PAIMBA 22
22
I Mokole nto Moabi mampeboo i Bila
22:1-21
1Ungka lairia malai woʼu to Isaraeli nepa mokema ri rato Moabi, ri daera sambote ngKoro Yarade, mosu kota Yeriko.
2-3Butu nadonge i Bala ana i Sipori mokole nto Moabi, ewambeʼi napampowia nto Isaraeli to Amori, pai to Isaraeli setu maʼai ngkasondonya, painaka meratamo eka ndayanya sangkani pai waʼa mpalilinya. 4Natoʼo nto Moabi ri waʼa ntadulako nto Mijea, “Bareʼemo masae waʼa gerombola setu da mampapurasi waʼa anu mantolilimi kita da ewa japi mampapurasi ewo ri pada.” Inceʼe painaka i Mokole Bala, 5#2 Ptr. 2:15-16, Yud. 11 mampokau tau njoʼu mampeboo i Bila, ana i Beori, tau anu maroo-roo i kota Petoro mosu ri Koro Eparata ri daera Emau. Tau seʼe napokau i Bala da mamparata patuu ewaseʼi, “Da nupaincani reʼe sambaʼa banca anu rata ungka ri tana Masiri; waʼa ntau setu maʼai kasondonya pai tikalimo da maungku tana mami. 6Tau seʼe meruu karosonya pai kami. Mewali maʼimo! Tadeasi kaku tau seʼe. Bara da kakoto manangi tau seʼe pai da mangairi tau seʼe ungka ri tana seʼi. Maka kupoaya monco kojo, tau anu nudonco da marata rasi, pai tau anu nutadeasi da marata rugi.”
7Ungka lairia njoʼumo kojo waʼa ntadulako nto Moabi pai to Mijea setu mangkenika i Bila saronya da napampokono mantadeasi to Isaraeli. Butu jela ri banua i Bila, naparatamo ntau seʼe ri siʼa patuu i Mokole Bala. 8Natoʼo i Bila ri tau seʼe, “Ndikasambengimo ireʼi. Iraneo nepa da kutoʼoka komi nunjaa anu ndatoʼo i mPue ri yaku.” Sambengimo kojo ri banua i Bila waʼa ntadulako nto Moabi setu.
9Ungka lairia jela i Pue Ala ri Bila, mampeoasi, “Isema waʼa ntau anu sambengi ri banuamu Bila?”
10Mesono i Bila natoʼo, “Tau seʼe pomokau i Mokole Bala ungka ri Moabi, maʼi mampetumbu bambari, 11kono kareʼenya sambaʼa banca ungka ri tana Masiri, banca setu junjukumo ri tana ntau seʼe. I Mokole Bala mampokau yaku da mantadeasi banca setu, da naka nakoto mampoʼiwalika pai mairi tau seʼe.”
12Ndatoʼo i mPue Ala ri Bila, “Neʼe njoʼu siko simpoyunu pai waʼa ntau setu, pai neʼe nutadeasi banca setu, maka tau seʼe roomo Kudonco.”
13Bangke reme mowuro-wuro natoʼo i Bila ri waʼa ntau anu napokau i Bala setu, “Ndipewalilimo, bareʼe ndawai i mPue yaku da njoʼu pai komi.” 14Mewalilimo tau seʼe ri Bala, mampetumbuka siʼa, i Bila bareʼe napokono maʼi sangkani-ngkani pai tau seʼe.
15Nepa napokau i Bala sangkasodonya woʼu tau pai anu ri wawo woʼu lantinya pai anu napokau kaʼisa. 16Naparata ntau seʼe patuu i Bala rata ri Bila ewaseʼi, “Kuperapi kojo ri kamonco-monconya: maʼimo neʼe boi bareʼe nupokono. 17Yaku da mawaika siko saromu anu maria kojo, pai da kuwianaka nunjaa ntano anu nutoʼo. Maʼimo, pai tadeasi kaku banca setu.”
18Paikanya mesono i Bila natoʼo, “Mau rapanya pura-pura salaka pai wuyawa anu reʼe ri langkanae i Mokole Bala, nawaika yaku, bareʼe da kutaha malewa songka i mPue, Pue Ala anu kupanyomba. Mau podo ri anu kodi-kodi ntano bareʼe kukoto mangaewa. 19Paikanya moruana ndikasambangimo ireʼi, ewa waʼa ntau seʼe anu ndapokau riunya. Maka da rayaku mangaincani boi da reʼepa anu da ndatoʼo i mPue ri yaku.”
