Maleakhi Uram 2
2
Er Iya Erebdobnyi biryi sun ninyi dama deirina nang ati yu boboka wenebmou uram deyok
2:1-9
1Er Iya Erebdobnyi biryi sun ninyi dama deirin nang imam nang ati ato ebmou, “Ati, we, sun ninyi dama deirin nang e! A ebdeibkun uram ara wenena uram ara sunti ebkwamasin. 2Sunci Ni ebkwaman uram asi kum kekebmunyi ab, sunci Nira Imtamnyi si asi ererdeirinina kum kubnumunyi ab ura, Niryi sun dam sumna dinyi dobkwetebkwansin. Ani, kisal dangna dinyi sun dam kuranci dinyi ara Niryi dobdobniryi, sumna dinyi akwe karebkwansin. Sunci Ni uram dirnilina kum kundarur ba, Niryi sirya sumna dinyi kiknibdeibsise. Nira Imtamnyi, imtam yin doun nang sienyi biryi ato ebmasin.
3Diba ati, Niryi sun deibdoba nang nirya asi weneboka ikin dinyi karebkwan. Tonda, sunci weik uki tum berekmaci tum aryi bisam domba boboka dama deiriranurum bok, Niryi, ‘Se, malyi bisam asi boboka deiriryanganung!’ tenesunun. Ati Niryi, sun uk daryangarandum bisam dei doboka sun urasintam lubdeibkwansin. Ba, ninyi aryi sunsi kilibtaleboka bobanmasingnyi ani, bisam dei tam tanglorbinkwansing. 4Ba, sunci kanya teneibdeboka, ‘Er Iya Erebdobnyi, imtam yin doun nang sienyi biryi a wenena uram nunti ebdeiansou,’ tenen diboka bikwandum. Ati, Niryi minob ura sun abwe kisok Lewi bisi, ‘Ni urasintam aryi tikoka kan ab kan deibdoba nang ab aryi Ni dama deirina nang iya kubkwandum,’ ebmase to, Niryi tanglona kum uca talebnurubkwan. A deyok aryi Niryi sunda Lewi deibdoba nang asi a yan memen uram ebmasin. 5Niryi sun abwe kisok Lewi bisi, ‘Kunubdeibkwankin,’ eboka katabum erdeirin uram ebdeianse to, kunubdeianse. Ara, kam kun dinyi ab mangkau kun dinyi ab asi Niryi sun abwe kisok bisi kareanse. Ati, Niryi ersi ato eboka ebdeianse, ‘Kanci Nisi ilil kuboka Ni si weik ebniminyi ba, Niryi kansi kam kun dinyi ab mangkau kun dinyi ab karebkwansin,’ ebdeianse. Ba, erci Nisi ilil kuboka Ni si weik ererdeiranou. Erci Niti, ‘Ni Nai,’ tenen Ni uram kunuramuryi, Ni urasintam asi dama teleb dinyi deiriryangaramwe. 6Sun abwe Lewi biryi Ni uram dib en uram akwe etereramwe. Tola uram ton kum etereramwe. Eda, ni dam kunanyi diboka kuramuryi, ni urasintam ara teleb dinyi akwe kunubde baramwe. Ato kuboka etereramwe uca, ninyi ilinto dangurdeiriramwe ba, sun malyi kun dinyi takloboka Ni uram kunubde ban nang kemdeiriramwe.
7Ara, ato aryi kuramwe. Sun ninyi dama deirin nang imam nang ara Er Imtamnyi, imtam yin doun nang sienyi biryi bokdonokmou nang kunung. Ba, sun ninyi dama deirin nang imam nang si bambol aryi ebkwamangnyi uram ara diboka kalikdandoka dib en uram bingna dinyi akwe eterebkwanung. Ani, yuk nang aryi, ‘Sunci nunsi Er Imtamnyi eterebsingnyi ba, kekebdobkwayeb,’ tenen sun ninyi dama deirin nang uram kekeryangana teleb. 8Bok, sun a talak kundarur ninyi dama deirin nang ara bisik kiringwaningdandarur. Sun eterena aryi ninyi ilinto malyi bisik eterendarur uca, malyi dinyi ukunung. Niryi sun abwe kisok Lewi bisi arukdeianse uram asi sunci dalurminingdarur. Nira Imtamnyi, imtam yin doun nang sienyi biryi ato ebmasin. 9Sunci Ni uram eterena asi kum milirandau deyok aryi, Niryi sunsi weneboka malyi kibdeibsise. Uca, ninyi nirya aryi sunsi ina ngilingsunung. Sunci malyi kun nang urasin wimdeirirandumci, Ni erdeirin uram diboka kum kunundarur deyok aryi yuk nang aryi sunti, ‘Malyi kun nang aca,’ tenesunung,” Er Iya Erebdobnyi biryi ebmou.
