२ कोरिन्थी 11
11
पावल रे झुटा छान्या मान्स
1तमन तिननलाइ स्वीकार अरन्छौ जो आफ्नो प्रसंसा आफइ अददाहान, रे म आसा अद्दउ, कि यदि म अलि मुर्ख जसो काम अद्दउ भण्या तमन मलाइ सन्या हौ। 2परमेश्वरले तमनलाइ प्रेम रे हेरचाह अरेइ जसेरि म लगइ अद्दउ। तबइकिलाइ म बाचा अद्दउ कि ख्रीष्टलाइ तमरा एक मान्तर ब्याउलाका रुपमि दिनउ। रे तमनलाइ उनरो पबित्र ब्याउलीका रुपमि दिन चाहानउ। 3तर जसेरि सैतान स्यापका रुपमि आफना चलाकिले पइल्ली आइमाइ हव्वालाइ छल्यो, तसेरि तमरा बिचारले छ्लल्या हो रे तमनले ख्रीष्टको आदरमि आफ्नो पुरा रे सुद्द भक्ति अद्द छाड्डया हौ भणबर मलाइ डर लाग्या छ। 4हामले येशूको बारेमि भण्या, रे तमनले हामरो सुसमाचार ग्रहण अरिबर पबित्र आत्मा पाया। तर तमन अर्खा येशूका बारेमि केइ मान्सनलाइ भणन दिन्छौ। आब तमन अर्खा आत्मा रे अर्खो सुसमाचार ग्रहण अददाइलाइ तयार छौ, तमनले गल्तिले पुरा हृदयले त्यो ग्रहण अर्या। 5यदि तिनन आफइलाइ सब येशू ख्रीष्टका छान्या शिष्य भण्ना महान भया जसो ब्यबहार अददाहान रे काम अददाहान भण्या म लगइ आफलाइ तिनन जसोइ असल सोच्चउ। 6म सिपालु बक्ता नभया लगइ ममि ख्रीष्ट रे सुसमाचारका बारेमि ज्ञान छ। यो मइले सिकाया कुरणीमि हर किसमले मइले तमनलाइ धेकाउनोइ आया छु।
7आफलाइ होच्याइबर तमनलाइ उच्च पाणुँ भणि परमेश्वरको सुसमाचार मइले तमनलाइ सितैमि सुणाउन्ज्या कि मइले पाप अर्या ब? 8म और मण्डलिका सहयोगले तमरो सेवा सित्तैमि अद्द सक्या छु। यइलाइ लुट जन भण! 9तमनसित रन्ज्या जब मलाइ पैसाको अभाब पण्याथ्यो म कसइको बोज भएन, क्याकि माकेडोनिया प्रदेस बठेइ आया भाइनले मेरो अभाब पुरा अरिदियो। तबइकिलाइ कसइ किसमले तमनमि बोज पणलो कि भणबर मइले आफइलाइ रोक्या, रे पछा आउन्या दिनमि लगइ रोक्द्या हु। 10म पक्का छु कि ख्रीष्टको सत्यता ममि छ, रे अखैया प्रदेशका इलाकाका कसइ बठेइ मइले पैसा लइया आथिन, यो मेरो गौरबलाइ कसइले रोक्द सक्दाइन। 11क्याइ मइले तमरो पैसा लयइन? कि मइले तमनलाइ प्रेम नअर्या हुनाले इसो अर्या? परमेश्वर जाण्नाहान कि म तमनलाइ प्रेम अद्दउ। 12म तमनसित सहयोग लिन सक्दइन ताकि म तिननलाइ रोक्द सकु जो हामले परमेश्वरको काम अर्या जसेरि तिननले अददाहान भणि घमण्ड अद्द्या मौका खोज्जाहान।
13क्याकि इसा मान्सन येशू ख्रीष्टका साचो छान्या शिष्या होइन रे छलि काम अद्द्या हुन रे येशू ख्रीष्टका छान्या शिष्याका भेष लिइबर हिट्टया मान्त्तर हुन। 14रे यो केइ अचम्मको कुरणी होइन, क्याकि सैतानले लगइ परमेश्वरको महिमा भया स्वर्गदुतको भेष लिइबर धोका दिनाहान। 15तबइकिलाइ यो केइ अनौठो कुरणी होइन कि तइका दासले लगइ धार्मिकताका दासका रुपमि आफ्नो भेष बदल्लाहान। तिनरो अन्त्य तिनरा काम अन्सार हुन्छ।
