PATADA 4
4
Rasi anu ndarata ungka ri kaloʼe ndaya
4:1-27
1Ee waʼa ana ndipedongeka patuju waʼa mpapami! Parindaya incetu, siko da mewali tau anu loʼe. 2Anu kupaguruka siko seʼi madago, inceʼe painaka neʼe nupesaru-saru. 3Ri ntongo kodi-kodipa yaku, yaku podo ngkalioku ana mpapaku pai ineku, 4yaku ndapaguru mpapaku, ndatoʼo, “Neʼe nukalingani waʼa mpatujuku, neʼe kojo boi nukalingani. Wianakamo waʼa ntotoraka da naka dago katuwumu. 5Pewalimo tau loʼe pai pakaila nawa-nawamu! Da nuendo-endo waʼa mpatujuku pai neʼe nunawu ri tana.” 6Da nutubunaka loʼe ndaya, maka inceʼe anu mantatondoi siko; da nupomawo maka inceʼe da majagai siko naka uono mpaliu. 7Anu kaʼisa anu sangaya-ngaya da nuwianaka inceʼemo: mompari-mpari da mewali tau anu loʼe. Maria ngaya anu nupodaraya, paikanya anu da nupariwawo inceʼemo da nuparata kanoto ndaya. 8Loʼe ndaya inceʼe anu da nupariwawo da naka tetanderaka siko. Da nukekeni maroso, maka inceʼe anu mampakatetubunaka siko. 9Siʼa anu da mawaika siko sese anu meawa mewali makotamu.
10Pedongeka pauku anaku! Parindaya mpodago waʼa mpatujuku, da naka marate tinuwumu. 11Roomo kupaguruka siko loʼe anu mantujuka siko jaya ngkatuwu anu monco. 12Ane ewanceʼe katuwumu, bareʼe da reʼe salemporinya ri pelinjamu, pai bareʼe da torarambe mau sindara mpolonco. 13Endo-endo mpaliu pegurumu anu roo nutarima ungka ri yaku. Porewu mpodago inceʼe, maka ungka njairia da nuparata katuwu. 14Neʼe nululu engko ngkatuwu ntau majaʼa, pai neʼe nusue powia ntau seʼe. 15Neʼe boi nuposaleka tau seʼe. Tilawangi tau seʼe pai pelinja mpaliu siko! 16Tau anu majaʼa bareʼe da naleʼo yore ane bareʼepa napowia anu majaʼa. Tau seʼe bareʼe da yuru matanya ane bareʼepa napakarugi tau ntaninya. 17Kajaʼa pai kamasii ewa pangkoni anu mawongi ri tau seʼe.
18-19Jaya ntau anu majaʼa wani ewa kamaeta mbengi. Tau seʼe da torarambe pai da tedungka bareʼe nasoro-soro. Paikanya jaya anu napoliu ntau madago da ewa pebete ndeme; kakomasae-sae kakomareme-reme, rantani yosamo mpodago.
20Pedongeka waʼa mpauku, anaku! Pedongeka waʼa mpatujuku. 21Neʼe boi nunawu ri tana paikanya parindaya. 22Tau anu marata ndaya da tuwu pai da madonde rayanya. 23Jagai mpodago rayamu, maka rayamu inceʼe anu mampakanoto jaya ngkatuwumu. 24Neʼe kojo boi nupasowa waʼa mpau anu bareʼe monco. Tilawangi waʼa mpau mbamba pai waʼa mpau anu mantinakondaya da karugi yunu. 25Da tongawa ri liomu ewambeʼi kayoa ndayamu; neʼe nupowia engko ntopokira-kira. 26#Ib. 12:13 Nawa-nawa mpodago nunjaa anu da nupowia, da naka reʼe powuanya waʼa anu nupotetalaka. 27Tilawangi anu majaʼa, katuwumo ri kayoa ndaya. Neʼe boi mebia ungka ri jaya anu monco.
