PATADA 9
9
Kaloʼe pai katengo
9:1-18
1Kaloʼe mawangu banua pai napatoa nononya papitu. 2Roo nasambale pinatuwu anu da napake mosusa, napasilolongani ue anggoro pai napatoka pangkoni. 3Waʼa mbeʼa toporioko napokau njoʼu meboo-boo ri kandatekanya ri raya ngkota, 4“Isema anu bareʼe gana pangaincaninya, ndipalai maʼi!” Ri anu bareʼe gana loʼenya, loʼe ndaya mangantoʼo, 5“Ndikamaʼimo mangkoni pangkoniku pai mampeinu anggoro anu roo kupatoka. 6Palaika katengo da naka madago katuwumu. Lulumo jaya ntau loʼe.”
7Tau anu bareʼe napokono ndapaguru nutujuka kasalanya, siko da napopogeleka. Ane tau majaʼa nupokarau, siko da napepepara. 8Neʼe nuposari tau anu bareʼe napokono nupaguru maka da napobanciika siko. Paikanya ane tau anu loʼe nutujuka kasalanya, da natubunaka siko. 9Ane tau anu loʼe nupatujuki, siʼa da teranganimo kaloʼenya. Pai ane tau anu mepoʼinaya ri Pue Ala nupaguru, da teranganimo pangaincaninya.
10 #
Ayu. 28:28, Pol. 111:10, Pat. 1:7 Da naka mewali tau loʼe, riu-riunya tau setu da lau petubunakanya pai pampokaeka i Pue. Ane nuincani Anu Magali siko da mangarata parata ndaya. 11Kaloʼe ndaya inceʼe da mawaika siko karate ntinuwu. 12Ane nupotumpu kaloʼe, siko ngkaliomu da morasi. Paikanya ane bareʼe nupokono kaloʼe, siko ngkaliomu seʼe anu napakarugi. 13Katengo inceʼe da ewa weʼa anu sondo engko, bereʼe pangaincaninya pai bareʼe naincani maea mata. 14Kareʼenya da ri wombo banuanya bara ri baa-baa ngkota. 15Ungka njairia da napampeboo tau anu moliu. Tau anu mayoa rayanya da nakanarasi, natoʼo, 16“Ndipebia ireʼi, komi anu bareʼepa gana pangaincanimi!” Pai ri waʼa ntau tengo da natoʼoka, 17“Ue anu ndapelima momi nyaminya, pai mangkoni ndapesambunika meruu ngkawonginya.” 18Waʼa ntau anu mewali sinokonya setu bareʼe naincani kapura-puranya tau anu njoʼu madadu siʼa, paka mate njairia; pai tau anu mesuamo ri banuanya, wawaseʼi reʼemo ri kareʼe ntau mate.
