POTETALA WA'A NCURO 14
14
Ri Ikoniu
14:1-7
1Ri Ikoniu napomberataka woʼu i mPaulu pai Baranaba ewa anu roomo napomberataka. Pesua ntau seʼe ri banua mpekakai nto Yahudi motuntu woʼu njairia, painaka maria to Yahudi pai tau ntaninya anu banya to Yahudi meayamo ri Yesu. 2Paikanya waʼa nto Yahudi anu bareʼe meaya, mantundeki waʼa ntau banca ntaninya anu banya to Yahudi, painaka waʼa ntau setu mampobanciika waʼa ntau anu meaya ri Yesu. 3Inceʼe painaka masae karoo-roo i mPaulu pai Baranaba njairia. Bareʼe maeka raya ntau seʼe mampau kono i Pue. Pai ndapatongawa i mPue, nuntu kono towe i mPue anu napetumbu waʼa ncuro setu monco. Ndawai i mPue ri tau seʼe kuasa mampowia tanda ngkuasa anu napojingki ndaya ntau mangkita. 4Paikanya mewalimo posisala bangke ri tau sandaya ngkota setu, maka santila mampopasambiraka to Yahudi, santila woʼu mancambiranaka waʼa ncuro setu. 5Mewali mompasambaka waʼa nto Yahudi pai waʼa ntadulakonya sangkani-ngkani pai waʼa ntau anu banya to Yahudi, naposintuwui ntau seʼe da mantaso mbatu waʼa ncuro setu. 6Paikanya tangara ndaya ntau seʼe anu majaʼa setu narata ndaya waʼa ncuro, painaka maliga-liga tau seʼe malai njoʼu ri Lisitera pai Deribe, inceʼemo waʼa lipu ri tana Likaoni pai sampotenginya. 7Njairia tau seʼe mampetumbu Nuntu ngKatuwu setu.
Ri Lisitera pai Deribe
14:8-20
8Ri Lisitera reʼe sambaʼa tuama anu pungkumo ungka ri pampoana, painaka bepareʼe pelinjanya maka bemaroso witinya. 9Tau setu motunda mampedongeka potuntu i mPaulu. Nakita i mPaulu tau setu meaya, inceʼe puʼunya painaka da ndakoto mampakaʼosa siʼa. Nakomatasi i mPaulu siʼa, 10naseko i mPaulu marimbo oni nganganya natoʼo, “Peoko pompayoa!” Mesombulaka tau setu mekakore, nepa melinja. 11Pangkita ntau sondo anu napowia i mPaulu setu, meboo-boo tau seʼe ri basa Likaoni natoʼo, “Menaʼumo waʼa lamoa ri oyota motaʼa ewa tolino!” 12Natoʼo ntau seʼe i Baranaba inceʼemo i Zeusi pai i Paulu inceʼemo i Herimasi, maka inceʼe anu mompau-mpau. 13Tadulamoa anu mampanyomba i Zeusi anu lawi reʼe lampaʼaninya ri kota setu, njoʼumo mangkeni waʼa japi pai sese ri boboka ngkota, sangkani-ngkani pai tau sondo da mampanyombaka panyomba ri suro radua setu.
14Padonge i Baranaba pai i Paulu nunjaa anu da napowia waʼa ntau setu nasia-sia ntau seʼe rengkonya seʼi molonco ri oyo ntau sondo nepa maboo-boo natoʼo, 15#Pa. 20:11, Pol. 146:6 “Oo nunjaa anu da ndipowia seʼi? Kami seʼi tolino anu ewa komi seʼe! Kami rata ireʼi mampetumbu Nuntu ngKatuwu ri komi da naka ndipalaika pura-pura anu bareʼe moyowe seʼi, da mewalili ri Pue Ala anu tuwu, Siramo anu mampapewali yangi pai lino, tasi sangkani pai waʼa banganinya. 16Maka ri tempo anu liumo waʼa banca ndapapaliuka i mPue Ala, tuwu malulu pepokono ndayanya. 17Paikanya bareʼe ndakalingani mampatongawa kakononya Sira, kabuya ndaya-A, ndawai uja, ndapapowua pinamuya ri turonya; ndawaika komi pangkoni pai ndapakawongko rayami.” 18Mau roo natotoraka waʼa Ncuro ewanceʼe, paikanya bareʼepa naaya ntau seʼe jana pasilolongani mpaliu panyomba anu da napanyombaka ri tau seʼe. 19Paikanya jelamo bara tesangkuja to Yahudi anu ungka ri Antiokia Pesidia pai anu ungka ri Ikoniu, mamperirayai waʼa ntau sondo, da naka mompasambali pai tau seʼe. Nawunu mbatu ntau seʼe i Paulu, nepa nanoʼo rata ri sambali bente. Nasarumaka ntau seʼe matemo i Paulu, 20paikanya kajela waʼa ntau meaya malimbu-limbu siʼa, kalumbangu siʼa nepa mesua muni ri raya ngkota. Bangke reme malaimo siʼa sangkani-ngkani pai i Baranaba njoʼu ri Deribe.
I Paulu pai i Baranaba mewalili ri Antiokia
14:21-28
21Ri Deribe, i Paulu pai Baranaba mampobambarika Nuntu ngKatuwu painaka maria tau anu meayamo ri Yesu. Roo setu mewalili tau seʼe ri Lisitera. Ungka ri Lisitera njoʼu tau seʼe ri Ikoniu, nepa liu ri Antiokia Pesidia. 22Mebia tau seʼe ri kota-kota setu mantotoraka waʼa ntau anu meaya ri Yesu, napakaroso peaya ndaya ntau seʼe, natoʼo, “Lawi maria kapari pai pejeani anu da taepe riunya, nepa da rata karodondaya ri Lino Dawoʼu mPue Ala.” Ewaseʼemo pampaguru waʼa neuro setu waʼa anaguru i Yesu ri waʼa ngkota setu. 23Ri sambaʼa-sambaʼa dompu napatongko i mPaulu pai i Baranaba waʼa ntopombawanaka ri raya dompu. Mekakai pai mopuasa tau seʼe nepa napepombaika waʼa nto pombawanaka setu ri Pue Ala anu naayamo ntau seʼe setu.
24Roo setu malaimo i Paulu pai i Baranaba mojaya ri tana Pesidia jela ri Pampilia. 25Karoonya napetumbu ntau seʼe Nuntu mPue Ala ri Periga, nepa njoʼu tau seʼe ri Atalia. 26Ungka njairia mosumombamo tau seʼe mewalili ri Antiokia. Inceʼemo kota poiwo mpalai ntau seʼe owi karoonya napepombaika dompu tau seʼe ri kuasa mPue Ala, da napampotetalaka tetala anu nawianakamo ntau seʼe.
27Kajela ntau seʼe ri Antiokia, napasambaka ntau seʼe waʼa anggota dompu, nepa natuntuka tau seʼe pura-pura anu ndapowia i mPue Ala mampoliu tau seʼe. Napau ntau seʼe ewambeʼi kapuru ndaya i mPue Ala ri waʼa ntau anu banya to Yahudi paikanya meayamo ri Yesu. 28Ri kota setu masae karoo-roo i mPaulu pai Baranaba sangkani-ngkani pai waʼa ntau meaya.
