प्रेरित 16
16
पावल रे सिलाससित तिमोथीको भेट
1पावल रे सिलास डर्बि सहर रे लुस्त्रा सहरमि लगइ आया। ताँ प्रभुमि बिश्वास अद्द्या तिमोथी नाउँ भया एक जाना शिष्य थ्या। तिन एक यहुदि बिश्वासि स्वानिको चेला थ्या, तर तिनरा बा भण्या ग्रीक देशमि बस्यावाला थ्या। 2लुस्त्रा सहर रे आइकोनियन सहरमि भया भाइनले तिमोथीलाइ निको मान्स भणनथ्या। 3तिनलाइ पावलले आफसित लैन्या मन अर्यो। तिन ठाउँमि रन्या यहुदि मान्सनका लाग्दा पावलले तिनलाइ लैजाइबर खतना अर्यो। क्याकि तिनरा बा ग्रीक देशमि बस्यावाला हुन भण्न्या उन सबलाइ थाथ्यो। 4आब पावल रे पावलका साथी गाउँ गाउँको बाटो होइबर जान्ज्या तिननले यरुशलेम सहरका येशू ख्रीष्टका छान्या शिष्या रे मण्डलिका अगुवानले अर्या फैसला बिश्वासिनलाइ पालना अर भणि सुणाइ दियो। 5यिसेरी मण्डलिका मान्सन बिश्वासमि बलिया हुनाइ रे संख्यामि दिन दिनै बड्डाइ गया।
माकेडोनिया प्रदेस जान्या दर्सन
6पबित्र आत्मा बठेइ एसिया प्रदेसमि बचन प्रचार अद्द जन जा भण्या हुनाले पावल, सिलास रे तिमोथी फ्रिगिया जिल्ला रे गलातिया प्रदेस होइबर गया। 7माइसिया प्रदेसको सिमाना आया पछा तिननले बेथिनिया गाउँ तिर जान्या बिचार अर्यो। तर येशूका आत्माले तिननलाइ जान दिएइन। 8तब माइसिया प्रदेस होइबर तिनन त्रोआस सहरमि गया। 9तसइ रात पावललाइ एक दर्सन भयो माकेडोनिया प्रदेसमि बस्या एक जानो मान्स कल्लिबर तिनलाइ बिन्ति अद्दाथ्यो, “समुद्रको पारिबटा ओलीबर माकेडोनिया प्रदेसमि आस, रे हामलाइ सायता अर।” 10जब तिनले यो दर्सन पायो, उतन्जेइ हाम माकेडोनिया प्रदेस जानाइ तयार भया। हामले यो पक्का अर्या कि तिननलाइ सुसमाचार प्रचार अद्दाइ परमेश्वरले हामलाइ बोलाया रइछ।
फिलिप्पी सहरमि लिडीयाले येशूमि बिश्वास अर्या
11तब हाम त्रोआस सहर बठेइ जहाजमि चडीबर सिदाइ सामोथ्राके टापुतिर लाग्या, रे भोलिबार नियापोलिस सहरमि पुग्या। 12रे ताँ बठेइ फिलिप्पी सहरमि पुग्या, जो माकेडोनिया प्रदेसको ठुलो सहर थ्यो, रे त्यो रोमी मान्सनको कब्जामी थ्यो। हाम तइ सहरमि केइ दिन बस्या। 13आब बिश्राम दिनमि सहरका ढोका बठेइ बाइर नदिका किनार गया, क्याकि ताँ यहुदि मान्सन प्रार्थना अद्द्या ठाउँ छ भणि हामले अनुमान लाइराइथ्या, रे ताँइ हाम बस्या रे जम्मा भएइ स्वानीनसित कुरणीकानी अद्द पस्या। 14पइ थिआटीरा सहर बस्सेइ, बैजनि रङ भया लत्ताको ब्यापार अद्देइ लिडिया नाउँकि परमेश्वरको आराधना अद्देइ एक स्वानिले हामरा बचन सुण्यो। पावलले बोल्या कुरणी मन लाइबर सुणुन भणबर प्रभुले तइको मन खोलि दीयाथ्यो। 15जब तइको रे तइका घरका सबको बप्तिस्मा भयो, तब तइले हामलाइ बिन्ति अरि, “यदि तमनले मलाइ प्रभुमि बिश्वास अद्देइ बइनि माणन्छौ भण्या मेरा घर आइबर बस।” रे तइले हामलाइ कर अद्द पसि।
पावल रे सिलास झेलमि
16जब हाम प्रार्थना अद्द्या ठाउँमि जान्नाथ्या, ताँ एक नौकरनी केटीसित हामरो भेट भयो, जइमि एक यिसो भूत आत्मा थ्यो, जइको सहयोग बठेइ भबिष्यकि कुरणी भणीदिनथि रे तइका मालिकका निउति भौत कमाइ दिन्थि। 17त्यो पावल रे हामरा पछा लागी, रे यिसो भणबर जोरले कला हाल्ल पसि, “यिन मान्सन ठुला परमेश्वरका सेवक हुन। यिननले तमनलाइ मुक्तिको बाटो धेक्काउन्नाछन।” 18तइले भौत दिन सम्म इसोइ अर्यो। तब पावलले दिक्क माणिबर फनक्क फर्किबर तइ भूत आत्मालाइ भण्यो, “येशू ख्रीष्टका नाउँमि म तुलाइ तइ बठेइ निकल्ल्या आज्ञा अद्दउ।” पइ त्यो भूत आत्मा तसइ बेला निकल्यो।
