યોહાન 15
15
ઇસુ ખેરો દારાક્ષા વેલો હાય
1“ખેરો દારાક્ષા વેલો આંય હાય; આને માઅ બાહકો ખેડુત હાય.” 2“દરેક ડાલખ્યા જે મામે જોળાલ્યા હાય” જે ડાલખ્યા ફલ નાહ લાવત્યા, તીયાહાને તોઅ વાડી ટાકેહે, આને જે ડાલખ્યા ફલ લાવત્યાહા, તીયાહાને તોઅ સાફ કેહે, કા આજી વાદારે ફલ લાવે. 3માયુહુ તુમનેહે જે ગોઠ આખીહી, તીયાકી તુમુહુ આમી શુદ્ધ વી ગીયાહા. 4તુમુહુ માઅ આરી જોળાય રેજા, આને આંય તુમા આરી જોળાયને રેહે, દારાક્ષા વેલા ડાલખ્યા, વેલા આરી જોળાય નાય રેતા, તે ફલ નાહ આપી સેકત્યા, તેહકીજ તુમુહુ માઅ આરી જોળાય નાય રર્યા તા, ફલ નાહ લાવી સેક્તે. 5આંય દારાક્ષા વેલો હાય: આને તુમુહુ ડાલખ્યા હાય; જો કેડો માઅ આરી જોળાય રેહે, આને આંય તીયા આરી જોળાય રીહુ, તોઅ ખુબ ફલ લાવેહે, કાહાકા માસે અલગ વીને તુમુહુ કાયજ નાહ કી સેક્તે. 6પેન જો કેડો બી માઅ આરી જોળાય નાય રેઅ, તીયાલે ડાલખી હોચે વાડીને ફેકી દેવામે આવેહે, આને જાંહા તે ડાલખ્યા હુકાય જાત્યાહા, તાંહા લોક તીયાહાને એકઠે કીને બાલી દેતેહે. 7જો તુમુહુ માઅ આરી જોળાયને રીહા, આને માઅ ગોઠી પરમાણે ચાલાહા, તાંહા જો કાય તુમુહુ પરમેહેર બાહકાપે માગાહા, તોઅ તુમનેહે આપી. 8તુમુહુ ખુબ ફલ લાવા, તીયાકીજ માઅ પરમેહેર બાહકા મહિમા વેહે, તાહાજ તુમુહુ માંઅ ચેલા બોની સેકતાહા. 9જેહકી પરમેહેર બાહકાહા માપે પ્રેમ રાખ્યો, તેહકીજ માયુહુ બી તુમાપે પ્રેમ રાખ્યોહો; તુમુહુ માઅ પ્રેમુમે બોની રેજા. 10જેહકી માયુહુ માઅ પરમેહેરુ બાહકા આજ્ઞા પાલન કેયોહો, આને તીયા પ્રેમુમે બોની રીયોહો, તીયુજ રીતીકી જો તુમુહુ માઅ આજ્ઞા પાલન કેરાહા, તા તુમુહુ માઅ પ્રેમુમે બોની રીહા. 11જેહકી આંય ખુશીમે હાય, તેહકીજ તુમુહુ બી ખુશીમે રેજા, આને તુમુહુ પુરી રીતીકી ખુશીમે રેજા, તીયા ખાતુર માયુહુ એ ગોઠયા તુમનેહે આખ્યાહા.
12“માઅ આજ્ઞા એ હાય, કા જેહકી માયુહુ તુમનેહે પ્રેમ કેયોહો, તેહકીજ તુમુહુ બી એક-બીજા આરી પ્રેમ કેરા.” 13કેડો બી પોતા દોસદારુલે દેખાવા ખાતુર કા તોઅ તીયાલે પ્રેમ કેહે, બાદા કેતા હારો ઉપાય ઓ હાય, કા તોઅ પોતા દોસદારુ કેતા મોય જાય. 14આંય તુમનેહે જે બી આજ્ઞા દિહુ, તે પાલાહા તા, તુમુહુ માઅ દોસદાર હાય. 15આમીને આંય તુમનેહે માઅ ચાકર નાય આખુ, કાહાકા ચાકર નાહ જાંતો, કા તીયા માલિક તીયાહાને જે કામે કેરાવેહે, તે કાહાલ કેરાવેહે: પેન માયુહુ તુમનેહે માઅ દોસદાર આખ્યાહા, કાહાકા માઅ પરમેહેર બાહકાહા માને જે બી ગોઠ આખીહી, તે બાધ્યા ગોઠયા માયુહુ તુમનેહે આખી દેધ્યાહા. 16તુમુહુ માને નાહ પસંદ કેયો, પેન માયુહુ તુમનેહે પસંદ કેયાહા, આને તુમનેહે કામ હોપ્યોહો કા તુમુહુ જાયને ફલ લાવા; આને આંય ઈચ્છા રાખુહુ કા ઇ ફલ તુમા જીવનુમે ચાલુ રેઅ, આને તુમુહુ માઅ નાવુકી જો કાય બી પરમેહેર બાહકાપે માગાહા તોઅ તુમનેહે આપી. 17ઈયુ ગોઠી આજ્ઞા આંય તુમનેહે ઈયા ખાતુર દિહુ કા તુમુહુ એક-બીજા આરી પ્રેમ કેરા.
