Nahum Uram 1
1
Nahum uram kerek sengna deyok
1:1
1Er Iya Erebdobnyi biryi sun Niniwe atei nang ati wenena uram ebmou. A uram ara Yehuda mutuk atei si Elkosh kuramunyi si Nahum biryi kunumna deib aryi asing eibmouci, lak eterebmou ura, kerek sekeibmou.
Er Iya Erebdobnyi biryi sun Niniwe atei kuramnyi nang ati yu boboka ebmou uram deyok
1:2-8
2Er Iya Erebdobnyi bira, “Yuk molon dinyi molobingnyei,” tenen matan ilintonyi kurur.
Tonda, Erda sun yu dinyi kuramingnyi nang asi yu mitik kum dinyi dengdeirirurnyi kurur.
Er Iya Erebdobnyi bira yu dinyi tamuboka dengdeirirurnyi kurur.
Erda sun yu dinyi kuramingnyi nang ati yu weik kanya borurnyi kurur.
Er Iya Erebdobnyi bira sun Er ab mar irdaramingnyi nang asi dekeiboka mar borurnyi kurur.
3Ba, Er Iya Erebdobnyi bira yu kanya ola wengna kumnyi kurur.
Ani, Erda mikib weiknyi kurur.
Bok, Erda sun yu dinyi kuramingnyi nang asi wenena ara eiboka tanglona kumnyi kurur.
Er yibarande ara yeinya kankan ab ibalya kankan ab aryi yibarande.
Ani, Er yibarande ara duwa deici yan yanibdongoboka yibarurnyi kurur.
Ba, ilila duwa ababyi ara mitik dinyi ato, tukwe borbosa dinyi ato Er yan deici durur dinyi ato kurur.
Ati, Er Iya Erebdobnyi bira ilil weik tenenubnyi kurur.
4Er Imtamnyi biryi uram weikanun eboka weik me kwan asi weneboka, “Me cebdum,” ebde ba,
weik me kwan deianci ai ara me dala dem kurur. Ani, yiban me nirya asi cemsinirur.
Er Imtamnyi mikib biriman aryi Basan mutuk ab Karmel mutuk ab asi tukwe buta dem mutuk kimdeirirur.
Ani, Er Imtamnyi biryi, “Koula darur,” ebde ba,
Libanon mutuk co kerketa ababyi kulubde sangdur.
5Mutuk kon nirya ara Er Imtamnyi urasin dam aryi sirim talerur.
Ani, yim mutuk ara Er urasin dam aryi lontong-lontong eboka mulikde sangdur.
Sun tukwetam kunung nang nirya ab,
ukutotoa nirya ababyi Er urasintam aryi sirim talerur.
6Er Imtamnyi urasin ara yu urasin bobde bok asi unanyi biryi katabdongoboka tikwamote do?
Ani, Er yu ara uk buk angnande to kubmote bok ara unanyi biryi dabdobnyi kibdankwamote do?
Er yu wengnande dinyi ara uk buk welenmaci ai anim-anim erande to kurur.
Ba, mutuk kon ai keil ara daluboka Er urasin dam sangdur.
7Er Iya Erebdobnyi bira ilil tenenubnyi kururcok,
Erda kanya telebnyi kurur.
Erda nun mambul kubsici talak aryi Er dam kanya barirorbananyi kurur.
Er boukwe dam wengdorban nang ara Erci bikoka kalingdurnyi kurur.
8Ba, nun mar ordana nang atei Niniwe nang ara Erci kum daneibkwande.
Ara, Erci arukci uca, ilil tenen me on dinyi obde ba, akatei nang asi nirya kum daneibkwande.
Er Imtamnyi bisi mar bon nang nirya ara, “Lebdandobkwayeb,” tenen lukunda aryi barsengdonmangnyi ababyi,
Erci dobkirikoka obkwande.
Er Iya Erebdobnyi biryi sun Yehuda mutuk nang ab, sun era mutuk Niniwe atei nang ab ati uram yuk-yuk ebdeibmou uram deyok
1:9-15
9Sun yu kanya bon nang Niniwe atei nang aryi yuk dinyi-yuk dinyi teneiboka mar moun yiramingnyi ababyi,
Er Iya Erebdobnyi biryi sun tenen dinyi kum daneibkwande.
Er ab mar ordana nang asi obminikwande ba,
sun Er tam kurandum nang ara tamuboka mambul liki bitinyi dinyi kum dobkwandum.
10Diba ati ebman. Sun Niniwe atei nang nirya ara minola kum dankwaming.
Sunda tabwe kwanya wamliboka uk daraming to kubkwande.
Ani, sun nirya ara alingkweia uk yalebde yirande to kubkwaming.
11Niniwe atei nang sun kankan aryi, “Er Iya Erebdobnyi bisi bisik sekwayeb,” tenen mar moun yina deyoknyi anabwe.
Anyi biryi yuk nang asi, “Ato-ato kuboka obkwayeb,” eboka etererurunyi kurur.
12Er Iya Erebdobnyi biryi ato ebmou,
“Sun Niniwe atei nang ara ninyi ilinto aryi mikib ting erdeiriranci ababyi,
Niryi sun nirya asi ku turaming to kubnyi ba, dibsekingiryi, kum dansekwaming.
Bok, sun Yehuda nang ara Ni uram keken nang asi Niryi mambul dinyi bobdeiansise to,
aminda ara tubto yumkuna mambul do ton kum bobdeibkwansin.
13Ukuryok ara sun Asyur mutuk kuboka Niniwe atei nang aryi sunsi ikin co takubdeibninto kuransing ara Niryi lobdeibkwamasin.
Ba, besi tabwe debsei ara Niryi bulbulukdonokokabniryi lobdeibkwamasin.
14Ba, Er Iya Erebdobnyi biryi sun Niniwe atei nang ati uram ara ato ebdeibmar.
Ni Iya Erebdobnyi biryi sun nirya asi kum daneibne ba, sun deibdoba nang ababyi ara iya urabdeibkwan.
Sun kwemdeina molon ai aryi kuboka kwemdeina molon dinyi ara ya aryi sekoka kiknibdob dinyi nirya asi Niryi kum daneibkwan.
Sun Asyur nang ara yuk nang aryi ina ngilikmanto nang kurandarur ati, Niryi sunsi obkwansin.
Sun dibdoba tukwi dongon ai ara tukwe ukoka sirya kiknibdeibman ati ebman.
15Ba, sun Yehuda mutuk nang ara dirandarur.
Sunsi yu kanya boboka oryangasunung nang ara Er Imtamnyi biryi sirya oboka kum daneibmar.
Ati, tubto ton dumderyangana kum kubkwansing.
Dirandarur. Mutuk yim deici asi ninyi tentok ara sun kanya kilkil kusin uram eryanganmasiranyi cungyanganmar.
Ara, anyi biryi sunti, ‘Niniwe atei kum daneibmar,’ eboka sun kanya mangkau kubdeibkwansir uram eryanganmasiranyi yanganmar.
Ati, sun Yehuda mutuk nang ara kanya kilkil kuboka sun weik kwalina uki tum kanya teneiboka kunubokabmunci,
sunci uram eboka kunubdeiamunya kira Er Imtamnyi biti deibkarebdarur,” ebmou.
Obecnie wybrane:
Nahum Uram 1: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)