19तर तइका मालिकले तिनरा कमाइको आसा टुट्या धेकिबर तइले पावल रे सिलासलाइ समाइबर सहरका चोक बठेइ हाकिमका वाँ तानिबर लइय्यो। 20पइ तिननलाइ सहरका हाकिमका वाँ लेइबर भण्यो, “यिन मान्सन यहुदि हुन, यिनले हामरा सहरमि उपद्दर मचाइबर दु:ख दिन्ना छन। 21यिन यिसा-यिसा रित सिकाउना छन जो हाम रोमीकिलाइ ठीक आथिन।”
22तब मान्सन मिलिबर पावल रे सिलासमि जाइ लाग्या। सहरका हाकिमले तिनरा लत्ता चिरिबर कोर्राले हाण्न्या आज्ञा दियो। 23तिननले पावल रे सिलासलाइ भौत हाण्या पछा तिननलाइ झेलमि हाल्दियो, रे झेलका हाकिमलाइ यिन कैदीनलाइ कडा निगरानीमि राख्द्या आज्ञा दियो। 24यिसो आज्ञा पाइबर झेलका हाकिमले तिननलाइ झेलको सबहइ भितरा कोठामी लैजाइबर तिनरा खुट्टामी काठका साङलाले बेडदियो।
25तर अधरात पावल रे सिलास प्रार्थना अद्दाइ परमेश्वरको भजन गाउनाथ्या, रे और कैदिनले यो सुणिरइथ्या। 26तब उतन्जेइ एक ठुलो भुइँचालो गयो, रे झेलका जग हलिया, रे उतन्जेइ जम्माइ ढोका उगड्या, रे सबका साङला खुल्या। 27झेलको हाकिम निन बठेइ बिउज्यो, रे झेलका सब ढोका उगड्या धेकिबर कैदिन सब भाग्या भणि सोचिबर उइले आत्माहत्या अद्द्या बिचारले आफ्नो तरबार समायो। 28तर पावलले जोरले यिसो भण्नोइ कला हाल्यो, “तम आफइलाइ केइ नोक्सानी जन अर, हाम सब याँइ छौ।”
29तब बत्ति मागिबर झेलको हाकिम दकुडिबर भितर आयो, रे डरले काम्दोइ पावल रे सिलासका अगाडी घोप्टो पड्यो। 30पइ तिननलाइ बाइर लेइबर उइले भण्यो, “उद्दार पाउनाइलाइ मइले कि अददु पणन्छ?”
31पइ तिननले भण्यो, “प्रभु येशू ख्रीष्टमी बिश्वास अर, पइ तम रे तमरा परिबारले उद्दार पाउन्या हौ।” 32तिननले उइलाइ रे उइका घरमि भया सब मान्सनलाइ प्रभुको बचन सुणायो। 33तब रातका तसइ बेला उइले तिननलाइ लैजाइबर तिनरा घा धोइदियो। पइ उ रे उइका मौले उतन्जेइ बप्तिस्मा लियो। 34तइ पछा तिननलाइ घर लेइबर तिनरा अगाडी खानाइ राख्दियो, रे परमेश्वरमि बिश्वास अरबर उन सब भौत आनन्दित भया।
35भोलिबार ब्याहानइ हाकिमले पावल रे सिलासलाइ छाडदिन्या आज्ञा दियो। 36तब झेलका हाकिमले पावललाइ यिन कुरणी भण्यो, “सहरका हाकिमले तमनलाइ छाडिदिन्या आज्ञा दिइराइछ। तबइकिलाइ आब निकलिबर सान्ति सित जा।”
37पइ पावलले तिननलाइ भण्यो, “हाम रोमी हुनाहुनाइ लगइ तिननले हामरो केइ दोस नपाइबर मान्सनका अगाडी हामलाइ हाण्यो, झेल हाल्यो, रे आब हामलाइ गोप्यमी निकाल्लाइ खोज्जा छन? यो हुन सक्दैन। उन आफइ आउन रे हामलाइ निकालिबर लैजाउन।”
38तिन सिपाइनले हाकिमलाइ यिन कुरणी सुणायो। पावल रे सिलास त रोमी रइछन भण्न्या सुणिबर तिनन डराया। 39तिनन आइबर पावल रे सिलाससित माफि माग्यो, रे तिननलाइ बाइर लैजाइबर सहर छाड्ड्या बिन्ति अर्यो। 40रे तिनन झेल बठेइ बाइर निकलिबर लिडियाका घर गया, रे बिश्वासिन भाइनसित भेटघाट अर्या पछा तिननलाइ उत्साह दिइबर ताँ बठेइ गया।
Obecnie wybrane:
प्रेरित 16: DTYNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
