YESAYA 3
3
Kaguaga ri Yerusale
3:1-12
1Mewali kamonconya, i Pue Anu Makuasa da mangantima ungka ri Yerusale pai Yahuda pura-pura pompatoka pangkoni pai panginu. Ewanceʼe seʼe waʼa ntau anu napomaaka ntau seʼe: 2waʼa mpomakoje pai surodado, topobotusi, nabi, topowati pai topepatuju, 3tadulako ncurodado, waʼa ntopombawanaka anu loʼe ri poparenta negara, topobalimata pai topowalia. 4I Pue da mangalanti waʼa ntau mangura da mewali topombawanaka ntau sondo, pai tau seʼe da moparenta malulu pepokononya. 5Waʼa ntau da momberempesi. Tau mangura bareʼe mantubunaka tau tuʼa, tau anu kodi bareʼe da mantubunaka tau anu bangke.
6Ri tempo setu tau da mangantuju sambaʼa tinanya pai da natoʼoka siʼa, “Podo siko anu mampotumpu rengko anu sintinaya; inceʼe painaka pewalimo tadulako mami ri tempo anu maʼai ngkapari seʼi.”
7Paikanya da mesono siʼa natoʼo, “Yaku banya topopakuli! Yaku seʼe bereʼe pangkoni pai rengko. Neʼe ndipokau yaku da mewali tadulako banca!”
8Monco kojo, Yerusale manawumo! Yahuda mageromo! Maka pura-pura pompau pai powia ntau seʼe maewa i Pue pai mancapu kakuasaa. 9Poʼengko ntau seʼe anu mekiunde mampatongawa kajaʼa ntau seʼe. Bareʼe napesambunika ntau seʼe kasalaanya ewa to Sodomo piamo. Marugimo tau seʼe! Tau seʼe mampareemo rugi ri woto ngkoronya ngkalionya.
10Ndatoʼo i mPue, “Parataka waʼa ntau anu mepoʼinaya ri yaku, katau seʼenya da morasi pai tesorepaka. Tau seʼe da maepe dago ua sili lengenya. 11Paikanya marugimo tau majaʼa! Tau seʼe da ndapowia ewa pampowia ntau seʼe ntau ntaninya.
12Waʼa ntauku da najeani waʼa ntau topopapoana doi pai aga-aganya da napapurasi waʼa ntau mangoa.
Waʼa ntau da nalinguni waʼa ntopombawanakanya painaka bareʼemo da naincani woʼu jaya anu da nalulu ntau seʼe.”
I Pue mangabotusi waʼa ntaua
3:13-15
13I Pue tikalimo da mampepalisi salaa pai da mangabotusi waʼa ntaua. 14I Pue da medika ewa sambaʼa topobotusi ri waʼa ntopombawanaka ntaua. Ewaseʼi pompepalisi i mPue ri tau seʼe: “Komimo anu marampa wua anggoro ri waʼa bonde anggoro; banuami buke pai waʼa aga-aga anu ndirampa ungka ri tau kaasi-asi. 15Wenu painaka ndijeani waʼa ntauku pai ndipipisi tau kaasi-asi? Yaku Pue Anu Makuasa mompau seʼi.”
Patiendo ri waʼa mbeʼa nto Yerusale
3:16–4:1
16Ndatoʼo i mPue, “Mekiunde kojo waʼa mbeʼa nto Yerusale! Tau seʼe kanggengge-nggengge, napokono mangkinde-ngkindeka kirenya tau seʼi melinja kaligo-ligo. Katewia mbitinya napopowia, pai kareko-reko sangkani oni langke ri witinya. 17Paikanya da kuhuku tau seʼe; woʼonya juku-juku kebaka pai wuyuanya da ndadola.”
18Da rata temponya i Pue da mangantimasi waʼa mparewa pompakadolidi ungka ri waʼa mbeʼa nto Yerusale anu napekiundeka setu: tali, langke, enu 19-20toga, salenda, tabobonya, waʼ ajima anu ri takie pai anu ri lompe, 21sinci pai waʼa jali anu ri engo, 22rengko mposusa anu madolidi, baju marate, dompe, 23baju manipi, rengko lena, soʼo leʼe pai tabobo anu marate.
24Wawaseʼi tau seʼe mampake waʼa anu mawongi, pai ripurinya tau seʼe da mawau oso. Soʼo ntongo ntau seʼe anu maʼalusu da ndasawanika koloro anu makogangi. Woʼo ntau seʼe anu napetaka ntinuku anu magaya da ndadola. Waʼa rengko ntau seʼe anu madolidi da ndasawanika ronto. Wawaseʼi tau seʼe magaya; ripurinya da jaʼa-jaʼa taʼa ntau seʼe maka da ndamere.
25Ewanceʼe seʼe waʼa ntuama anu maroso da mate ri poʼiwali. 26Ri waʼa baa-baa ngkota tau da mongkabalusi pai da mokukuou, pai kota setu seʼe da ewa weʼa anu ndalambesi anu matunda ri tana.
