PATADA 6
6
Waʼa mpatada anu ntaninya
6:1-19
1Ee anaku, boi tau anu nupojanjika da mangkoyo indanya. 2Boi natoliamo waʼa mpaumu ngkaliomu siko pai naka manawu ri janjimu ngkaliomu. 3Ane monco ewanceʼe anaku, kamonconya siko nakuasaimo ntau setu. Paikanya ewaseʼi jaya da kalapamu: ronga njoʼu dadu tau setu; da nupari-pari kamperapi ri tau setu da naka nalapasaka siko. 4Neʼe njoʼu yore riunya, neʼepa meosa. 5Lapasaka koromu ungka ri patambo setu, da ewa tonci bara lagiwa anu malapasaka koronya ungka ri topangela.
6Tau anu malose sangaya-ngaya da napeole pai da meguru ri katuwu onti. 7Onti bereʼe tadulakonya, bereʼe anu mancongka pai majagai, 8paikanya sangkasae tempo mpomota tau seʼe mampasambaka pangkoni anu da nakoni ri tempo ngkaoro. 9Ara masaepa da kayore ntau malose setu? Impia nepa da membangu? 10#Pat. 24:33-34 Siʼa da motunda-tunda mancoko-ncoko koro mododongoro, maka natoʼo, “Oo da kuyore woʼu sambinoro, yuru mataku.” 11Paikanya ri sindara ngkayorenya setu siʼa napere ngkakura pai kakaasi-asi anu rata ewa topojampa mangkeni penai.
12Tau majaʼa pai baleparu mamponteesika mbamba ri mbeʼi-mbeʼi. 13Nakindebaka kirenya mewali petondoni da napawianaka lopu. 14Nawa-nawanya anu majaʼa buke pai tinako ndaya jaʼa anu mampapebete popaiso ri mbeʼi-mbeʼi. 15Pura-pura setu da mampareʼe karugi anu mampere koronya ri kabareʼenya nasoro-soro, painaka siʼa malesa mpaliu.
16-19Reʼe papitu ngaya anu ndapobanciika i mPue pai bareʼe da ndapapaliuka:
Poʼengko anu makiunde,
nguju anu kalopu-lopu,
pale anu mampepate tau anu bemasala,
nawa-nawa anu marencana anu majaʼa,
witi anu ganggara malai mowia jaʼa,
sabi anu kambamba-mbamba
pai tau anu mampapebete popaiso ri oyo ngkasiyununya.
Patiendo kono posalara
6:20–7:5
20Anaku, wianakamo nunjaa anu nasongkaka siko mpapamu, pai neʼe nukalingani waʼa mpatuju inemu. 21Neʼe nukalingani waʼa mpau ntau seʼe, da nuparindaya pura-pura. 22Waʼa pompaguru ntau seʼe da mamponinika siko ri raya mpelinjamu, inceʼe da majagai siko ri wengi pai da mantotoraka siko ane membangumo. 23Waʼa mpatada ntau tuʼamu da ewa silo anu merara; peseko ntau seʼe da mantujuka siko jaya ngkatuwu anu monco. 24Ane ewanceʼe siko da tetawanaka ungka ri waʼa mbeʼa wongo, pai ungka ri pekanarasi rongo ntau ntaninya. 25Neʼe boi lalio rayamu ua kadolidi ntau seʼe, neʼe boi tenoʼo rayamu mangkita napampobuyuruka matanya ri siko. 26Weʼa wongo olinya podo ewa oli ngkinaʼa santabo, paikanya mosalara pai rongo ntau ntaninya inceʼe inosa bayarinya.
27Ara nakoto ntau masoko apu pai bareʼe da wara bajunya? 28Ara nakoto ntau mayojosi waa apu pai bareʼe da maloncu witinya? 29Inceʼe siwia pai mampowongo-wongoka rongo ntau ntaninya. Isema anu mawianaka inceʼe bareʼe da lapa ungka ri popahuku. 30Ane tau mampelima pangkoni, mau ua kamaoronya, siʼa da ndapetikodi. 31Pai ane ndasoko siʼa sangaya-ngaya da nabayari pitu ngkani karia olinya; mamponcuruka inceʼe da pura aga-aganya. 32Paikanya ewambeʼi pai tuama anu mosalara? Siʼa majaʼati koronya ngkalionya! Maʼai kojo katengonya! 33Siʼa da ndajeani pai ndapasinggiri. Toʼonya da majaʼamo rantani masae-sae. 34Maka ua powianya setu, langkai mbeʼa setu da tumopo, painaka da mesongke kajaʼa ndayanya. Pai ane natima wela mpesawa manoto bareʼe da reʼe purundayanya. 35Bareʼe napokono da ndakanarasika doi; mau bara nunjaa ndawaika bareʼe da manturu karau ndayanya.
