Luke 1
1
Luke aduga kabila bila lemigi leeteende nde buku li
1Ee mbuuru a mi Tofile#1.1. Lekese nca buku leatende ajanja ma asi antuma a Zezi katini kancomi ka oluo omon. (ajanja1.1) , bege le baari asi mpari ma kateende maami a Zezi ma ayiri ka mpanaŋi a bizi. 2Bo ateendi maami ma lemigi le ba amoni ebaani e mon, ŋaa bo ka anaani bizi. Ba amoni baa yiga ankumu ba baampa mbari a Njyami. 3Mi se mana yaa lemigi le kacia ka maami maa kaabaani mon, leekaani mi kateende maami maa se, ŋa mi si bwa ma we wooli mbuuru a mi. 4Mi si bwa, ma buni we yaa ni eyizigi ba ayizigi we ba siele.
Njyami mituma ntuma nde o yulu mpila Zakari
5Ma ntini ye Erode nkumu wo bungu le Zide, kiigi ŋa ojanji a Njyami wo kiigi ŋa nde ambwoŋi, nkuumu Zakari. Nde kiigi nca oju wo ba Abia.#1.5 Lekese nca 1corinthiens 24. 7 - 18. Okari a nde nkuumu kiigi Elisabete, mpabigi Aron. 6Bo aso abuele kiigi tele ka miizi a Njyami ŋaa bo ba ka nyima angiri bila ekele e Nkumu eso, akimono se jaa leebi ma bo ŋi. 7Ŋaa bo kiigi baana onyaŋa, kabila Elisabete kiigi kankuma, ŋaa bo abuele kiigi ekubu.
8Cugu le oju o Zakari kato ma kampa ambwoŋi kanca njo Njyami, ŋaa nde nyuniŋi ma kasa janja. 9Aswoli Zakari ma lemigi le baana sa baari babaampa ambwoŋi kanca njo Nkumu. Nde nyuniŋi nca otuma njo ma kacuga amuomi#1.9 Lekese nca Exode 30. 7-8.. 10Kuna le baari kiigi leli ka njii ma ntini ye akiigi cuga amuomi kayila mbisa. 11Parabu ntuma Njyami omon o yulu oyi mpila Zakari, oki ma otele ma kwogo ka kalumu ka mpaani a mbisa#1.11 Lekese nca Exode 30. 1-6, 1Rois 7. 48.. 12Zakari kamono nde, bwogo boonini osi nde, ŋaa nde ancagi ayeni swaga. 13Ŋaa ntuma Njyami o yulu ŋa nde ndi: «Biza bwogo ka mono, kabila Njyami mi yalaga obuoni a we. Okari a we Elisabete akula we mwana wo balaga, ŋaa nkuumu ye ampa we nde Zan. 14We aje kamono kase bila ove ma mwana yua, ŋaa bege le baari leeka nca kase keenini ma ntini ye baakula nde. 15Okorogo nde aka mbuuru woonini ka miizi a Nkumu. Nde aka nyua mali amburu a vinye, se mali akima ankaala ŋi#1.15 Lekese nca Nombres 6. 3.. Ŋaa mpari Oduduma Santi ye je kasuruga yila nde, keeli nde kini nca muon nguugu a nde. 16Nde aya vuruga bila bege le baana ba Ezerayele mpila Nkumu wo Njyami a bo#1.16 Lekese nca Malachie 2. 6. . 17Ŋaa nde aje kavuzu o Nkumu, bila oduduma ŋa mpari a Eli. Ŋaa nde aya vuzuga ataara bila baana, nde akaala etuma e baari angaa kamba, eka tele. Nde aselege etuma e baari ma eyi e Nkumu.» 18Zakari ŋa ntuma Njyami o yulu ndi: «Mi bunu eya mini siele? Kabila mi mi nkubuga, ŋaa okari a mi yiga ngaa mbuuru.» 19Ntuma Njyami ŋa nde ndi: «Mi Ngambiriyele#1.19 Lekese nca Daniel 8. 16, 9. 21, Liki 1. 26. , mi ndi kavuzu o Njyami ma kasa janja. Mi atuma ma kawobo bila we, ma kampa we ncia yeemve, 20ŋaa we kiyalaga maami ami me dugi we ŋi. Ŋaa ntini eto we amono maami maa, ma bwa we akiriga nkina we aka ma buna kawobo ŋi, tii ntini ye mono we maami maa.»
Baari ba kajila Zakari
21Ntini ye kiigi Zakari nca njo Njyami, baari ba akiigi jila nde ka jii akimi le bigi lesi nde. 22Ntini ye cuugi Zakari, nde kiigi yiga kibuna kawobo ŋi, nde kasa bo anjiimi ma eliemi, yia biri ye yayi bo ndi Njyami mi mweze Zakari kiila nca njo nde.
