Hagai Uram 2
2
Er Iya Erebdobnyi biti dama deirin ai Bait Allah ai tubto tamuboka dobmai ara minob kuramwe ai weiktoto ato kum dobmai bok, Er Imtamnyi biryi, “Akai ara bisibkaboka erebdeibkwan,” ebdeibmou uram deyok
2:1-10
1-2Sienyi si Darius bira Persia mutuk nang weik sienyi kibmou talak ara kwalina bitinyi dinyi kwalibmai. Sirya kwalibmai ura, wala tabaryi wala asi tanggal 21 berekmou ura, Er Iya Erebdobnyi biryi Er uram ermururamunyi nabi si Hagai deici asi uram ton ebdeibmou. Ara, ato ebdeibmou: 3“Kanci bindoka Persia mutuk weik sienyi amwetam bunanyi Zerubabel ab, ninyi dama deirin sienyi Yosua ab, Israel nang yuk nang ab ati ato ebdum: 4Sun kankan aryi kurandum wisi nang kankan ara ninyi tentok-tentok aryi minob ura min doamwe ai Er Imtamnyi biti dama deirin ai asi asing eiandau. Ordana nang aryi yandoka min doamwe ai kum dakminikamnyi bok, sunda kam nang tuba kuandau ba, a min doamwe ai asi asing eiandau. Ani, arub ara sunci Er Imtamnyi dama deirin ai ukuryok dobmang ai ababyi asing eibmarum. Ati, sunci, ‘Minob doamnyi ai ara weik ai doamiryi, dengna weik dinyi ai, iya teleb kuboka doamnyi ai kuamwe,’ tenebmarumci, ‘Dama deirin ai ukuryok doramib ai ara teleb ai kuma, eda mitik ai, malyi ai aca kurur,’ tenebmarum ati Ni bikman. 5Ato tenerandum bok, Zerubabel e, kan kanya mikib yabdobdum se! Ani, Yosua ninyi dama deirin sienyi e, kanbabyi kanya mikib yabdobdum. Ani, sun akatei kundarur nang nirya mikib yabdobdarur. Mikib yabdobmunyi ura, Ni dama deirin ai ur dobdarur. Niryi sun ab tonkwa kuboka dibnilibkwansin. Ati, Nira Iya Erebdobnyi, imtam yin doun nang sienyi biryi ebmasin. 6Ara, Niryi minob ura sun abwe yabwe taruk taleboka Mesir mutuk aryi bobinanse ba, Niryi ebdeianse tok, ara, ‘Sun ab tonkwa kuboka dibnilibkwansin,’ eanse tok, Niryi diboka kunubdeibkwansin. Tonda, Ni Kanya Roh ara sun kankan dam iya kubkwansir. Ati, sun ilil kusina mem. 7Nira Iya Erebdobnyi, imtam yin doun nang sienyi biryi ato ebmasin: Uki kuna kum kubkwamarum dam talak akiryok, Niryi, ‘Ni dama deirin ai iya erebdeibkwan ati sun im dangna tukwe dangna nang aryi dengna weik dinyi boyankwanung,’ tenen im ab tukwe ab, weik me kwan ab, tukwe kib ai ab asi nirya lontokwabman. 8Im dangna tukwe dangna mutuk nirya asi lontokwabman. Lontoknyi uca, sun im dangna tukwe dangna kuraming nang ara ilil kanya boboka Yerusalem atei buluryankwaming. Ara, sun taruk dam kuboka bona bon dinyi, dengna weik dinyi ilinto boyangiryi, dama deibkwaming. Uca, Ni dama deirin ai ara bona bon dinyi langdiboka deibkwaming. Ato kuboka Ni Imtamnyi biryi Ni dama deirin ai asi erebdeibkwan. 9Dengna weik keil si perak ara Ni dinyi akwe kurur. Tonda, dengna weik keil si emas ababyi Ni dinyi akwe kurur. Nira Iya Erebdobnyi, imtam yin doun nang sienyi biryi ato ebmasin. 10Ati, Ni dama deirin ai ukuryok dobkwandum ai ara minob doamnyi ai ato ai kuma. Eda, minob doamnyi ai ara teleb ai kuramwe bok, sun ukuryok dorandum ai ara bisibkaboka iya teleb ai kubkwande. Ba, akai dam asi Niryi kisal dakoka mangkau antanin dinyi karebkwan,” ato eboka Er Iya Erebdobnyi biryi ebmou.
