1Korintus Uram 8
8
“Sun kwemdeina dinyi asi dama deirin yina ara dib tenen nang aryi ur yibwaming do kum do?” eboka eterebmou uram
8:1-13
1Ura, ni kwit yabwe, ukuryok ara, “Kwemdeina dinyi asi dama deirin yina asi nunda dib tenen nang aryi ur yibkwayeb do kum do?” tenen uram ton ebkwansin. Ba, a deyok ati yuma kobdob ebkwinsin uram ara ato ebkwinsin. Nun nirya ara, “Er Imtamnyi biryi nunsi bingna dinyi lak kibdeibsou,” tenen bingdaramib. Ba, ton nang ara, “Er Imtamnyi biryi nunsi bingna dinyi lak kibdeibsou,” tenerdaramingiryok, sun damnyi ererdeirirdaraming. “Nunda bingna dinyi bingnub,” tenen ererdana dinyi deici aryi nunci yuk nang kanya asi katabum ebdeibmatibyi do? Ato tenen kum. Eda, nun dib tenen nang aryi nun mamun boukwe kimdaramib dinyi deici aryi nunci nun mamun katabum erdeirirdaramib. 2Sun, “Er Imtamnyi biryi nunsi bingna dinyi lak kibdeibsou,” tenerdan nang ara sun damnyi erebdeibdamingnyei. Sun ato tenerdan nang ara bikdob dinyi langdeiboka kum bingnung. Eda, a nang ara deyok kouboka bikdob dinyi bingkaliraming nang kunung ati ebman. 3Ba, sun Er Imtamnyi bisi boukwe weik kimnaming nang ati Er Imtamnyi biryi, “Ni dam kun nang,” tenen bingsurur.
4Ati, ni kwit yabwe, kwemdeina dinyi asi dama deirin yina ati uram ton ebkwinsin. Nunda dib tenen nang aryi ato yina asi ur yibkwayeb do kum do? Nunda dib tenen nang ara kwemdeina dinyi ati, “Talyi dinyi aca,” tenen bingnub deyok aryi, nunci kwemdeina asi dama deirin yina ur yibkwayeb ati ebman. Nun Nai Imtamnyi tentok ara iya mikibnyi kurur ati nun nirya bingnub. Tonda, kwemdeina dinyi ara talyi dinyi akwe kurur ati nun bingnub. A deyok aryi, nunda dib tenen nang ara yina utotoa nirya ur yibkwayeb. Ara, kwemdeina dinyi asi dama deibmangnyi yina yibtibyi ababyi ara mem kuma. 5Sun Er Imtamnyi Uram walwal nang ara imtam kurande dinyi yuk-yuk ton tukwetam kurande dinyi yuk-yuk ton asi, “Nun nai yabwe, nun molonub nang,” eboka moloraming. Ato dinyi nirya ara kwemdeina dinyi yubwa-yubwa kuraming asi sunci, “Nun du, nun kwin,” eboka moloraming. A kwemdeina dinyi nirya ara mikib kum kunung. Eda, talyi dinyi akwe kunung bok, ninyi aryi, sunsi, “Nun nai yabwe erebdob nang,” eboka namnaming. 6Ato eboka moloraming bok, nunda dib tenen nang ara, “Nun Nai Imtamnyi tentok ara iya mikibnyi kurur,” tenen bingnub. Nun Nai Imtamnyi biryi imtam dinyi tukwetam dinyi nirya asi minob kiknibmou. Tonda, nun Nai biryi nunsi kiknibmasou ara, “Niryi teleb tenebnyi tok kunubde biting,” tenen kiknibmou. Tonda, nun Du Yesus Kristus bibabyi tentok akwe Er Iya Erebdobnyi kurur ati ebman. Nun Du biriman aryi Er Imtamnyi biryi imtam dinyi tukwetam dinyi nirya kiknibmou. Tonda, nun Du Yesus biriman aryi nunda dib tenen nang ara Er Imtamnyi mabwe nermabwe kibmoubwe.
7Nunda dib tenen nang kankan kuboka bikdob dinyi bingna nang ara, “Kwemdeina dinyi ara talyi dinyi aca,” tenen bingnub. Tonda, nunci, “Kwemdeina asi dama deirin yina ara ur yibkwayeb,” tenen bingnub. Ba, dib tenen nang nirya ara ato dinyi diboka kum bingnung. Dib tenen nang ton nang ara minob ura kwemdeina dinyi moloramnyi deyok aryi, sunci ukuryok ababyi ato teneraming. “Kwemdeina asi dama deirin yina yibtibiryok, nunda kwemdeina molon nang ato tamuboka kibdatibiryi, Er Imtamnyi urasintam aryi malyi dinyi kibmatibyi,” teneraming. Ati, a nang ara, “Kwemdeina dinyi asi dama deirin yina ara ur yinmanuba,” tenen kum kuraming. Eda, sunci kwemdeina dinyi asi dama deirin yina yibting uca, sunci “Malyi dinyi kunubmab se,” tenerdana akwe kubting. A nang ara sun kanya dam, “Malyi dinyi kunubmab se,” tenerdaramingiryi, sun kanya ara katabum kum erande deyok aryi, sunci, “Er Imtamnyi dam bindoka tuba molobibyei,” teneraming. 8Ba, Er Imtamnyi biryi nunti, “Ni dam kun nang,” tenen dorosurur ara nunci, “Kwemdeina ara talyi dinyi aca,” tenen kwemdeina yina asi ur yiramib deici aryi kum dorosurur. Tonda, nunci, “Kwemdeina ara mem dinyi,” tenen kwemdeina yina asi kum yiramib deici aryi Er Imtamnyi biryi nunsi kum dorosurur. Sun kwemdeina yin kum nang asi nunci, “Bikdob dinyi bingna kum nang,” tenebibyei. Tonda, sun kwemdeina yiraming nang ati nunci, “Bikdob dinyi bingna nang,” tenebibyei. Er Imtamnyi urasintam aryi a nang nirya ara neiktoto akwe kunung.
9Ba, sunda, “Yina yin dinyi utotoa ur yibkwayeb,” tenen bikdob dinyi bingna nang ara kalikdarur. Ati, sunci, “Nun kwit yabwe katabum kanya bon kum nang aryi yibmilibmasiting ura, sunci, ‘Manmalibmoubwe se,’ tenebingnyei,” tenen kalikdarur. Ara, sun kwemdeina yina asi yin kum nang ara sun kanya dam aryi, “Yina nun li,” teneramingiryok, sun kwit yabwe kwemdeina yina asi yirandum nang asi miliboka yibmating ura, “Manmalibmoubwe se,” tenebingnyei ati ebman. 10Sunda dib tenen nang kankan kuboka bikdob dinyi bingnandum nang ara, “Kwemdeina dinyi ara talyi dinyi akwe,” tenen bikmarum. Tonda, sunci kwemdeina dama deirin ai bindoka kwemdeina asi deibmangnyi yina asi yibdate. Ura, sun kwit dib tenenanyi ara bikdob dinyi bingna kumnyi biryi asing eibsute uca, erbabyi yibte. Ara, erci er kanya dam aryi, “Ur do mem do?” tuba tenebturyok, “Ni kwit yabwe dib tenen nang ur yibmang ati nibabyi yibkwan,” tenen yibte. 11Ura, sirya yibte ura, erci aminda aryi, “Kwemdeina molonanyi bitonyi tamuboka kibdanman se,” tenen tuba teneibdate uca, er kanya lukoka obdankwante. Ati, sun bikdob dinyi bingna nang aryi, “Nun kwit biryi kwemdeina yina yibingiryi manmalibcei,” tenen diboka kum kalikdate uca, sun kwit yibte uca, er kanya lukoka obdankwante. Ara, nun Du Yesus Kristus dibmou ara sun kwit bibabyi lebdeibkwamwe ati dibmou bok, sunci sun kwit bisi kwemdeina molonanyi bitonyi tamuboka kibdate ati ebman. 12Sunda bikdob dinyi bingna nang aryi sun damnyi kalingdana kum uca sun kwit yabwe katabum kanya bon kum nang urasintam aryi kwemdeina yina asi yibmunyi uca, sunci nun Du Yesus Kristus urasintam aryi malyi dinyi kubmunci. Ara, sun kwit yabwe katabum kanya bon kum nang aryi sirya yibingnyi uca, “Kwemdeina dinyi yibmab se,” tenebingnyi deyok aryi, sunci nun Du Yesus urasintam aryi malyi dinyi kubmunci. 13A deyok aryi, niryi ato tenen kunubde banun. “Kwemdeina asi dama deiriraming yina ara ur yibkwan,” tenen bingnun. Ba, niryi, “Kwemdeina asi dama deirin yina asi yibniryok, ni kwit dib tenenanyi bisi bowanikminiknyei,” tenen bingnun uca, niryi kwemdeina yina utotoa ton kum yibtinyi ati ebman.
Obecnie wybrane:
1Korintus Uram 8: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)