Elisabete yiga ŋa yimi
23Zakari kamana ecugu e nde e janja kanca njo Njyami, nde vurigi njo nde. 24Amana ntini mon, okari a nde Elisabete biri yimi, nde yizigi nyuru tii angondo ataani, nde aduga ndi: 25«Mono ove ba si Nkumu mi, nde mi cieze mi kabila kaka kiigi mpa mi okuru ka miizi a baari.»
Esizigi ba kakula ka Zezi
26Elisabete kato angondo asiami, Njyami tumi ntuma nde Ngambiriyele nca kangundu kamon ka Ngalile ka acwoli ma Nazerete, 27mpila ocuuma we okaazi wo kini yaa abalaga ŋi, wo nkuumu Mariya. Ocuuma wua kiigi amamana mpa nde ma baala ka mpila balaga le nkuumu Zizefu, mpabigi ye Nkumu wo nkuumu Davide. 28Ntuma Njyami o yulu yeni nca njo mpila mwana okaazi wua, ŋaa nde ŋa ndi: «Mi ebiga we, ma we eli Nkumu ma ampa puga.» 29Ntuma kamana biga Mariya ekoli nde, ŋa nde cimiŋi kanca otuma nde ndi: «Yia sila obigi ma?» 30Ntuma Njyami o yulu ŋa nde ndi: «Biza kabaraga Mariya! Okorogo we mi baga puga ka miizi a Njyami. 31Ŋaa mono, we aje ka baga yimi, we akula mwana wo balaga, ŋaa we ampa nde nkuumu ye Zezi. 32Nde aka mbuuru woonini, ŋaa ba cwolo nde ma Mwana Njyami o nkara yulu. Njyami wo Nkumu ampa nde onkani ba nkaaga nde Davide. 33Nde aka Nkumu wo obu obu ma baari ba Ezerayele, ŋaa onkumu o nde bo kawa ŋi#1.33 Lekese nca 2Samuel 7. 12, 13, 16. Esaie 9. 6, Daniel 7. 14..» 34Mariya ŋa ntuma Njyami o yulu ndi: «Ŋaa mi yimi lia bunu le ya, mi ti nkini yaa abalaga ŋi?» 35Ntuma Njyami akaala ŋa nde ndi: «Oduduma Santi aya yila we, ŋaa mpari a Njyami o yulu ye ya yila we, yo ye wuga we mva kayiini. Ma buni mwana ocece we akula we wua, ba acwolo nde ma Mwana Njyami. 36Ŋaa mono, Elizabete wo mbuuru a nkwono we, mi bira yimi kayila okubu, ŋaa mwana balaga. Nde we acwoli ma kankuma, yiga angondo asiami. 37Okorogo, jaa ye akwono Njyami onyaŋa#1.37 Lekese nca Genese 18. 14..» 38Mariya ndi: «Mi mi mpa nyuru a mi ŋa we Nkumu, ŋaa sa maami ma lemigi le dugi we.» Ŋaa ntuma Njyami o yulu vurigi.
Mariya yeni mono Elisabete
39Kanca ecugu joankulu bia, Mariya ciegi Nazarete yeni ŋa asisari ma kacu ka angaala, nca bungu le Zide. 40Ntini ye toyi nde nca njo Zakari nde bigi Elisabete. 41Ŋa eyugi ba Elisabete obigi wo Mariya, mwana wooli ma muon nde, nyigi, mpari Oduduma Santi eyi yila nde. 42Nde wobi nkala nkala ndi: «Njyami ma ampa we ovuma kabila we vuli akaazi aso, ŋaa nde se mi mpa mwana wooli ma muon we puga. 43Mi na, eli nguugu a Nkumu mi ya mono mi? 44Ŋaa mono, parabu kabigi we mi ŋa, ŋaa eto acu a mi mwana wooli ma muon mi, nyigi. 45We li nca ovuma, we oyaligi maami ma adugi Nkumu we, mon ma aje kaya.»
Luumu le Mariya
46Ŋaa Mariya ndi#1.46 Lekese nca 1Samuel 2. 1- 10.:
«Mi ekusa Nkumu ma onini o nde.
47Mi esuere ma Njyami wo vuzuga mi. 48Nde ma kese mi bila nya, mi wo ojanji nde, mbuuru wo oca#1.48 Lekese nca 1Samuel 1. 11,
ŋaa mono yiga eca eso be duga ndi mi ŋa sala.
49Kabila Njyami a mpari mi sa mi maami maave, nde Njyami ocece.
50Ŋaa nkene nde eli kayila eca ŋa eca, kayila ba ba nyiima nde.
51Ma mpari a nde, nde maasa maami maanini, nde ma cala baali nca etuma ebo ŋa ecimiŋi ba kamba.
