1Korintus Uram 3
3
“Sun dib tenen nang aryi lulubdandoka yuk-yuk bongdana mem,” eboka eterebmou uram
3:1-23
1Ni kwit yabwe dib tenen nang. Niryi sunsi nun Du Yesus uram Teleb Uram minob etereransise ara, “Er Imtamnyi Kanya Roh Kudus aryi eteresurur to bikoka milin nang kunung,” tenen kum etereransise. Eda, niryi sunti, “Tukwetam kanya bon nang tuba kubmang,” tenen etereransise. Tonda, niryi sunti ato teneransise. “Nun Du Kristus bisi dib teneramingiryok, nebdob kum kanya boraming uca, dib tenen dinyi ati bikdob dinyi kum bingnaming.” Ato tenen etereransiryi, niryi sunsi nebdob kanya bon nang aryi bingdoraming bikdob uram kum etereransise. 2Sunda dib tenena ati alok mabwe ato kurandau deyok aryi, niryi sunsi etereransisiryi, caknam bingna dinyi ara moum yung dinin dinyi ato eterena etereransise. Kwaning ato dinyi ati yibman kum kurandau ati, niryi sunsi yongon yina dinin dinyi ato etereransise. Kwaning dib ati ato kum ebman. Eda, nebdob kanya bon nang aryi bingdoraming bikdob uram eterena ati ato ebman. Sunda minob talak aryi bikdob uram bikdobmanto kum nang kurandau ani, ukuryok ababyi bikdobmanto kum nang kurandum. 3Ukuryok ababyi sunda nebdob kanya kum borandum deyok aryi, tukwetam kanya bon nang kuraming to dinyi tuba kurandum ati ebman. Sunda dib tenen nang ara sun mamun yu kanya bordarandum cok, lulurdarandum ati ato ebmasin. Sunci ato kuboka tukwetam dinyi tenen nang kuramingnyi tok malyito kunurandum se. 4Sun kankan asi ton nang ara, “Nunda Paulus milin nang kunub,” erandum. Tonda, yuk nang aryi, “Nunda Apolos milin nang kunub,” erandum. Sunci ato kuboka lulubdandoka yuk-yuk bongdarandum deyok aryi, tukwetam dinyi tenen nang ato kunubde barandum ati ebman.
5Nun kwit Apolos bira Erebdobnyi kurur do? Ato tenen kum. Ni Paulus bira sienyi kunun do? Ato tenen kum. Nunda Er Imtamnyi biryi wa irmilin nang akwe kununum ati, sunci nunsi erebdeibsumunyei. Ara, Er Imtamnyi takubdeibsou to, nun Du Yesus uram Teleb Uram etereransunoumwe biriman aryi sunci dib tenerandau. Ara, nun Du Yesus biryi nun yuk-yuk asi wa kareboka takubdeibsou to, nun yuk-yuk aryi kunubde baranoumwe uca, sunda Korintus nang aryi nun Du Yesus bisi dib tenerandau. 6Ni Paulus bira yala kounanyi bitonyi kuransiryi Teleb Uram eterebkalibsise. Ani, nun kwit Apolos bira kulonga deirinanyi bitonyi kuramuryi, Teleb Uram lilibdeiboka eterertabangdansou. Ato kuboka wa irmiliranumuryok, ni ab nun kwit ab aryi sunsi du mourdeirisin dinyi kum kareransumwe. Eda, nun Nai Imtamnyi biryok sunsi du mourdeirsin dinyi karebmasou. 7Yala kounanyi bira mourdeirin dinyi kum karebte deyok aryi, Erebdobnyi kum kurur. Tonda, kulonga deirinanyi bibabyi du mourdeirisin dinyi kum karebte deyok aryi, erbabyi sienyi kum kurur. Nunda wa irmilin nang ara talyi nang akwe kunub. Ba, Er Imtamnyi abdeiboka du mourdeirin dinyi karesururnyi kurur ati, Erda iya weik sienyi kurur. 8Yala kouna nang ab kulongna deirin nang ab ara yuk-yuk tenen dinyi kum boraming. Eda, sunci neik kanya boboka, “A yala ara nong abturyi, du moubte,” tenen wa tonkwa iraming. Ura, nunda Er Imtamnyi wa irmilin nang yuk-yuk aryi wa iramib ara wa ilinto iramibyi kum, wa mitikanun iramibyi to, Er Imtamnyi biryi nun wa iramibyi kikib dekeiboka kisal dakwansir. 9Nun kwit Apolos ab ni Paulus ab ara Er Imtamnyi wa irmilin nang kununum. Ba, sunda dib tenen nang ara Er Imtamnyi waram ato kurandum. Tonda, sunda dib tenen nang ara Er Imtamnyi biryi dorur ai ato kurandum.
10Er Imtamnyi biryi nisi kisal dakoka wa karebnou to, nira ai dona ati bingna deyoknyi bitonyi biryi tukwe liliboka ai ererdeirin keil deibmasise. Ara, niryi deyok kouboka Teleb Uram eterenun deyok ati ato ebman. Ani, yuk nang aryi yangnyi ura, akai ererdeirin keil deici asi ai doraming to kuboka eteretabangsunung. Ara, sun aminda aryi Teleb uram tamuboka etereraming nang ati ato ebman. Ba, ai don nang kankan asi ton nang ai doraming ara telebto doraming. Bok, yuk nang aryi ai doraming ara diboka kum doraming. Ati, sun Teleb uram eteren nang ara ai doramingnyi nang ato kun nang yuk-yuk aryi, “Ni ai donman ara telebto donman do kum do?” tenen kalikdandoka Teleb Uram diboka eterebting. 11Ai ererdeirin keil ara tentok akwe kurur ati ebman. Nun Du Yesus Kristus bira nun dib tenena ati ai ererdeirin keil kurur. Ai ererdeirin keil yuk keil kum kurur ati, ai don nang ara nun Du Yesus bisi barwetam deiboka ai ererdeirin keil yuk keil asi deibingnyei. 12-13Ura, sun kankan aryi kuboka, “Bikdob dinyi eterebkwansib,” eboka eteren nang ara ai ererdeirin keil deici aryi ai doraming nang ato kunung. Ara, nun Du Yesus uram dib en uram deici aryi ai doraming nang ato kunung. Ton nang ara emas ato dinyi doboka perak ato dinyi doboka dengna weik keil yuk-yuk ato dinyi doboka ai doraming. Ba, yuk nang ara co ato dinyi doboka maning ato dinyi doboka ai doraming. Ura, nun Du Yesus tamuryankwande uki tum berekci ura, Erci sun, “Bikdob uram eterebkwansib,” en nang aryi wa iboka eteren dinyi nirya asi diboka lilibkwande. Ara, sun bikdob uram diboka eteren nang asi nun Nai biryi, “Ai teleb dobmarum,” eboka kisal dakwande. Ba, sun talyi uram eteren nang asi nun Du Yesus biryi, “Malyi ai dobmarum se,” eboka lak kerebkwande. Uk aryi co ab maning ab yirande to, nun Du Yesus biryi talyi eteren dinyi nirya asi kum daneibkwande. Ba, dengna weik keil ara uk aryi kum yirande. Eda, uk ara malyi keil asi yirur bok, teleb keil dengna weik keil asi kum yirur ba, lak kimdeirirur. Ato kuboka nun Du Yesus biryi nun yuk-yuk aryi etereramib dinyi asi liliboka, “A dinyi ara teleb, o dinyi ara malyito,” eboka lak kibdeibkwande. 14Ura, sun uk yibman kum ai doramingnyi nang asi Er Imtamnyi biryi kisal dakoka dekeibkwande. 15Co doboka maning doboka ai doramingnyi nang ai ara uk yibkwande uca, nun Du Yesus biryi a nang aryi wa iramingnyi to kikib dekeiboka kisal kum dakwande. Sun Teleb Uram eteren nang kankan asi diboka kum etereransingnyi nang ati ato ebman. A malyi ai don nang ara dib tenen nang kuraming deyok aryi, Er Imtamnyi biryi sunsi lebkwande. Lebkwande bok, a nang ara uk si bisik koubkaboka yandobingnyi nang ato kuboka lemsin dinyi dobdobkwaming.
16Ura, sunda dib tenen nang ara Er Imtamnyi dam kun ai ato kurandum ati sun kum bikmarum do? Er Imtamnyi Kanya Roh Kudus ara sunda dib tenen nang kankan asi iya kusurur ati walwal kurandum do? 17Nunda dib tenen nang ara antaniboka Er Imtamnyi dam kurur ai ato kunub. Ati, nunci lulubdandoka yuk-yuk bokdabibyei. Yuk-yuk bokdanmatibyi ara Er Imtamnyi dam kun ai kum daneibmatibyi ati ebman. Er Imtamnyi biryi Er ai ati, “Ni dinyi,” tenen talerur. Ati, unanyi-unaner aryi Er Imtamnyi dam kun ai dakoka kum daneibingnyi uca, Er Imtamnyi biryi a nang asi weneboka kum daneibkwande. Ati, sunda dib tenen nang ara sun damnyi ati, “Nunda antaniboka Er Imtamnyi biryi wibdeibsou ai ato kunub asi nunci kum daneibdabyei,” tenebmunci, sunci lulubdandoka yuk-yuk bokdamunyei. Ara, “Er Imtamnyi biryi wenebsicei,” tenen sunci lulubdandoka yuk-yuk bokdamunyei ati ebman.
18Sun dib tenen nang aryi sun damnyi bowanikminikdamunyei. Sun kankan aryi kuboka, “Tukwetam kanya bon nang aryi bikdob tenen dinyi deib aryi, nunda bikdob nang kunub,” tenerdaramunyi nang asi uram ton ebkwan. Sunci tukwetam kanya bon nang aryi bikdob dinyi tenena ati taklobdarur. Uca, ninyi aryi sunti, “Lub nang aca,” tenebsingnyi ababyi, sunci, “Er Imtamnyi biryi eterebkwansir bikdob dinyi ara iya bikdob dinyi kurur,” tenen iya bikdob dinyi tenebdarur. 19Sun tukwetam kanya bon nang aryi bikdob tenen dinyi ara Er Imtamnyi urasintam aryi bikdob tenen kum dinyi ato kurur. Er Imtamnyi Uram umbura ara a deyok ati ato esurur.
“Sun tukwetam nang ara, ‘Nunda bikdob dinyi bingna nang kunub,’ tenen, ‘Ato-ato kubkwayeb,’ tenen kunubde baraming bok, Er Imtamnyi biryi sunsi bisibkaboka iya bikdob dinyi bingdurnyi biryi sunsi bisik sengdur.” (Ayub 5:13)
20Tonda, Er Imtamnyi Uram yuk tam ara a deyok ati ato esurur.
“Sun tukwetam aryi kuboka bikdob dinyi bingna nang aryi teneramingnyi to ara nun Nai Imtamnyi biryi bingdur. Ara, nun Nai biryi a tenen dinyi ati, ‘Talyi dinyi aca,’ tenen bingdur.” (Mazmur 94:11)
21Ati, nunci tukwetam nang tenen dinyi ati, “Talyi dinyi aca,” tenen bingnub deyok aryi, nunci ato uram asi erebdeiboka kisal dakmurubmunyei. Imtam dinyi ton tukwetam dinyi ton nirya ara sunda dib tenen nang sun dinyi kurur ati sunci tukwetam aryi kuboka talyi dinyi erebdeibmunyei. 22Nunda Paulus ab Apolos ab Petrus uruma si Kefas ara sunda dib tenen nang asi dirnilisunub deyok aryi, sunci nunti, “Nun wa irmilin nang,” tenesina teleb. Tonda, tukwetam kurande dinyi nirya ara sun dinyi kurur. Kam kubde barandum ababyi dibkwandum ababyi utotoa nirya ara sun dinyi kurur. Ukuryok kurandum talak ababyi aminda aryi kubde binkwandum talak ababyi utotoa nirya ara sun dinyi kurur. Imtam tukwetam dinyi nirya ara sun dinyi kurur ati ebman. 23Ba, sunda dib tenen nang ara nun Du Yesus Kristus biryi, “Ni dinyi,” tenen talesurur nang kurandum. Ba, nun Nai Imtamnyi biryi nun Du Yesus Kristus biti, “Ni dinyi,” tenen talerurnyi kurur.
Obecnie wybrane:
1Korintus Uram 3: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)