Luke 2
2
Ekuli e Zezi
1Ntini yia ye ecugi nkumu a kasi omon wo acwoli ma Sizare Ongisete#2.1 Ntini yia ya kuli Zan, Sizar ongisete kiigi Nkumu a kasi, ŋaa nde aduga ndi ave asi oteende yila ncie nde eso. 2Bia esi ecomi ba oteende wo bwa. Ŋaa ntini ye cuugi oteende wua, ana maa ma kiigi okunji a bungu wo acwoli ma Kirinise ka Siri. 3Ŋaa oteende wua, mbuuru ŋa mbuuru, aje sa nde kanca kangundu ka kuli nde. 4Ŋaa Zizefu se ciegi bungu le Ngalile, kanca kangundu ka Nazarete, ma kaje Zide, nca bungu le kangundu ka Davide ka acwoli ma Beteleyeme. Kabila nde kiigi mpabigi ye Davide. 5Ma kateende nde bila Mariya, okaazi wo nde wo kaswolo kiigi yiga ŋa yimi. 6Ntini ye kiigi bo ka Beteleyeme ŋaa, antini ma akula Mariya kiigi amito. 7Ŋaa nde kuli mwana nde ocomi, kiigi balaga. Nde vubigi mwana kanca mfa, nde suuzi mwana ma tolo kanca biri ye ba bunuŋa eva. Kabila ebiri kiigi emawa kanca njo ye aka anjia.
Ntuma Njyami miya mpila ancuga eva
8Nca tiniŋa loankulu lia kiigi ŋa ancuga eva. Ba akiigi yira kekinkolo ma kayieze anjyimi a bo ma eva. 9Ŋaa mono ntuma Njyami omon o yulu yi mpila bo, ŋaa lekuma le Njyami lejeniŋi bo, kamaŋi keenini kasi bo. 10Ŋaa ntuma Njyami o yulu ŋa bo ndi: «Lebiza bwogo kamono! Okorogo mi minja mpa be ncia yeemve, ya ye ka kase ka baari aso. 11Lempiibi lelubu kanca kangundu ka Davide, amikula be Ovuzigi, nde kamaka Kristi.#2.11 Kriste, Mesi: Mbuuru o Njyami wo kasuolo ma katuma, nde kamaka nkumu woonini. 12Be leto ŋaa be lemono kaliimi ke eyaa be nde, be leemono mwana wo amavubuga kanca mfa, nca biri ye ba bunuŋa eva.» 13Parabu, bege le antuma a Njyami a yulu ayi baga ntuma oncomi wua, ŋaa bo aso abaani kampa Njyami lekuma, ŋaa bo ndi: 14«Lekuma leka ŋa Njyami ka kara yulu, ŋaa kadusu ka Njyami kayila ncie kaka ŋa baari eli nde ŋa njala bo.»
Ancuga eva baaje Beteleyeme
15Ntini ye nyini antuma a Njyami a yulu bo, ma kavuruga yulu. Ancuga eva akuri oyia ndi: «Lemaya cue Beteleyeme ma kamono jaa le lemiya ka kwa mva lemigi ledugi Njyami o nkumu a bizi a be.» 16Bo ayeni ŋa asisari, ŋaa bo amoni Mariya bila Zizefu, ŋa kapeyi ka mwana, kali ma tolo kanca biri ye eja eva. 17Bo amana mono nde, bo abaani kanaana maami a ntuma Njyami ma ka dugi bo ma mwana wua. 18Ekoli baari aso ba akiigi yuzuga ancuga eva. Ntini ye kiigi naana bo maami maa. 19Ŋaa Mariya kakiele maami maa aso, ŋaa nde kacimiŋa mon kanca otuma nde. 20Ŋaa ancuga eva avurigi ma kakazaga bila ma kampa Njyami leve, ma maami aso ma ayugi bo bila ma moni bo, ŋaa bo amoni ndi sisiele.
Kiza le asi Zezi ncazi
21Amana akula mwana, kayinga kamon kayira, yiga etoyi ntini ye baasa mwana ncazi. Aŋi nde nkuumu ye Zezi, nkuumu ye mpi ntuma Njyami o yulu Mariya eli nde kiigi kini bira yimi ŋi.
Kampa le mwana ŋa Nkumu
22Antini ma kacieze Mariya angiri ato, ma lemigi le ngiri a Nkumu ye ka dugi ŋa Moyize. Zizefu bila Mariya abiri mwana kangundu ka Zerizaleme, ma kampa nde ŋa Njyami. 23Bwa ma kanyima maami maateende kanca angiri a Nkumu: Aka mwana oncomi wua balaga asuuzi nde ma janja le Nkumu, 24Ŋaa ma kampa ambwoŋi: «Akuuna mwele si kali ebuzu ba aminga jyele, mva lemigi leateende kanca ngiri e Nkumu.»