જગતુ સતાવણી
18“કાદાચ જગતુ લોક તુમા આરી નફરત કેતે વેરી, તા યાદ રાખજા, કા તુમનેહે નફરત કેતા પેલ્લા તીયાહા માન નફરત કેયીહી.” 19કાદાચ તુમુહુ જગતુ લોકુ હોચ્યા રેતા, તા જગતુ લોક આપુ માંહે હાય આખીને તુમનેહે પ્રેમ કેતે, પેન ઈયા લીદે કા તુમુહુ જગતુ લોકુ આરી સંબંધ નાહ રાખતા, પેન માયુહુ તુમનેહે જગતુ લોકુમેને પસંદ કી લેદાહા; ઈયા ખાતુર જગતુ લોક તુમા આરી નફરત કેતાહા. 20માયુહુ પેલ્લા જે ગોઠ તુમનેહે આખીહી, તે તુમુહુ યાદ રાખા, કેલ્લો બી ચાકર તીયા માલિકુ કેતા મોડો નાહા, કાદાચ તીયાહા માને સતાવ્યો વેરી, તા તુમનેહે બી સાતાવી; કાદાચ તીયાહા માઅ આજ્ઞા પાલન કેયી વેરી, તા તુમા બી આજ્ઞા પાલન કેરી. 21પેન તુમુહુ માઅ ચેલા હાય તીયા લીદે, આને માન મોકલુનારા પરમેહેર બાહકાલે નાહ ઓખુતે, તીયા લીદે તે લોક તુમા આરી ઈયુ રીતી વેહવાર કેરી. 22કાદાચ આંય જગતુ લોકુહુને આવીને પરમેહેરુ વિશે નાય આખતો, તા તે માઅ ગોઠીલે નફરત કીને ગુનાલે નાય બોણતે; પેન પરમેહેર તીયા પાપુ ન્યાય કેરી, તીયા સમયુલે તે કાય બી બાનો કાડી નાહ સેક્તે. 23જો કેડો બી માને નફરત કેહે, તોઅ માઅ પરમેહેર બાહકાલ આરી બી નફરત કેહે. 24તીયા લોકુ હુંબુર જે ચમત્કાર માયુહુ કેયાહા, તે ચમત્કાર કેલ્લા બી માંહા નાય કેયા, કાદાચ તે ચમત્કાર આંય નાય કેતો, તા તે પાપુ ગુનાલે નાય બોણતે, તેબી તીયાહા માન આને માઅ પરમેહેર બાહકા આરી નફરત કેયીહી. 25પેન ઇ બાદો તા પવિત્ર નિયમશાસ્ત્રામે લેખલો હાય, તોઅ વચન પુરો વેઅ, તીયાહા માઅ આરી નોક્કામી નફરત કેયીહી. 26આંય પરમેહેર બાહકાહીને તુમા ખાતુર એક સહાયક મોક્લેહે, આને તોઅ તા પવિત્રઆત્મા હાય, જો પરમેહેર બાહકાહીને આવેહે, આને જો સત્ય હાય તીયાલે તોઅ જાહેર કેહે; જાંહા તોઅ આવી, તાંહા તોઅ માઅ વિશે આખી દેખાવી. 27આને તુમુહુ જગતુ લોકુહુને માઅ વિશે આખી દેખાવાહા, કાહાકા તુમુહુ શુરુવાતનેજ માઅ આરી હાય.
Obecnie wybrane:
યોહાન 15: DUBNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.