20Ri wengi setu jela i Pue ri Bila, ndatoʼo, “Waʼa ntau setu rata masale siko da njoʼu sangkani-ngkani pai tau seʼe. Mewali pompatikalimo da njoʼu. Paikanya podo anu kusongkaka siko anu da nupowia.” 21Bangke reme napataka i Bila lampi ngkalidenya, nepa malai pai waʼa ntadulako nto Moabi setu.
I Bila pai kalidenya
22:22-35
22Paikanya butu tepalaimo i Bila, maraumo raya i mPue Ala. Sindara mpelinja ngkalide anu napelamba i Bila natonda-tonda anagurunya radua, mekakore malaeka i mPue ri tongo njaya mayawati siʼa. 23Mangkita malaeka mekakore njairia seʼi mamporande-randeka penai, mesepi kalide setu ungka ri jaya, mebia ri jamaa. Natabasi i Bila kalide setu nepa nanoʼo muni ri jaya. 24Ungka lairia mekakore woʼu malaeka i mPue setu ri kakopi njaya ri oyo radua bonde anggoro anu ndawayaka watu mpotimali-mali. 25Pangkita ngkalide malaeka i mPue setu, metaimpi kalide setu ri puʼu mbaya watu, painaka umpii witi witi i Bila ri watu. Painaka natabasi woʼu i Bila kalide setu. 26Nepa melimba malaeka i mPue setu mekakore ri jaya anu maʼai woʼu kakopinya, painaka bareʼemo reʼe kasoanya ri kaii pai ri kananya. 27Mangkita malaeka i mPue, painaka moyukumo kalide setu. Masengkemo raya i Bila, painaka nawomboka toko kalide setu. 28Nepa ndapapompau i mPue kalide setu. Natoʼo mpinatuwu setu ri Bila, “Ara nunjaa anu kupowiaka komi, painaka tatogo ngkanimo pue ndiwombo yaku?”
29Mesono i Bila natoʼo, “Siko mampowosaka yaku! Ane da reʼe penaiku, manoto da kupepate siko!”
30Mesono kalide natoʼo, “Ara banya yaku seʼi kalidemi anu masaemo ndipampepelamba? Ara reʼe peewaku ri komi?”
Mesono i Bila natoʼo, “Bepareʼe.”
31Nepa ndapapakitaka i mPue ri Bila malaeka anu mekakore njairia mamporande-randeka penai. Liu-liu mambukotu manyomba i Bila. 32Meoasi malaeka i mPue natoʼo, “Ara wenu painaka tatogo ngkanimo nuwombo kalidemu? Yaku rata maʼi mangayawati siko, maka malulu parata ndayaku, bareʼe madago njoʼu siko. 33Ri pangkita ngkalidemu yaku tatogo ngkanimo siʼa mepampanaka. Maka ane bareʼe, manoto roomo kupepate siko, paikanya kalide setu da kulapa.”
34Mesono i Bila natoʼo, “Masalaamo yaku. Bareʼe kuincani kanjaunya komi mekakore ri tongo njaya mayawa yaku. Paikanya seʼi-seʼi ane nditoʼo bareʼe maya da kupaliu pelinjaku seʼi, sangaya-ngaya da kumewalili.”
35Paikanya natoʼo malaeka i mPue setu, “Akomo njoʼu sangkani-ngkani pai waʼa ntau setu. Paikanya siko podo maya mangantoʼo, nunjaa anu kupokau da nutoʼo.” Napaliumo i Bila pelinjanya sangkani-ngkani pai waʼa mpomokau i Bala setu.
I Bala mangantomu i Bila
22:36-40
36Butu nadonge i Bala kajela i Bila, njoʼumo siʼa mantomu ri kota Moabi, anu njau ri wingke ngKoro Arino, ri tida ntana Moabi. 37Natoʼo i Bala ri Bila, “Ara wenu painaka bareʼe jela siko ri pampebooku anu kaʼisa ngkaninya? Ara nusarumaka bareʼe da kukoto mabayari saromu?”
38Mesono i Bila natoʼo, “Mewali, seʼi-seʼi jelamo yaku. Paikanya yaku bareʼe maya mangantoʼo pau nunjaa ntano, podo pau anu ndapokau i mPue Ala anu da kutoʼo.” 39Malaimo kojo i Bala pai Bila njoʼu ri kota Huso. 40Njairia napanyombaka i Bala bara tesangkuja mbaʼa japi pai bimba. Sanga mpinatuwu setu santila nawaika i Bila pai waʼa ntadulako anu mayunu pai siʼa.
I Bila mantoʼo watinya anu kaʼisa
22:41–23:12
41Bangke reme napoyunumo i Bala i Bila mandake ri buyu Bamoti Baali. Ungka ndatiria da napampetiro i Bila santila to Isaraeli.