52Nde mi kaala enonon kayila ambara a bo, ŋaa nde mi kusa baa abaaka nca mpasi#1.52 Lekese nca Job 5. 11, 12. 19..
53Nde mi mpa baa abaaka ŋa njala, biibi beeve ekukuna, ŋaa nde mi cuta angaa kabaga jiala onyaŋa.
54Nde mi vuzuga Ezerayele, ajanji a nde, ŋaa nde mi baraga ndagi a nde ye kasi bo, ŋaa nde mi sa bo jaa leeve.
55Ma lemigi le dugi nde ŋa ankaaga a bizi a be, ma Abraame bila ampabigi a nde obu obu.»
56Mariya si nkali angondo atari bila Elisabete, amana nde vurugi mpila nde.
Ekuli e Zan Batise
57Ntini ye ekula Elisabete eto, ŋaa nde kuli mwana wo balaga. 58Abuga ba kiigi ka mpaani a nde bila nkuono nde ayugi ndi Nkumu kiigi ma mono nde nkene, ŋaa bo aswori bila nde. 59Cugu le ompuomon bo akeri mwana #1.59 Lekese nca Levitiques 12. 3. ŋaa bo asagi mpa mwana nkuumu a taara nde Zakari. 60Ŋaa nguugu a nde yagi mbari, ŋaa nde ndi: «Kali, acwolo nde ma Zan.» 61Bo ŋa nde ndi: «Okorogo se mbuuru omon nca nkwono we, ngaa nkuumu yia kali.» 62Ŋaa bo asi taara anjiimi ma kaya osumbu wo ba acwolo nde. 63Zakari laayi kampaja ma kateende ndi: «Nkuumu a nde Zan.» Iiin! Ŋaa ekoli baari aso. 64Kancinci ŋa, Zakari jui leyi vuruga, nde baani ka seme Njyami nkala nkala. 65Baari aso ba tiniŋa lia a moni kamaŋi, ŋa ba ka wobo ma maami maa nca angaala a Zide aso. 66Aso ba akiigi yuga maami maa akieli mon nca etuma e bo, ŋaa yiga ba aduga ndi: «Mwana wua bunu kaje kaka? Ee, jaajaa Nkumu li bila nde.»
Luumu le Zakari
67Ŋaa Oduduma Santi mpi taara mwana mpari. Nde kawobo maami ma kiigi duga oduduma nde.
68Ndi:
«Lekuma leka ŋa Nkumu, Njyami a Ezerayele, ma lemigi leyi kese nde baari a nde bila leyi vuzuga nde bo.
69Ŋaa nde mituma bizi a be ovuzigi woonini kanca njo Davide wo nkumu, wo ojanji a nde.
70Mva lemigi le edugi nde ŋa antuma a nde ayiele ma ntini ye kala, ndi,
71Wo aya vuzuga bizi a be kanca alogi bila kacieze le bizi a be nca jiala e baa ma abele bizi a be!»
72Ŋaa ma bwa nde mwezi nkene nde ma ankaaga a bizi a be, ŋaa nde kini abaraga ndagi a nde e yiele ye kasi ma bo.
73Mva okezi wo labi Njyami kayila nkaaga bizi a be Abraame ma ondigi o bo#1.73 Lekese nca Genese 22. 16-17. .
74Nde legi ndagi ndi nde avuzuga bizi a be nca jiala ba alogi, ma buni bizi a be lesa janja le nde, ŋaa lebiza bwogo kamono.
75Ma kaka tele bila onyiimi ka miizi a Njyami ecugu eso ba omuon o bizi a be.
76Zakari vuri dugi ndi: «Ŋaa we wo mwana mi, ba acwolo we ma ntuma Njyami o nkara yulu.
Kabila we aje kaka kavuzu o Nkumu ma kaselege etuma e baari ba baajila nde#1.76 Lekese nca Malachie 3. 1..
77Mono maami ma aduga we ŋa baari a nde, ma buni bo ayaa ndi Njyami avuzuga bo, ŋaa nde abologo maami maabi a bo.
78Njyami a bizi a be ŋa nkene yeenini bila kadusu, nde alege kawaa ka yulu kayila bizi a be, mva kakieme muyi wo enciere.
79Ŋaa kawaa koankulu kia ke ekieme kayila baali nca lempiibi, bila baali ŋa bwogo ba leku, ma kabira bizi a be nca njila ye kadusu#1.79 Lekese nca Esaie 9. 1..»
80Ŋi Zan kayele, ŋaa nde kawama tii nca ecimiŋi e nde, ŋaa nde yiga nde otu nca biri eli baari kali, tii cugu lebaani nde kampa mbari a Njyami kanca Ezerayele.
Obecnie wybrane:
Luke 1: teg
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES