प्रेरित 14
14
आइकोनियन सहरमि पावल रे बारनाबास
1आब आइकोनियन सहरमि यिसो भयो, पावल रे बारनाबास यहुदि सभाघर भितर पस्या रे यिसेरी बोल्या कि यहुदि रे गैर-यहुदि मान्सन बठेइ भौतले येशू ख्रीष्टमी बिश्वास अर्यो। 2तर बिश्वास नअद्द्या यहुदि मान्सनले गैर-यहुदि मान्सनलाइ उर्यायो रे तिननले बिश्वासि भाइनको बिरोध अर्यो। 3प्रभुका निउति साहससित बोल्लाइ भौत बेर सम्म पावल रे बारनाबास ताँइ रया। प्रभुले तिनन बठेइ चमत्कारी चिन्ह रे अचम्मका काम अराइबर तिननले यो साबित अर्यो कि यइ अनुग्रहका बारेमि तिनरो सन्देश साच्ची थ्यो। 4तइ सहरका मान्सनमि फाटो आयो रे कोइ यहुदि मान्सनतिर कोइ येशू ख्रीष्टका छान्या शिष्या तिर लाग्या। 5जब गैर-यहुदि रे यहुदि दुएइ मान्सनले आफना हाकिमसित मिलिबर तिननलाइ सतायो रे माद्दाइलाइ ढुङाले हाण्यो। 6तब यो कुरणी था पाइबर तिनन लुकोनिया जिल्लाका लुस्त्रा सहर रे डर्बि सहरका वलतिर पल्तिरका गाउँमी भाग्या। 7रे ताँ तिननले सुसमाचार प्रचार अर्यो।
लुस्त्रा रे डर्बि सहरमि
8पइ लुस्त्रा सहरमि आफनी इजाका गर्भइ बठेइ डुणो जन्म्या एक मान्स थ्यो, जो खुट्टा चलाउन सकनथेइन रे उ कभइ हिट्या थेइन। 9तइले पावललाइ बोल्लार्या सुण्न्नाथ्यो, पावलले तइलाइ एकहोरो हेर्यो रे तइ मान्सले “म लगइ निको हुन सक्दउ” भणि बिश्वास अर्याछ भण्न्या पावलले था पायो। 10रे पावलले कला हालिबर भण्यो, “आफना खुट्टामी सिदा कल्ले” पइ यिसो भणन्जेइ त्यो मान्स जुरुक्क उठ्यो रे हिट्ट लाग्यो।
11जब मान्सनले पावलले अर्या तिन कुरणी धेक्यो तब तिननले लुकोनिया जिल्लाको भाषामि इसो भणबर जोरले कला हाल्यो, “देबता मान्सका रुपमि हामरा वाँ ओलीबर आइरइछन।” 12पइ तिननले बारनाबासलाइ जिउस देबता रे पावललाइ हेर्मेस देबता भण्यो क्याकि उन ताँका सन्देश दिन्या मुख्य बक्ता थ्या। 13तब जिउसका पुजारिनले जइको मन्दिर तिनरा सहरकाइ अगाडीतिर थ्यो मुल ढोकामि गोरु रे फुलका माला ल्यायो रे ताँका मान्सनसित मिलिबर बलिदान चढाउन्या इच्छा अर्यो।
14तब छान्या शिष्याले अर्थात बारनाबास रे पावलले यो कुरणी सुण्या पछा तिनन भौत दुःखी भइबर तिननले आफना लत्ता आफइ चिर्यो रे कला हालिबर मान्सनका बिचइनि गया रे भण्यो, 15“होइन, तमन क्याकि इसा कुरणी अरन्छौ? हाम त तमन जसाइ दु:ख सुख भोग्द्या मान्सन हउ रे ब्यर्थका कुरणी बठेइ जिबित परमेश्वरतिर फर्क भणन्या तमनलाइ सुसमाचार सुणाउनाउ, उनले अग्गास, धर्ति, समुद्र रे तिनमि भएका सब चिज बनायो। 16उनले गया समयमि सब पुस्ताका जातिलाइ तिनरा आफन आफनाइ बाटामि हिट्ट दियो। 17पइलगइ उनले सदाइ आफ्नो अस्तित्वको गवाही उनले निका कुरणी बठेइ दियो, जो उन अरन्थ्या। जो कि अग्गास बठेइ बर्सा रे फल लाग्द्या ऋतु दिइबर तमरा निउति खानाइ रे तमरा मनलाइ आनन्दले भरिदियो।” 18पइ यिन कुरणी भणबर तिननले आफलाइ चढाउन्या बलिदानलाइ बडा मुस्किलले रोक्यो।
19पइ एन्टिओखिया सहर रे आइकोनियन सहर बठेइ केइ यहुदि मान्सन ताँ आया रे ताँका मान्सनलाइ उरेइबर पावललाइ ढुङाले हाण्यो रे उन मर्यारइछन सुचिबर उनलाइ सहर बठेइ खड्काइबर बाइर लैया। 20तर जब प्रभुका शिष्या तिनरा वलतिर पलतिर कल्लिया पइ उन उठ्या रे सहर भितर गया रे भोलिबार बारनाबाससित डर्बि सहरतिर लाग्या।
21पावल रे बारनाबासले मान्सनलाइ सुसमाचार सुणाइबर भौत मान्सनलाइ शिष्या बनाइबर पावल रे बारनाबास आफ्ना बाटा होइबर फर्किन्नाथ्या, तिनन आजी लुस्त्रा सहर, आइकोनियन सहर रे पिसिदिया प्रदेसको एन्टिओखिया सहरमि फर्क्या। 22रे शिष्याले हरेक गाउँका मान्सनको मनलाइ बनाउनाइ बिश्वासमि रइरनु पणन्छ भणि साहास दियो, रे भौत दुख कष्ट सइबर हामले परमेश्वरको राज्यमि पस्सु पणन्छ भणबर सिकायो। 23पइ हरेक मण्डलिमि तिनरा निउति मण्डलिका अगुवान नियुक अरिबर उपवास रे प्रार्थना अरिबर तिननलाइ प्रभु येशूलाइ सुम्पिदियो। जइमि तिननले बिश्वास अर्याथ्यो। 24पइ पिसिदिया प्रदेस बठेइ होइबर तिनन पामफिलिया जिल्लामि फर्किबर आया। 25पइ पामफिलिया जिल्लाको पर्गा सहरमि परमेश्वरको बचन प्रचार अर्यो रे तिनन आजी अटालिया सहरमि गया।
26पइ ताँ बठेइ तिनन जहाजमि चडिबर एन्टिओखिया सहरमि गया, जा बठेइ तिननले परमेश्वरको अनुग्रह दिइबर तइ कामकी निउति पठायाथ्यो, जइ काम तिननले पुरा अरबर फर्क्याथ्या। 27तिनन एन्टिओखिया सहरमि पुग्या पछा, तिननले मण्डलिका सब मान्सनलाइ बोलायो। परमेश्वरले तिनन बठेइ कसा कसा काम अर्यो रे उनले गैर-यहुदि मान्सनलाइ लगइ येशू ख्रीष्टमी बिश्वास अद्द्यामि गवाही बनायो, भणबर सब मान्सनलाइ भण्यो। 28पइ पावल रे बारनाबास एन्टिओखिया सहरमि भया मण्डलिका येशू ख्रीष्टका छान्या शिष्यासित भौत दिन बस्या।
Obecnie wybrane:
प्रेरित 14: DTYNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
