1Korintus Uram 1
1
Paulus biryi sun Korintus atei kuboka dib tenen nang asi, “Ni kwit yabwe, teleb,” ebmou uram
1:1-3
1Ni Paulus ab nun kwit dib tenenanyi Sostenes ab aryi sunda Korintus atei kurandumci, nun Du Yesus Kristus bisi dib tenerandum nang asi, “Nun kwit yabwe, teleb,” eboka kerek sekeibmasinim. Ni Paulus bira nun Du Yesus Kristus biryi, “Teleb Uram etererbirum,” eboka bokdonoknounyi kunun. Ara, nun Nai Imtamnyi biryi niti teleb tenebnou uca, nun Du Yesus biryi nisi bokdonoknou uca, niryi nun Du Yesus uram Teleb Uram eterebde banun. 2Ati, nunci sunda Korintus atei kuboka dib tenen nang asi kerek sekeibmasinim. Sunda Er Imtamnyi biryi naboka bulubdeibsou uca, Er Uram kunubde ban nang kurandum. Tonda, sunda nun Du Yesus Kristus dam kun nang kurandumci, sunci sun damnyi karebdandoka Er Imtamnyi bisi milirandum. Er Imtamnyi biryi sunsi nabdeibsou ara, “Kilibdob kanya boboka Ni uram kunubde bindarur,” eboka nabdeibsou. A kerek sengna kerek sekeibmasinim ara sunda Korintus atei kuboka dib tenen nang akwe kum kerek sekeibmasinim. Eda, sun im dangna tukwe dangna mutuk kuboka dib tenen nang yuk nang nirya ababyi nisintum kerek sekeibmanim. Ara, nun Du Yesus Kristus si weik eboka moloramingnyi nang yuk nang nirya ababyi nisintum kerek sekeibmanim. Nun Du bira sunbabyi nunbabyi nun Arungdeirisururnyi kurur ati ato ebman. 3Nun Nai Imtamnyi ab nun Du Yesus Kristus ab aryi sunsi kisal dangsina teleb. Tonda, nun Nai ab nun Du Yesus ab aryi sunsi antanirdeirisina teleb.
Paulus biryi Er Imtamnyi bisi, “Ei, ni Nai,” ebmou uram
1:4-9
4Nun Nai Imtamnyi biryi nun Du Yesus Kristus biriman aryi sunda Korintus atei nang ati, “Ni mabwe nermabwe,” tenen dobdobmou deyok aryi, niryi Ersi tuba-tuba, “Ei, ni Nai,” enun. 5Sunda nun Du Yesus dam kun nang yuk-yuk asi nun Nai Imtamnyi biryi mikib dinyi ab bingna dinyi utotoa langdeiboka karebmasou. Sun yuk-yuk aryi ato dinyi langdeiboka dobdobmarum deyok aryi, sunci nun Du Yesus deyok ati dib en uram yuk-yuk lak erandum. Tonda, nun Du Yesus uram bikdob uram diboka bingnandum. 6Sunci nun Du Yesus Kristus Uram dib en uram kekebmandau cok, sunci a uram ati, “Dib en uram aca,” tenebmandau ani, ukuryok ababyi dib tenerandum. Ati, sunci a uram dib tenerandum to, nun Du Yesus deyok ati dib en uram diboka bikoka lak erandum. 7Nun Nai Imtamnyi biryi sunsi mikib dinyi ab bingna dinyi nirya utotoa karebmasou ati ebman. A deyok aryi, imtam aryi kuboka karesin dinyi ton kum sunsi sungloransir. Ara, sunci, “Nun Du Yesus bira Erdamnyi lak kibdandoka imtam aryi kuboka minola tamuryuryate se,” tenen dibde burandumci, imtam aryi kuboka karesin dinyi sunti kum sungloransir. 8Nun Nai biryi mikib kuboka sun dib tenena asi tuba-tuba katabum ebdeibde basici ani, nun Du Yesus Kristus imtam aryi kuboka tamuryuryankwande. Ara, “Sirya kobdob uki tum berekci ura, Ni Imtamnyi urasintam aryi tatab-tatab ebman kum kubting,” tenen nun Nai Imtamnyi biryi tanglona kum uca sun dib tenena asi katabum ebdeibde basurur. 9Nun Nai Imtamnyi bira uram ton ebdeibmaci ura, Erci diboka kunubde barur ati ebman. Nun Nai Imtamnyi bira, “Ni Mi Yesus Kristus dam kun nang kubting,” tenen nabdeibsounyi biti ato ebman. Er Imtamnyi Mi bira nun arungdeirisururnyi kurur ati ebman.
