YOSUA 2
2
I Yosua mampokau tau njoʼu padaso ri Yeriko
2:1-24
1 #
Ib. 11:31, Yak. 2:25 Ungkalairia, ungka ri kareʼe mpokema nto Isaraeli ri Sitimi, napokau i Yosua radua tau njoʼu padaso ri Kanaʼa. Tau radua setu nasongka da njoʼu mamparesa tana Kanaʼa, kanjoʼu ntau seʼe da mesasambuni, anu kaʼisa da napadasoki ntau seʼe inceʼemo kota Yeriko. Njoʼumo kojo tau radua setu ri kota Yeriko, tau seʼe melinggona ri banua sambaʼa weʼa anu bareʼe tumoro, toʼonya i Rahabu. 2Nadongemo i mokole ngkota Yeriko kareʼenya to Isaraeli anu maʼi padaso ri wengi setu ri kota Yeriko. 3Napokau i mokole tau njoʼu madadu i Rahabu mamparata songka i mokole ewaseʼi, “Papesuwu waʼa ntau anu reʼe sambengi ri banuamu seʼi. Tau seʼe inceʼemo waʼa ntau padaso anu rata mamparesa samalele daera Yeriko!”
4-6Mesono i Rahabu, “Lawi reʼe tau anu rata ri banuaku, paikanya bareʼe kuincani bara ungka ri mbeʼi kamaʼinya. Sangkarupu ngena tau seʼe payamo ri kabareʼepanya ndadampo baa-baa ngkota. Pai bareʼe kupeoasi ri mbeʼi kanjoʼunya, paikanya ane maliga-liga ndaluluwaka kuepe-epe ntongo da ndaratapa.” (Ntanoka tau radua setu roo nasambunika i Rahabu, nakaʼuwika deami ri wumbu banuanya.)
7Malaimo waʼa ntau anu napokau i mokole njoʼu ri sambaliku ngkota. Pesuwu ntau seʼe nadampo muni baa-baa ngkota setu. Napepali ntau seʼe tau radua anu padaso setu rantani rata ri kareʼe mpowote i Koro Yarade.
8Ri wengi setu ri kabareʼepanya tekayore to Isaraeli radua anu padaso setu, mepone i Rahabu ri wumbu, 9natoʼoka tau radua setu, “Kuincani i Pue mampepombaikamo tana seʼi ri komi. Pura-pura tau ireʼi mampokaeka komi. 10#Pa. 14:21, Pai. 21:21-35 Kadongemo ewambeʼi kuasa i mPue anu mampakangau Tasi Mawaa ri suarami, ri tempo mpalaimi ungka ri tana Masiri. Kadonge woʼu ewambeʼi ndipampepate i Siho pai Ogo tau radua setu mokole nto Amori ri tondo pebetea ngKoro Yarade. 11Ri padonge mami waʼa bambari setu maeka mpodago raya mami. Pura-pura waʼa mpomakoje mami merata ekanya ri komi. I Pue Ala puemi monco-monco kojo mPue Ala Anu Makuasa ri yangi pai ri lino. 12-13Kuperapi da mabuya rayami montando koro mamposabi toʼo-A, kakominya bareʼe da majaʼati yaku sangkani pai bangani ncomboriku ewa powiaku ri komi. Ndipojanjimo, ineku, papaku pai waʼa ngkasangkompoku sangkani pai waʼa bangani ncombori ntau seʼe bareʼe da ndipepate, paikanya da ndituwuri. Pai kono inceʼe da ndiwaika yaku tanda kamonconya komi da kupoaya monco!”
14Mesono tau radua setu, “Kami mojanji ane jelamo temponya i Pue mampepombaika tana seʼi ri kami, kami da mantuwuri komi, podoia bareʼe kojo da nupauka tau ntaninya kakononya karata mami seʼi. I Pue da mangahuku kami ane bareʼe kabangani pojanji mami seʼi.”
15Ua banua i Rahabu setu ndawangu mokenta-kenta pai bente ngkota, inceʼe painaka nauyu i Rahabu tau radua setu pai wayaa mojaya ri tuke. 16Natoʼo i Rahabu ri tau seʼe, “Ndipandakemo ri buyu mongkodo setu, da naka neʼe nasoko ntau anu napokau i mokole komi. Ndipesambunimo ndatiria ri raya anu tatogo ndeme rantani mewalili tau seʼe nepa ndipaliu pelinjami.”
17Natoʼo ntau radua padaso setu ri Rahabu, “Madago, da kabangani kojo janji anu nuperapi ungka ri kami. 18Paikanya seʼi anu kaperapi sangaya-ngaya da nuwianaka. Inceʼemo ane ratamo kami maungku tanami seʼi raneo, da nuloeka wayaa mawaa seʼi ri tuke nupauyu kami seʼi. Pai ine, papa pai waʼa ngkasangkompomu da nupasambaka ri banuamu seʼi. 19Pai ane reʼe sambaʼa ri tau seʼe anu mesuwu ungka ri banua seʼi pai ndapepate, inceʼe salanya ngkalionya, inceʼe bareʼe da kasuru. Paikanya ane reʼe anu ri raya banua seʼi anu marata rugi inceʼe kami da mangasuru. 20Paikanya, ane nupauka tau kono karata mami seʼi, kami bareʼe bareʼemo tesoʼo ri janji anu nuperapi ri kami.” 21Naposintuwuimo i Rahabu pura-pura setu nepa napapalai tau seʼe. Ungkalairia naloekamo wayaa mawaa setu ri tukenya.
22Malaimo tau padaso radua setu ndeku ri buyu mongkodo mesambuni ndatiria. Tatogo ndeme kasaenya waʼa ntau anu napokau i mokole setu mampepali tau seʼe ri mbeʼi-mbeʼi ri samalele daera setu paikanya bareʼe narata tau seʼe. Painaka mewalili waʼa mpomokau i mokole setu ri Yeriko. 23Nepa mobalungke ungka ri buyu to Isaraeli radua anu padaso setu, nawote Koro Yarade mewalili ri Yosua. Pura-pura anu napomberataka pai nakita ntau seʼe napetumbuka i Yosua. 24Ungkalairia natoʼo ntau seʼe, “Manoto kojo ndawaikamo kita i mPue tana setu; pura-pura tau njairia mampokaeka kita.”
