मर्कुस 2
2
येशूले लुलो भया मान्सन निको अर्याको
(मत्ती ९:१-८; लूका ५:१७-२६)
1केइ दिन पछा येशू कफर्नहुम गाउँमी फर्किबर आया, मान्सनले उन घर आइरैछन भणन्या सुण्यो 2तइ पछा भौत मान्सन ताँ आया ठुलो भिड लागी रे घर जम्माइ मान्सले भरियो याँ सम्मकि घरका देली रे बाइर सब मान्सले भरिरइथ्यो रे येशूले उननलाइ परमेश्वरको बचन सुणाउनाथ्या। 3तइ बेला ताँ चार जना भण्ना बड्ता मान्सन लुलो मान्ससित आया रे चार जानाले तइलाइ बोकिबर येशूका वाँ आया। 4भिड भया हुनाले तिन मान्सन येशूका नजिक आउन सकेन तब तिनन पाखामि गया रे पाखा उचेडिबर येशू भया ठाउँमि बाटो बनाइबर लुलो मान्सलाइ बिस्सतरा सहित उनरा वाँ ओलाइ दियो।
5जब येशूले उन मान्सनको बिश्वास आफमी धेक्यो, तब उनले तइ लुला बिरामी मान्सलाइ भण्यो, “हेर चेला तेरा पाप क्षमा भया छन।” 6तब कोइ मोशाको कानुन सिकाउन्यावाला जो तइ घरमि बसिरइथ्या येशूले भण्या तइ कुरणी तिनले आफ्ना-आफ्ना मनमि बिचार अद्द लाग्या, 7यइ मान्सले इसो नभण्नु पड्या यो त परमेश्वरको बिरुद्दमि निन्दा अद्दा छ। परमेश्वर बाहेक और कसइले लगइ पाप क्षमा अद्द सक्दइन। 8येशूले तिनरो बिचार बुजिबर, तिननलाइ भण्यो, “तमले इसो बिचार अरन्छौ। 9कि भण्नु सजी छ? ‘तेरा पाप क्षमा होइय्या’ भण्नु कि ‘उठ, आफ्नो बिस्सतरा उठा, रे हिट भण्नु?’
10तर म चाहानउ तम यो जाण कि म, मान्सको चेलोलाइ संसारमी पाप क्षमा अद्दया अधिकार छ।” तब येशूले लुलो मान्सलाइ भण्यो, 11“म तुलाइ भण्नउ उठ, रे आफ्नो बिस्त्तरा समा रे घर जा।” 12पइ उतन्जेइ त्यो मान्स उठयो, आफ्नो बिस्तरा उठायो रे सबका अगाडी घर गयो, यो धेकिबर सब छक्क पण्या, रे तिन सबले परमेश्वरको प्रसंसा अददाइ भण्यो, “हामले पइल्ली कभइ इसो धेक्या थेइन।”
येशूले लेबीलाइ बोलायो
(मत्ती ९:९-१३; लूका ५:२७-३२)
13येशू आजी गालील समुद्रको किनारमी गया, पइ मान्सनको ठुलो भिड उनरा वाँ आया, रे येशूले तिनलाइ परमेश्वरको बचन बठेइ शिक्षा दियो। 14तइ पछा जब येशू अगाडी गया, उनले लेवि नाउको एक मान्सलाइ धेक्यो जइको अर्खो नाउ मत्ती थ्यो। उइका बाको नाउ अल्फयस थ्यो। उ कर उठाउन्या अड्डामी बसिरइथ्यो। येशूले उइलाइ भण्यो, “शिष्य हुनाइलाइ मेरा पछा लाग।” लेवि उठ्यो रे उनरा पछा लाग्यो।
15पछा येशू तिनरा शिष्या लेविका घरमि बसाइतकको खाना खानाइ बस्याथ्या। ताँ भौत कर उठाउन्या रे भौत मान्सन थ्या जइलाइ औरले पापी भण्नथ्या। तिनन येशूका शिष्या भयाथ्या। तिन सब येशू रे उनरा शिष्यासित बसिबर खाना खान्नाथ्या। 16जब मोशाको कानुन सिकाउन्यावाला केइ फरिसि मान्सन, कर उठाउन्या रे भौत मान्सन जइलाइ औरले पापी भण्नथ्या, तिननसित खाना खान्नारएका धेक्यो, रे येशूका शिष्यालाइ भण्यो, “यो मान्स कर उठाउन्या सित रे पापीसित बसिबर क्याकि खान्नाछ?” 17येशूले यो सुणिबर तिननलाइ भण्यो, “निरोगि मान्सलाइ बैद्दको जरुरत हुनइन तर बिरामी मान्सलाइ बैद्दको जरुरत हुन्छ। म तिनन मान्सनलाइ बोलाउन आया होइन जो आफलाइ धर्मि माणन्नाहान तर तिननलाइ जइले आफइलाइ पापी हु भणि माणन्नाहान।”