Sun Israel nang aryi yuk atei nerabwe ara kwemdeina molon nerabwe doramnyi ba, sun nerabwe minob doamnyi nerabwe asi takloboka kimnamnyi deyok aryi Er Iya Erebdobnyi biryi sunsi wenebmou uram deyok
2:10-16
10Maleakhi biryi Er Imtamnyi uram eterenmouci, erci ato ebmou, “Nun ninyi kunuba nirya ara nun Nai Imtamnyi bira tentok kurur, kuma do? Er Imtamnyi Er tentoknyi biryi nun kiknibmasou, kuma do? Yo, Er tentok aryi nun nirya kiknibmasounyi, nun Nai kurur. Ura, ato kurur bok asi, unatoa ati nun ninyi mamun asi si ablanglordanub do? Unato ati Er Imtamnyi biryi nun abwe yabwe asi uram eboka arukdeiamwe uram ara yan yaninub do?
11Sun Yehuda mutuk atei nang ara Er Imtamnyi uram kekena ara taklobyi. Ara, Erci sunsi ebdeiamwe uram asi si ablanglon uram kibdeiboka Yerusalem atei dam ab, Israel mutuk dam asi mem dinyi ukurdongonung. Yerusalem atei ara teleb atei Er Imtamnyi biryi boukwe kurur atei asi Yehuda nang aryi malyi kibdongoboka beterdongonung. Ani, Yehuda nang aryi kwemdeina molon atei nerabwe doboka sun akenyi yabwe kimdanungci beterdongonung. 12Sun kwemdeina molon nang nerabwe dobdobingnyi nang ara Er Imtamnyi biryi weneboka Er milin nang Yakub yaldangna nang kankan aryi yakdonokwande. Sun ato kuramingnyi nang aryi, ‘Nun malyi kunub dinyi kilibkwansir,’ tenen sun dama Er Iya Erebdobnyi, imtam yin doun nang sienyi urasintam deiriryangaramingnyi ababyi Erci sunsi yakdonokwande.
13Ani, sun malyi kun dinyi yuk dinyi ababyi ukundarur. Ba, Er Iya Erebdobnyi biryi sun dama deirirandum dinyi asi ton dirdesina ababyi kum kusurur ani, dorona ababyi ton kum kusurur. A deyok aryi sunci engena weik engerandum uca, sun asimaka aryi Er Imtamnyi biti dama uk dan keil dungna ara siklirur. 14Ura, sunci ato eboka asirtorandum, ‘Nun dama deirinub dinyi ara unatoa ati Erci kum dororur do?’ eboka asirtorandum. Bok, Erci sun deirirandum dinyi kum dorur deyok ara, Erda sun kurandum dinyi nirya liliboka bingnanyi kurur deyok aryi kusurur. Sun ab sun nerabwe minob yuma dororandau nerabwe ab asi iya kanya deibdandoka kurona kum kurondarur. Sunda minob nerabwe asi iya tonkwa kuronmanto bok deirlorongdarur. Ani, sunda Er Iya Erebdobnyi urasintam aryi a nerabwe ab asi uram eboka kunubdeiandau cok tanglondarur deyok aryi Erci sun dama deirin dinyi kum dororande.
15Sun doboka tanglondarur nerabwe mer ara Er Iya Erebdobnyi biryi sun nong kiknin sun kanya kiknin kibmou do, kum do? Ani, sunsi antaniboka tentok kuna ara Erci teneibmasou to, kuma do? Erci kikniboka nong tentok ato kibdeibmou ara, ‘Sunci deirin mabwe aryi yaldakoka deibde binkwaming nang ara Nira Imtamnyi uram keken nang kibkwanung,’ tenen tentok kibdeibmasou. Ati, sun damnyi kalikdandarur. Sunci sun doamunyi nerabwe boukwe kimna kum uca tanglona mem.
16Ni Imtamnyi, sun Israel nang molonindarurnyi, Iya Mikibnyi bira sun ner dobdamun cok tanglorandum dinyi ara Ni yu kunurur. Ani, sun nerabwe asi yu uram akwe eraming nang ababyi Ni yu kuranir. Ati, sun nerabwe asi sun uram aryi, ‘Boukwe kibkwan,’ eamunyi uram ara dangbisina mem. Eda sunbiramnyi kalikdandobmunci uram eamunyi tok kunubdarur,” ebmou.
Er Iya Erebdobnyi bira Erti dama deirirban ai Bait Allah ai dam yankwande ara wenebkwansir ati yuryankwande uram deyok
2:17–3:5
17“Sun malyi uram endarur aryi Er Iya Erebdobnyi bisi kanya mambul kiminingdarur e. Sunda ato kundarurcok, ato endarur, ‘Nunci Er Imtamnyi bisi kanya mambul kiminingnub ara una kunub uca Er kanya mambul kiminingnub do?’ endarur. Ara, ato kuboka tenebmunyi ura, mambul kiminingdarur, ‘Yu dinyi kuramib nang ara Er Iya Erebdobnyi biryi wenena kum kusurur. Nun ato kuramib nang asi Erci “Telebto kunung,” teneransir,’ tenerandum. Ani, ‘Dantam kurur Imtamnyi biryi nun malyi kun nang asi kikimanto kuboka wenebkwansir do? Malyi a kuronmabyi ababyi da kum wenebkwansir,’ tenerandum. Ato dinyi tenerandumci, sunci Er Imtamnyi bisi mambul kiminingdarur,” ebmou.
Obecnie wybrane:
Maleakhi Uram 2: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)