All rights reserved.