Simiyon mpi Njyami leve ma Zezi
25Ŋaa mono kiigi ŋa balaga lemon ka Zerizaleme nkuumu simiyon. Balaga lia kiigi tele, nde kiigi nyima Njyami, nde kiigi jila mbuuru wo Njyami wo ka aje katuma ma kavuzuga baari ba Ezerayele. Oduduma Santi oli bila nde. 26Ŋaa nde kiigi ma amana kayieze nde ndi, nde akasa akpaa eli nde kini mono Krise ntuma Njyami wo aya vuzuga baari ŋi. 27Nde yi nca njo Njyami, Oduduma Santi tumi nde. Ma ntini yia, taara Zezi bila nguugu abiri nde. Ma kaje bila ma kasa maami ma lemigi le amaateende kanca angiri a Nkumu. 28Ŋaa Simiyon yagi mwana nca jiala e nde, nde mpi Njyami lekuma, ŋaa nde ndi:
29«Nkumu, ŋaa yiga nyina ojanji a we akpaa nca kadusu mva kaadugi we.
30Okorogo miizi a mi amimono ovuzigi.
31Mbuuru a we wo swolo ma baari aso.
32Nde kawii ka ke esa baari aso ma kayaa we. Nde mbuuru we aya mpa lekuma ŋa baari ba Ezerayele.»
33Taara Zezi bila nguugu a nde kiigi nca akimi, ma maami a Simiyon ma kiigi duga bo ma mwana. 34Simiyon obuoni Njyami ma kampa bo puga, ŋaa nde ŋa Mariya ndi: «Ma mwana wu bege le baari ba tamaŋa, bege leevuuga kanca Ezerayele. Nde kamaka njyimi e Njyami eli kuna le baari le ebele nde. 35Ma buni ayaa ecimiŋi ba eka kanca etuma e baari ba akukuna. Ŋaa we wo nguugu a nde amono nkala ma otuma, mva katuba baga le ampele mwele otuma.»
Anaa ampa Njyami leve ma Zezi
36Kiigi ŋa ntuma Njyami wo okaazi se, nkuumu Anaa, mwana Fanuyele wo njo Asere. Nde kiigi yiga nga mbuuru, ŋaa nde kiigi yiga misa esibi ncaami bila olumi a nde, olumi a nde kpi. 37Ŋaa nde siili okuulu, nde kiigi ŋa ekuumu ba esibi mpuomo ŋa ena. Antini aso nde kiigi kaka nca njo Njyami, nde kasa janja le Njyami mpiibi bila muyi. Nde kaka jala bila nde kabwono. 38Anaa bila Simiyon ayi ma tari loanku lia nca njo Njyami, ŋaa bo bakampa Njyami leve. Ŋaa antini aso nde kawobo ma mwana, ŋa baari aso ba akiigi jila ovuzigi wo ka kangundu ka Zerizaleme.
Zezi yeli ka Nazarete
39Ntini ye taara a Zezi bila nguugu a nde ye amani kasa maami maateende kanca angiri a Nkumu. Bo avurugi kangundu ka Nazarete mpila bo, nca bungu le Ngalile. 40Ŋaa mwana yeli, ŋaa nde wami, nde kiigi ŋa ncimi yeenini. Ŋaa Njyami kiigi maalege puga leenini kayila nde.
Zezi nca njo Njyami
41Taara Zezi bila nguugu a nde kiigi ba kaje Zerizaleme esibi eso. Ntini ye kiza le Paake, le ba baraga eciegi ba ankaaga a bo Ezipite. 42Nde kato esibi nkuumu ŋa jyele, bo ayeni bila nde Zerizaleme mva ma lemigi le abaana sa baari a bo akala. 43Kiza lewa bo avurigi. Zezi siili ka Zerizaleme, bo akiyaa biri le siili nde ŋi. 44Bo asi cugu leciina ma njila, bo amono ndi nde li bila baari ba baaje njila mon bila bo. Bo ayiri ma kasaga nde mpila ankwono a bo ŋa andigi. 45Ŋaa bo akimono nde ŋi, bo avurigi Zerizaleme ma kasaga nde. 46Ŋaa cugu le otari, le emoni bo nde nca njo Njyami, nde li manci kakari le ayizigi angiri, nde ayuzuga bo. Ŋaa nde alege bo ejugu. 47Aso ba akiigi yuzuga nde, ekoli bo, ma oyeri bila ekali e nde. 48Taara bila nguugu amono nde, ekoli bo, nguugu ŋa nde ndi: «Mwana mi, we mema sa bizi bwa. Mono bizi a taara we lebaasaga we bila kangwo.» 49Nde kaali ŋa bo ndi: «Be jaa le lesaga mi lema? Be lekiya mini ave mi nki nca njo Taara mi ŋi?» 50Ŋaa bo akiyuga se jaa lemon ŋi.
51Zezi surugi bila bo ma kaje Nazarete, ŋaa nde onyimi bo. Ŋaa nguugu ka kiele maami ma aso kanca otuma. 52Zezi yeli, ŋaa ncimi a nde ya kaselege kaje levuzu, ŋaa nde kiigi ŋa ove ka miizi a Njyami bila a baari.
Obecnie wybrane:
Luke 2: teg
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES