गलाती 1
1
पावलका तर्फ बठेइ अबिबादन
1म पावल यो चिठ्ठी तमनलाइ लेख्दाछु। म एक छान्या शिष्य हु, म कसइ मान्सनका समुह बठेइ छान्या होइन अथवा कसइ मान्स बठेइ छान्या शिष्य हुनाइ नियुक्त भया होइन। तर येशू ख्रीष्ट रे परमेश्वर पिता, जइले उनलाइ मृत्यु बठेइ जिउना बनायो उन बठेइ नियुक्त भया हु। 2म यो चिठ्ठी मसित हुन्या सब भाइनसित गलातिया प्रदेशमि भया मण्डलिलाइ लेख्दाछु।
3म प्रार्थना अद्दउ कि परमेश्वर पिता रे हामरा प्रभु येशू ख्रीष्टले तमनलाइ अनुग्रह रे सान्ति दिउन। 4हामरा परमेश्वर रे पिताको इच्छा अन्सार येशू ख्रीष्ट हामरा पापकिलाइ मर्या ताकि हाम यइ बर्तमान संसारका मान्सनको प्रभाव बठेइ छुटकारा पाउन सकु। 5म प्रार्थना अद्दउ कि मान्सनले परमेश्वरलाइ सदासर्वदा महिमा अरुन। आमेन।
और केइ सुसमाचार आथिन
6म निरास छु कि उनरा मान्सन हुनाइ ख्रीष्टका अनुग्रह बठेइ तमनलाइ बोलाउन्या परमेश्वरलाइ इति छट्टाइ त्यागिबर तमन अर्खो शिक्षामि बिश्वास अद्द लागिरइछौ, जइलाइ मान्सनले सुसमाचार भण्ना हान। 7साच्ची एक मान्तर सत्य सुसमाचार छ। तर केइ मान्सनले ख्रीष्टका बारेमिको सुसमाचारलाइ बद्ल्ल खोज्जा छन, रे तिननले तमनलाइ भ्रममि पाड्या छन।
8हाममि हइ कसइले अथवा स्वर्गदुतइले लगइ हामले प्रचार अर्याको सुसमाचारको भण्ना अर्खो शिक्षा सिकाउनाहान, जइलाइ तिननले सुसमाचारको भणि दाबि अददाहान भण्या तइ मान्सलाइ परमेश्वरले सदाइकि निउति श्राप दिउन। 9हामले अगाडी बठेइ भणेइ जसेइ म आजी अइल लगइ भण्नउ, तमनले जो सुसमाचार ग्रहण अर्या छौ, यदि और कसइले अर्खो शिक्षा सिकाउनाहान, जइलाइ तिननले सुसमाचार भणि प्रचार अददाहान भण्या तइ मान्सलाइ परमेश्वरले सदाइकि निउति श्राप दिउन। 10साच्ची म मान्सनलाइ खुशी पड्ड कोशिस अद्दारयइन, तर परमेश्वरलाइ खुशी पड्ड चाहानउ। म मान्सनलाइ खुशी पड्ड कोशिस अद्दारयइन। यदि मइले आजी मान्सलाइ खुशी पड्ड कोशिस अर्या भया म ख्रीष्टको दास हुन्या थेइन।
छान्या मान्स हुनाइ पावलको बोलावट
11बिश्वासि भाइन हो, तमन यो जाण भण्न्या म चाहनउ कि मइले प्रचार अर्या सुसमाचार मान्सनले बनाया सुसमाचार होइन। 12क्याकि मइले यो पुर्खा बठेइ सिक्या होइन न त मलाइ कसइ मान्सले सिकायाथ्यो तर येशू ख्रीष्टले मलाइ यो धेकाया हो।
13तमनलाइ था छ कि मइले यहुदि धर्मका नियम अनसार जीवन बिताया, रे कसेरी मइले बिश्वासिलाइ भयानक रुपले सताया रे तिननलाइ नास पाड्डया कोशिस अर्या। 14हामरा जातिमी मेरा यहुदि दौतरि भण्ना म हमरा पुर्खाको शिक्षा पढाइ रे पालन अददाइ भौत उत्सुक थ्या रे मेरा पुर्खाको परम्परामि भौत जोसिलो थ्या।
15-16तर परमेश्वरले आफना चेलो मलाइ प्रकट अददाइ निर्णय अर्यो, ताकि म येशूका बारेमि गैर-यहुदि मान्सनका बिचमि सुसमाचार प्रचार अद्द सकु। परमेश्वरले मलाइ मेरो जन्म हुनु अगाडी छान्यो, रे उनरा अनुग्रह बठेइ मलाइ उनरो सेवा अददाइ बोलायो। येशूले आफइलाइ प्रकट अर्या पछा, म कसइका वाँ सल्लाह लिन गयइन। 17रे जो म भण्ना अगाडी येशू ख्रीष्टका छान्या शिष्या थ्या, तिननलाइ भेट्टाइलाइ म यरुशलेम सहरमि गएन। तर म उतन्जेइ अरब देशमि गया, रे पछा दमस्कस सहरमि फर्किबर आया।
18तब तीन बर्ष पछा केफाससित भेट्टाइ म यरुशलेम सहर गया, रे उनसित पन्नर दिन सम्म बस्या। 19मइले तइ बेला प्रभुका भाइ याकुब एक मान्तर येशू ख्रीष्टका छान्या शिष्य लाइ भेट्या। 20परमेश्वर मेरा साक्षि छन कि मइले तमनलाइ जो लेख्ग्या छु त्यो पुरा सत्य छ।
21तिनन येशू ख्रीष्टका छान्या शिष्यालाइ भेट्या पछा म सिरिया रे किलिकिया प्रदेसका इलाकातिर गया। 22तर यहुदिया प्रदेशमि बस्या ख्रीष्टका बिश्वासीनले मलाइ कभइ भेट्या आथिन। 23तिनन सुणिरया कि एक समय जइले हामलाइ सताउनथ्या रे जइले हामलाइ नास पाड्डया कोशिस अरन्थ्यो, आब उनइले येशू ख्रीष्टका बारेमि तेइ सुसमाचार प्रचार अद्दा छन। 24तबइकिलाइ तिननले परमेश्वरलाइ मेरा जीवनमी अर्या कामकी निउति परमेश्वरको महिमा अर्यो।
Obecnie wybrane:
गलाती 1: DTYNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.