“Sun Korintus atei kurandum dib tenen nang ara neik kanya tuba kum borandumci, yuk-yuk bokdanmarum se,” eboka kerebmou uram
1:10-17
10Ni kwit yabwe dib tenen nang, sun nirya ara neik kanya boboka neik uram lak eramunci, sun mamun lulubdamunyei. “Nun Du Yesus Kristus biryi bokdonoknounyi kunun deyok aryi ni uram kunubting,” tenen niryi ato eboka ebkatabdeibmasin. Tonda, sunci yuk-yuk bokdamunyei. Eda, sunci sunglona kum uca neik kanya boboka antanibdandoka kubdarur. 11Ni kwit yabwe dib tenen nang. Dib tenen ner si Kloe mabwe silib aryi kuboka ton nang ara nisi yandoka sunda Korintus nang ati, “Sun mamun lulubdanmang,” eboka nukmasei ati ato ebman. 12Ara, a nang aryi nukmanei to, sun kankan kuboka dib tenen nang ton nang ara ato eraming. “Nunda Paulus milin nang kunub.” Ba, yuk nang aryi, “Nunda Apolos milin nang kunub,” eraming. Ba, yuk nang aryi, “Nunda Petrus uruma si Kefas milin nang kunub,” eraming. Tonda, yuk nang ara, “Nunda Kristus milin nang kunub,” eraming. Sunci ato ebdandoka sun yuk-yuk bokdanmarum ati ebman.
13Nun Du Kristus bira bongdeirina kum uca tentoknyi kurur deyok aryi, nunda Er milin nang ababyi neiktoto neik kanya boramibiryok, yuk-yuk bokdabyei. Tonda, ni Paulus bira sunti kum dibmasiryi, sun lemsinanyi kum kunun. A deyok aryi, sunci, “Nunda Paulus milin nang kunub,” ebnumunyei. Ni Paulus bisi co lase deici aryi deibmanei uca, niryi sunti dibmasise do? Ato tenenina kum. Tonda, me dongobmasei ba, Paulus si deici aryi me dongobmasei do? Ato tenenina kum. 14Ni ab sun Korintus nang ab tonkwa kuramaburyi, niryi ninyi mitikanun me dongobmase. Ara, Krispus ab Gayus ab me dongobmase. Ati, niryi, “Ninyi aryi nisi talyi ati erebdeibningnyei,” tenen ninyi mitik akwe me dongobmase. Yuk nang ara me kum dongobmase deyok aryi, niryi Er Imtamnyi bisi, “Ei, ni Nai,” enun. 15Ara, “Ninyi tentok ababyi, ‘Paulus si deici aryi me dongobmanou,’ ebnicei,” tenen niryi ninyi mitik akwe me dongobmase. 16Ura, Stefanus er mabwe silib ababyi niryi me dongobmase. Ba, niryi teneinun to, yuk nang ton kum me dongobmase ati ebman. 17Nun Du Kristus biryi nisi bokdonokmanou ara, “Ninyi me dongobdum,” eboka kum bokdonokmanou. A deyok aryi niryi ninyi mitikanun akwe me dongobmase. Eda, Erci, “Ni sun Du uram Teleb Uram lak eterebde birum,” eboka bokdonokmou. Teleb Uram eterebde banunci, niryi, “Kekebting,” tenen tukwe nang aryi, “Bikdob,” tenen uram doboka kum eterenun. Ato en uram etererantinyi uca, niryi nun Du Yesus co lase deici aryi dibmounyi uram Teleb Uram bisik sektinyi. Eda, “Nun Du Kristus co lase deibmunyi biriman aryi Er Imtamnyi mabwe nermabwe kibting,” tenen niryi nun Du Yesus deyok ati lak en uram akwe eterebde banun.
“Er Imtamnyi biryi karebmasou uca, nun Du Yesus Kristus bira imtam aryi kuboka bikdob uram eterena deyoknyi kururci, iya mikibnyi kurur,” eboka eterebmou uram
1:18-31
18Ati, Teleb Uram eterebde banunci, niryi, “Nun Du bira co lase deici aryi dibmounyi bisi dib tenebmunyi uca, Er Imtamnyi mabwe nermabwe kibdarur,” eboka eterenun. Ato eboka Teleb Uram lak eterenun bok, sun dib tenen kum nang ara a uram ati, “Lub talebdob nang uram aca,” teneraming. Sun ato tenen nang ara iya din dinyi dobdobkwaming ati ebman. Ba, nunda dib tenen nang ara Er Imtamnyi biryi lebde basurur nang ara Teleb Uram ati, “Lub talebdob nang uram aca,” tenena kum kunub. Eda, nunci a uram ati, “Er Imtamnyi biryi karebmasou uram ara mikib weik uram kurur,” tenenub. 19Er Imtamnyi Uram umbura aryi a deyok ati ato eboka kerek sekeibmou.
“Sun tukwetam nang aryi sun damnyi biti, ‘Nunda bikdob nang kunub,’ tenerdaraming bok, Nira Imtamnyi biryi sun bikdob dinyi kum daneibkwan.
Tonda, sun bingna nang aryi bingna dinyi asi niryi bisik sekoka, ‘Talyi dinyi aca,’ eboka lak kibdeibkwan,” eboka sekeibmou. (Yesaya 29:14)
Ati, a uram deib aryi nunci, “Imtam aryi kuboka bikdob dinyi ara tukwetam aryi kuboka bikdob dinyi asi outam kimdongorur,” tenen bingnub.
20Er Imtamnyi urasintam aryi ninyi tentok ababyi bikdobnyi a kubmar do? Ato tenen kum. Sun tukwetam nang kankan asi bingna dinyi liliboka diboka bikmaranyi ton a kubmar do? Ato tenen kum. Bikdob dinyi bikoka silalum caknam eboka eterenanyi a kubmar do? Ato tenen kum. Sun tukwetam nang aryi, “Bikdob dinyi bingnub,” tenerdaraming bok, Er Imtamnyi biryi sun bikdob dinyi nirya ati, “Talyi dinyi akwe,” eboka lak kibdeibmou. 21Nun Nai Imtamnyi iya bikdobnyi biryi teleb tenebsou to, nunda tukwetam nang aryi bikdob teneramib dinyi biriman aryi nunci Er Imtamnyi bisi kum bingnub. Eda, “Nun Du co lase deici aryi dibmasounyi biryi lebdeibmasou,” en uram biriman aryi Er Imtamnyi bisi bingnub. Ara, Teleb Uram ara tukwe kanya bon nang aryi, “Talyi dinyi aca,” teneraming dinyi biriman aryi nun Nai biryi sun dib tenen nang lebde basurur. A deyok aryi, niryi, “Er Imtamnyi biryi tukwetam nang aryi bikdob tenen dinyi ati, ‘Talyi dinyi aca,’ eboka lak kibdeibmou,” ebmasin. 22Sun Yahudi yala nang kankan asi dib tenen kum nang ara, “Ilil tenen dinyi kunubdate uca, dib tenebtibyi,” eramingiryok, nun Du Yesus uram Teleb Uram dib kum tenenung. Tonda, sun Yunani yala nang kankan aryi dib tenen kum nang ara, “Tukwetam nang bikdob dinyi akwe ingkirikoka kekebde banub,” teneramingiryi, nun Du Yesus co lase deici aryi dibmasounyi biti uram ati, “Talyi uram aca,” teneraming. A deyok aryi, niryi, “Tukwetam nang aryi bikdob dinyi biriman aryi Er Imtamnyi bisi kum bingnub,” ebmasin. 23Sun Yahudi yala nang babyi Yunani yala nang babyi, “Talyi uram aca,” teneraming bok, niryi nun Du Yesus Kristus uram Teleb Uram eterenun. Ara, “Nun Du Kristus co lase deici dibmounyi biriman aryi Er Imtamnyi mabwe nermabwe kibdeibsou,” en uram lak eterebde banun. Uca, sun Yahudi yala nang kankan asi dib tenen kum nang aryi a uram kekeramingiryok, sunci, “Ato en uram dib tenena nun li,” teneraming uca, nun Du Yesus uram Teleb Uram ara sunti yan dum dungna keil ato kimdur. Ba, sun Yunani yala nang kankan asi dib tenen kum nang ara a uram kekeramingiryok, sunci, “Talyi uram eteresunung se,” tenesunung. 