Zakh. 12
12
Katuaraugat Jerusalem
1Nene te patonekat Tuhan pagalaiat Israel. Tuhan sigalai manua, sigalai polak samba leu siake purimanuaiat ka sirimanua, masikua, 2“Kugagalai te geti Jerusalem kele pulokat sibara suat anggur; ka bagania sangamberi tobbou laggai pabebeakenennia lo'rangannia geti samba pare're'nangan leu sia kele sirimanua simapuineng. Kebai aragoilikngan raalounia Jerusalem, kisedda leu te raalou sangamberi laggai sipulelegei ka tobbou Jehuda. 3Ke' iailingan gogoi nenda, galaikungan te geti Jerusalem kele bukku simasane'. Ke' ai bai bangsa sibara kaipa pa' masisibo masiakkatnake bara le geti mauju' simalabbu. Sangamberi bangsa ka polak musara geti bule rasaggangi Jerusalem. 4Ka gogoi nenda sangamberi kuro' kukau maingo samba sipukukuro' Kubailiuake sia siroro', sipulalaggai ka Jehuda geti Kujago le, tapoi sangamberi kurora tai saggak kugalai imapeset. 5Lepa sangamberi muntogat Jehuda masikua kapaatuatdra, “Si Tuhan Sipulugege le sipasikakau puroron ka paamianNia sipulelegei ka Jerusalem.” 6Ka gogoi nenda sangamberi muntogat Jehuda kubailiuake geti kele obengan ka silabbukat loina purusu ele kele solo sipuobek ka tei rurukat siperakat gandum. Rapasubu le geti sangamberi bangsa sibokko sia. Tapoi sipulaggai ka Jerusalem riuriu le rapukuddu ka laggai ka bagat aban.
7Aku, si Tuhan, masiboikiake masikau geti kamanangan ka saladdudra tai Jehuda, bule pubebeunan sisilot punu teteu David samba sipulaggai ka Jerusalem ta isaliu pubebeunandra ka Jehuda sabagei. 8Ka gogoi nenda kunemingkungan geti sipulaggai ka Jerusalem, samba bulat sitaioi tubu ka talagatdra ibailiu te geti kele ron tubut David. Palulurangan te geti sapunuteteu David kele ipupasikelat MalaikaKu, kele Kupupasikelat. 9Ka gogoi nenda kusubuake te geti senen bangsa sisibo masisaggangi Jerusalem.
10 #
Joh. 19:37; Pamoil. 1:7 Iageti sapunuteteu David samba leu sipulaggai ka Jerusalem Kukau le geti paatuat sioba mununtu baga samba sioba manindou. Puletceirangannia geti sipunundra nenda samba rasoibinia kele sirimanua sipugegeri masisoibi kamateiat toga si sasara. Pugerirangan geti kopet reureu bagatdra kele sirimanua sisoibi katatakat toga sikebbukat. 11Ka gogoi nenda babara le geti geri simalabbu ka Jerusalem kele geri katubut Hadad-Rimon ka su'sut Magido. 12Iageti senen sipulalalep ka laggai nenda mugeri le geti sia senenda: lalep sapunuteteu David, lalep sapunuteteu Natan, 13lalep sapunuteteu Lewi, lalep sapunuteteu Simei samba sangamberi sipulalalep bagei. 14Senen lalep geti mugeri, samba sangamberi taimanteu ka senen lalep sipugegri rasaraake tubudra ka tai tainanalep.”
Obecnie wybrane:
Zakh. 12: MWV
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2015