PAIMBA 1
1
Paimba to Isaraeli anu kaʼisa
1:1-54
1 #
Pai. 26:1-51
Ri sambaʼa eo mbuya anu karadua ntaʼunyamo pampalaika nto Isaraeli tana Masiri, ndatoʼo i mPue ri Musa, ri raya ngKema i mPue ri pada bone Sinai, ewaseʼi, 2“Siko pai Haruni da maimba waʼa nto Isaraeli santina pai santina seʼe. Da nudedewakamo ri sura toʼo waʼa ntuama pura-pura. 3Montepuʼu ungka ri anu ruampuyu ntaʼu tinuwunya anu mangkotomo da mewali suradado. Toʼo ntau seʼe da ndiʼuki malulu posuncunya santina-santina seʼe. 4Ungka ri sambaʼa-sambaʼa lemba perapimo sambaʼa tadulako anu da mantulungi komi.” 5-16Seʼimo toʼo waʼa ntau anu ndapilisi da mangkadudungi i Musa pai Haruni pai anu da mantadulakoni salemba-salemba seʼe:
| LEMBA | TADULAKO |
|---|---|
| Rube | Elisuri ana i Ncedeuri |
| Simeo | Selumieli ana i Ncurisadai |
| Yahuda | Nahaso ana i Aminada |
| Isakari | Netaneeli ana i Ncuari |
| Sebulo | Eliabi ana i Helo |
| Eparai | Elisama ana i Amihu |
| Manase | Gamalieli ana i Mpedasuri |
| Menyami | Abidani ana i Gideoni |
| Daa | Ahieseri ana i Amisadai |
| Asere | Pegieli ana i Okorani |
| Gati | Eliasa ana i Rehueli |
| Natali | Ahira ana i Enani |
17Sampuyu pai radua tau seʼi anu mantulungi i Musa pai Haruni, 18mampasambaka waʼa nto Isaraeli ri sambaʼa eo mbuya karadua, nepa napaposuncu anu mampomulika tau seʼe sambaʼa-sambaʼa lemba seʼe. Pura-pura toʼo ntuama tinuwu ruampuyu ntaʼu waindeku ndaimba pai ndaʼuki, 19malulu songka i mPue. Inceʼe nawianaka i Musa ri pada bone Sinai. 20-46Waʼa ntuama anu tinuwu ruampuyu ntaʼu waindeku anu mangkotomo da mewali surodado, ndaʼuki toʼonya malulu posuncunya salemba-salemba, montepuʼu ungka ri Rube, ana uyue i Yako nakarataka ri Natali. Ewaseʼi kasondo imbanya:
| LEMBA | TADULAKO IMBA NTAU |
|---|---|
| Rube | 46.500 |
| Simeo | 59.300 |
| Gati | 45.650 |
| Yahuda | 74.600 |
| Isakari | 54.400 |
| Sebulo | 57.400 |
| Eparai | 40.500 |
| Manase | 32.200 |
| Benyami | 35.400 |
| Daa | 62.700 |
| Asere | 41.500 |
| Natali | 53.400 |
| poromunya pura-pura: | 603.550 |
47Waʼa nto Lewi bareʼe ndaʼuki sangkani-ngkani pai waʼa lemba ntaninya, 48maka roomo ndatoʼo i mPue ri Musa, 49“Ri tempo mpaʼukimu waʼa ntau anu mangkoto da mewali surodado, to Lewi neʼe nuʼuki. 50Pokau tau seʼe mampasilolongani Kemaku sangkani pai waʼa mparewanya. Tetala ntau seʼe inceʼemo da mampasaʼa Kemaku sangkani pai waʼa mparewanya pai mampasilolongani. Tau seʼe sangaya-ngaya da mokema mantolilimi Kemaku. 51Ane da melimba komi, waʼa nto Lewi setu anu da mangarongkasi Kemaku, pai da mampataka muni ane jela ri kareʼe mpokemami anu dawoʼu. Tau ntaninya bareʼe maya mantimosuki Kemaku, maka isema anu mantimosuki da ndapepate. 52Waʼa nto Isaraeli anu ntaninya da mawangu kemanya, salemba-salemba seʼe da tepatani. Kema ntau seʼe da mantolilimi banderanya sambaʼa-sambaʼa lemba seʼe. 53Paikanya waʼa nto Lewi da mawangu kemanya mantolilimi Kemaku. Tau seʼe da mangajagai naka neʼe reʼe tau anu mantimosuki, baoi da marau rayaku painaka da kuhuku to Isaraeli.” 54Nawianaka nto Isaraeli wuwunya anu songka i mPue ri Musa.