Er Imtamnyi biryi, “Sunda Yehuda yala nang ara Ni dama deirin aitam kuboka dorandum bok, sun kankan aryi kuboka malyi kanya bon nang ara akai dormilina mem,” ebmou uram deyok
2:11-15
11Er Darius weik sienyi kiamwe talak wala toubne wala, tanggal 24 tum berekmou ura, Er Iya Erebdobnyi biryi nabi Hagai bisi ato ebmou. 12“Ni Iya Erebdobnyi imtam yin doun nang sienyi biryi ato ebmasin. Sunda Yehuda yala nang ara, ‘Eterebkwansununga,’ tenen Ni Imtamnyi ai wa in nang dam bindoka ato eboka asibdendarur: 13‘Er Imtamnyi bisi deibmabyi dama deirin dinyi ara ur talyi dinyi bolibmaci ura, a ur talyi dinyi ababyi Er Imtamnyi biti dama deirin dinyi kibte do? Ara, Er Imtamnyi biti karebkwabmabyi bisam tub ara ongon aling bisik kibmanub ba, ton ur talyi dinyi ara roti kwaning kum, anggur kum, yingying erande me kum, yuk-yuk yina nirya kum bolibmaci ura, a ur talyi dinyi ara Er Imtamnyi biti dama deirin dinyi kibkwandur do?’ Ato eboka asibdendarur,” ebmou. Uca, asibdenmai ba, sun Er Imtamnyi ai wa in nang aryi, “Ato kuna kum!” ebmai. 14Ato ebmai ura, Hagai biryi ato ebmou, “Dib ati ebmang. Ba, ninyi tukwe bolibmarinyi biti Er Imtamnyi biryi, ‘Nining atonyi kubmar,’ tenerur ara nun bingnub. Ati, ninyi tukwi bolibmarinyi bira Er Imtamnyi biti dama deirin dinyi ton bolibci ura, una kubkwande do? Er Imtamnyi dama deirin dinyi ababyi nining ato dinyi kibkwandur darib? Sunci ato eboka sun Er Imtamnyi ai wa in nang asi ato eboka asibdendarur,” ebmou. Uca, Er Imtamnyi ai wa in nang aryi ato ebmai, “Yo diba, ninyi tukwe bolibmarinyi biryi dama deirin dinyi bolibmaci ura, dama deirin dinyi ababyi betebdongoboka nining ato dinyi kubkwandur,” ebmai. 15Ura, Hagai biryi ato ebmou, “Er Iya Erebdobnyi biryi ato ebmar: Sunda Yehuda yala nang ara Ni urasintam aryi kurandum cok, ninyi tukwi talebmang nang ato kurandum ati ebman. Sunci Nisi dama deirin dinyi deiriranurum bok, Niryi sunti, ‘Betebdongoboka nining kanya bon nang,’ tenen bingsunun ati ebman. Sun dama deirirandum dinyi ababyi ara beterdongon dinyi akwe kurur aryi, Niryi, ‘Ni li,’ tenenun, ebmar,” ebmou.
Sun Yehuda nang aryi Er Imtamnyi biti dama deirin ai Bait Allah ai sirya dobmai ura, Er Imtamnyi biryi sunsi kisal dangna dinyi karebmou uram deyok
2:16-20
16“Ura, uku talak aryi sunci diboka dibdendarur. Arub aryi kuboka aminda ababyi Niryi sunsi kisal dangna dinyi tamuboka karebkwansin. Ni dama deirin ai kum doabdau talak aryi sunci sukloboka Ni dama deirin dinyi nirya kum kareranindau. Ba, Niryi sunsi kwaning atan dinyi kareransise. 17Niryi sunsi, ‘Roti kiknin dinyi si gandum ikin 200 kilogram baryi boyandarur,’ eanse bok, sunci sukloboka ikin 100 kilogram baryi akwe boyangarandau. Ani, ‘Anggur du me uruna dam bindoka ikin 100 liter baryi kweyandarur,’ eanse bok, sunci sukloboka ikin 40 liter baryi akwe kweyangarandau. 18Ani, Niryi, ‘Wenebkwan,’ tenen sunsi yina-yina koun yina bok yirande dinyi ab, roti kiknin dinyi gandum tai ona ab asi boyandoka weneransise. Tonda, utotoa sun taruk aryi wa irandau dinyi nirya ara lumtaia mo ceboka obdeibmase. Ato kuboka kwaning atan kareansise bok, sunci tamuboka Ni dam kum yandobmandau, se, Er Imtamnyi biryi ato ebmar. 19Ura, arub ara toubne wala kubde ba, tanggal 24 baryi berekmar ura, Niryi sunsi tamuboka kisal dangna dinyi karebkwansin. Ati, arub berekmar uki tum ara Er Iya Erebdobnyi biti dama deirin ai yuma keil deibkwandum. Ati, aminda mabde binkwandum talak nirya ara sunci arub uki tum asi teneibde binkwandum. 20Co anggur ab, co si ara ab, co si delima ab, co zaitun ab ara yala deirin ai ton kum deirandau bok, uku talak ara Niryi sunsi kisal dakoka yina karebsinyi ba, yina ilinto kubkwamasir,” ebmou.
Er Iya Erebdobnyi biryi Zerubabel bisi, “Erebdeibkwankin,” eboka uram ebdeibmou deyok
2:21-24
21Wala toubne wala, tanggal 24 berekmou tum aryi Er Iya Erebdobnyi biryi nabi Hagai bisi liki bitinyi dinyi aryi ato ebmou. 22“Kanci Persia mutuk weik sienyi amwetam bukoka Yehuda mutuk kalingnamunyi si Zerubabel dam bindoka, ‘Er Imtamnyi bira ato ebmakir,’ ato ebdum. Niryi im ab tukwe ab asi lontokwaman. 23Sun sien nang-sien nang buraming sokon asi dangublobkwaman. Ani, yuk mutuk-yuk mutuk kalingnaming weik sien nang sun mikib nirya asi Niryi kum dandeibkwaman. Yin doun nang boban ai ara kuda aryi libtaleboka kongkong eboka boyibaraming ai asi Niryi dalublobnin yibinkwaman. Ba, Ni Imtamnyi sunsi ukubnyi ba, sun bisam kuda bon nang ara sun mamun obdankwaming ba, sun ab sun boraming kuda ab ara nirya dibsekwaming,” ebmou. 24Ato kuramnyi talak aryi Er Iya Erebdobnyi imtam yin doun nang sienyi biryi ato ebmou, “Sealtiel mi Zerubabel o, kanda Ni wa inanyi kurum. Kanda ni te du dongona ato tenen wiboka sienyi tikeibmakin,” ebmou.
Obecnie wybrane:
Hagai Uram 2: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)