पावलका कष्ट
16म आजी भण्नउ, कसइ मान्सले मलाइ मुर्ख जन सम्जउ। तर तमन तसो सम्जन्छौ भण्या लगइ मुर्खलाइ जसेरि मलाइ ग्रहण अर, ताकि म लगइ केइ घमण्ड अद्द सकु। 17मेरो यइ घमण्डका निश्चयमि म प्रभुले बोल्या जसेरि बोल्ल सक्दइन तर मुर्खइ जसेरि बोल्ला छु। 18भौतले यइ संसारका मान्सन जसेरि घमण्ड अर्या हुनाले म लगइ घमण्ड अद्दउ। 19तमन आफइ इति बुद्दिमान भइबर खुसीसित मुर्खलाइ सन्छौ। 20क्याकि यदि कसइ मान्सले तमनलाइ नौकर बनाउछ अथवा तमनलाइ आफ्नो सिकार बनाउछ अथवा तमन बठेइ फाइदा उठाउछ अथवा धाक लाउन्छ अथवा तमनलाइ मुखमि थप्पडी लाउछ भण्या लगइ तमन सब सन्या रइछौ।
21कि तमन सोचन्छौ कि मइले तसो नअर्या हुनाले, म लज्जित छु? तर कसइले केइ कुरणीमि घमण्ड अरन्छ भण्या, म लगइ तिन कुरणीमि घमण्ड अद्दउ। हो, म मुर्खइ जसेरि बोल्ला छु। 22कि तिनन हिब्रु हुन? म लगइ हु। कि तिनन अब्राहामका सन्तान हुन? म लगइ हु। कि तिनन इस्राएल देशका मान्सन हुन? म लगइ हु। 23कि तिनन ख्रीष्टका सेवक हुन? म झिक असल सेवक हु। पागलइ जसेरि म बोल्ला छु। मइले उइका भण्ना बरता परिश्रम अर्या। म उइका भण्ना बरता झेलमि भौत बेर पण्या। अनगिन्ती कोर्रा खाया, बेर बेरि मृत्युका मुखमि पण्या।
24पाँच बेर मइले यहुदि मान्सनका सासकका हात बठेइ उनचालिस कोर्रा खाया। 25तीन बेर मलाइ लठ्ठी हाण्यो, एक बेर भौत ढुङाले हाण्यो। तीन बेर म चडाया जहाज ध्वस्त भयो रे दुब्यो। एक दिन एक रात मइले समुदरमिइ बिताया छु। 26मेरो बारम्बारका यात्रामि म नदिका जोखिममि पण्या, डाँकुका जोखिममि, आफनाइ जातिका मान्सका जोखिममि, गैर-यहुदिका जोखिममि, सहरका जोखिममि, उजाड ठाउँका जोखिममि, समुद्रका जोखिममि रे झुटा भाइन बठेइ आउने जोखिममि। 27भौत परिश्रम अर्या रे कष्ट सया, कति उनिला रातमि, भोक रे तिसमि बेर बेरि भोकमरिमि ठणनी रे नग्नतामि पण्या। 28रे यिन कुरणी बाहेक म सब मण्डलिका बिश्वासीनका बारेमि फिक्री अद्दउ। 29जब कोइ कमजोर छ रे म लगइ कमजोर महसुस अद्दउ। जब कसइलाइ पापले दोर्याउछ रे म ब्याकुल हुनउ।
30मइले गर्व अद्दु पड्डया हो भण्या म आफ्नो कमजोरि धेकाउन्या कुरणीमि गर्व अदद्या हु। 31परमेश्वर, हामरा प्रभु येशूका पिता जो सदासर्वदा धन्यका हुन उन जाण्नाहान कि म ढाट्टइन। 32दमस्कस सहरमि अरितस राजाका हाकिमले मलाइ पकड्डाइ तइ सहरमि पहरा राख्याथ्यो। 33तर तइ सहरका पर्खालका खुल्ला ठाउँमि डालामि राखिबर मलाइ तल्तिर ओलाया हुनाले म हाकिम बठेइ उम्क्या।
Obecnie wybrane:
२ कोरिन्थी 11: DTYNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.