बर्त बस्या बिसयमि प्रश्न
(मत्ती ९:१४-१७; लूका ५:३१-३९)
18यूहन्नाका शिष्या रे फरिसि मान्सन बर्त बसन्थ्या। एक दिन केइ मान्सनले येशूका वाँ आइबर सोध्यो, “यूहन्नाका शिष्या रे फरिसि मान्सन मान्तर बर्त बस्साहान, तमरा शिष्या क्याकि बर्त बस्साइन्न?” 19येशूले जबाफ दियो, “जबसम्म म आफ्नो शिष्यासित हुनउ तिन कसेरी बर्त बस्साहान? तिन इसो अद्दाइन क्याकि तिन सब खुशी छन, जसेरी एक ब्याउलाका साथी ब्याउला सित ब्यामि खुशी हुनाहान। 20एकबेर इसो समय आउन्या हो जब ब्याउलो बरयाती बठेइ अलग हुन्या हो। तइ पछा बरयाती बर्त बसन्ना। 21हामले पुरानो लत्तामि नयाँ लत्ताको टालो हाल्लाइन। यदि हामले इसो अर्यो भण्या हामले लत्ता धुनतक नयाँ हाल्या टालो फाटीबर निकलिजान्छ रे पुरानो लत्ता बरता फाटन्छ, रे पुरानो लत्ताको दुलो झिक बरता ठुलो हुन्या हो।” 22इसेरि कोइ मान्स लगइ नयाँ अंगुरको रसलाइ पुरानो छालाको थैलामि राख्दइन, क्याकि इसो अर्यो भण्या जब अंगुरको रस ओसाउन्छ रे पुरानो छालाको थैलो साणो होइबर चिरिन्छ रे अंगुरको रस रे छालाको थैलो दुइ बर्बाद हुनाहान। तबइकिलाइ नयाँ अंगुरको रस नयाँ थैलामि राखिन्छ।
येशू बिश्राम दिनका प्रभु
(मत्ती १२:१-१४; लूका ६:१-११)
23बिश्राम दिनमि जब येशू रे उनरा शिष्या अनाजका खेत बठेइ जन्नाथ्या ताँ उनरा शिष्या अनाजका बाला टिपीबर खान लाग्या। 24फरिसि मान्सनले येशूलाइ भण्यो, “क्याइ तमरा शिष्या हामरा बिश्राम दिनमि यो काम अद्दाहान जो हामरा मोशाका नियमले अददु दिनइन? रे बिश्राम दिनमि यिनले कि अददु पण्न्छ त्यो तमले सिकाउनु पण्न्छ।” 25येशूले भण्यो, क्या तमनले यो लगइ पबित्र बचनमी पड्या आथिनौ ब, जब राजा दाउद रे तिनरा मान्सन भोकाइरइथ्या रे खानाकिलाइ केइ थेइन तब कि अर्यो? 26उनले अबियाथार यहुदि प्रधान पुजारिका दिनमि परमेश्वरका घरमि भितर पस्यो, रे परमेश्वरलाइ भेटिका रुपमि चडाया रोटा आफइ खायो रे आफना साथिनलाइ ख्वायो। जो कि तिन रोटा यहुदि पुजारि बाहेक औरले खानु उचित थेइन। 27तब उनले तिनलाइ भण्यो, “बिश्राम दिन मान्सका निउति बनाइया हो तर मान्स बिश्रामदिनकी निउति बनाया होइन। 28तबइकिलाइ म, मान्सको चेलोलाइ बिश्राम दिनमि लगइ अधिकार छ।”
Obecnie wybrane:
मर्कुस 2: DTYNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
