Zakh. 2
2
Itcotmata sika telu: pagalaiat tali pasikire
1Ka itcotmataku minca itcokungan sara simanteu sipasiukka tali pasikire. 2Nounoukungannia, “Kaipa nuei?.” Aleginangannia, “Mei masikire Jerusalem, “kuoba kuagai piga nanta samba liot laggai nenda.”
3Lepa geti itcokungan malaika sipaninibo kaku, ibakkouake rerenia iei ka mata, samba malaika bagei mei masiailiakenia. 4Malaika siboki masikua katubut malaika sika rua, “Kenan kam simaruei ka tubut silainge nenda, samba kua kamatania maoongkip te geti Jerusalem kopet igit sirimanua samba tarimeu bailiu taioinangan tugalai irip laggai sigoiliknia. 5Amupalelekngan si Tuhan, Nia le ibailiu geti irip laggai kele obengan sipujujuluu masigoilik laggai nenda ijagonia samba pukuddunangan leu sedda ka bagat sangamberi gege samba pubebeunanNia.”
Sangamberi sirimanua siribbaiakenen tusogai ratoili
6Kuanangan si Tuhan ka tubut paamianNia, “Aku pasabungan kam ka sangamberi matat rusa. Tapoi kineneiget katuitui kam ka Babilonia 7Ale sangamberi sirimanua siribbaiakenen katuitui kam ka Babilonia samba toiliake kam ka Jerusalem. 8Kasei sipasisaggangi kam, aisaggangi le kilibet bagaKu.” Iate lulunia Tuhan Sipulugege aikoiniake aku masisegeake patonekat nene ka sangamberi bangsa sipasiraraurau paamianNia, 9“Sarania si Tuhan le masisaggangi geti kam! Sia paguguletmui siboiki sipususum ka tubumui bailiu geti sipasirarau kam. Ke amuailingan sangamberi nenda, agaimuian te geti Tuhan Sipulugege le amasikoiniake aku.”
10Kuanangan si Tuhan, “Puurai kam sialei gorat baga, ale sipulalaggai ka Jerusalem! Momoi te Aku mukuddu ka talagamui!”
11Kateteret nenda maigi le bangsa siooi ka tubut Tuhan addeat ibailiu paamianNia. Mukuddu le Nia geti ka talagamui, samba agaimuian si Tuhan le amasikoiniake aku ka tubumui. 12Samba iala le' geti Jehuda si Tuhan bailiu bakkatNia ka polak sipunenan, samba Jerusalem ibailiu te geti laggai kilibet bagaNia. 13Pulelek kam tubumui sangamberimui ka matat Tuhan! Kalulut amoian poi si Tuhan barania ka kudduatNia sipunenan.
Obecnie wybrane:
Zakh. 2: MWV
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2015