24Ba, nunda Er Imtamnyi biryi nabdeibsou dib tenen nang ara nun Du Yesus Kristus biti, “Er Imtamnyi biryi bokwetebmasou mikibnyi,” tenen bingnub. Tonda, nunci nun Du Yesus biti, “Er Imtamnyi iya bikdob tenen dinyi lak kimdeirisururnyi,” tenenub. Ara, sun Yahudi yala nang kankan ababyi yuk yala nang kankan ababyi nabdeibsou nang ara nun Du Yesus biti ato tenen bingnub. 25Nun Nai Imtamnyi bira iya bikdobnyi kurur. Tonda, nun Nai bira iya mikibnyi kurur. Ba, tukwetam nang aryi nun Du Yesus uram Teleb Uram, “Talyi uram aca,” tenen, “Co lase deici aryi dibmounyi uram ara mikib uram kuma,” teneraming. Ato teneraming bok, a uram ara iya bikdob uram ab, iya mikib uram ab kurur. Teleb Uram ara tukwetam nang aryi bikdob tenen dinyi bisibkaboka iya bikdob dinyi kurur. Tonda, a uram ara nun Du Yesus Uram ara tukwetam nang aryi mikib dinyi nirya outam kibdongoboka iya mikib kurur.
26Ni kwit yabwe dib tenen nang. Er Imtamnyi biryi bikdob dinyi bingna nang ilinto asi kum wimdeirirur. Eda, Erci wimdeirirur nang ara talyi nang bikdob dinyi bingna kum nang ilinto asi wimdeirisurur ati ebman. Sun minob kurandau to tubto teneibdarur. Er Imtamnyi biryi sunsi kum nabdeibsou ba, sun kankan asi tukwetam dinyi bikdob dinyi bingna nang ilinto kurandau do? Ato tenen kum. Nun Nai biryi sunsi nabdeibsou ba, sun kankan asi sien nang ilinto kurandau do? Ato tenen kum. Sun kankan asi weik nang ilinto kurandau do? Ato tenen kum. 27Ati, tukwetam nang aryi, “Talyi nang aca,” teneransing bok, Er Imtamnyi biryi, “Ni mabwe nermabwe kibdeibkwan,” tenen nabdeibmasou. Ara, nun Nai biryi, “Sun tukwetam bikdob dinyi bingna nang asi bisiboka alyi bobdongobkwan,” tenen taklobmou cok, nunda bikdob dinyi bingna kum nang asi wibdeibsou. Tonda, Erci, “Sun tukwetam aryi kuboka weik nang asi bisiboka alyi kibdeibkwan,” tenen taklobmou cok, nunda malyi talyi kun nang asi wibdeibsou. 28Nun Nai biryi wibdeibsou ara tukwetam nang aryi, “Talyi nang aca,” teneransing nang asi wibdeibsou. Tonda, tukwetam nang aryi ina ngilingnansing nang asi wibdeibsou. Tonda, “Tukwetam bun nang,” teneransing nang asi wibdeibsou. Ara, sun tukwetam nang aryi sun damnyi ererdeirirdan tenen kunubde ban dinyi nirya kum daneibkwamwe ati nun Nai biryi tukwetam bun nang asi wibdeibsou. 29Er Imtamnyi biryi sun tukwetam bun nang asi wibdeibmou. Ara, “Ninyi tentok ababyi erdamnyi erebdeibdandoka Ni urasintam aryi, ‘Nira telebnyi kunun deyok aryi, Er Imtamnyi biryi nisi wibdeibnou,’ ebcei,” tenen nun Nai biryi tukwetam bun nang asi wibdeibmou. 30Er Imtamnyi biryi sunsi muna wibdeibsou uca sunda nunda Kristus Yesus dam kun nang kurandum. Nun Du bira Er Imtamnyi biryi bikdob dinyi bingna deyoknyi kibsou uca, nunda Er dam kun nang ababyi imtam aryi kuboka bikdob dinyi bingna nang kunub. Tonda, nun Du Yesus bira Er Imtamnyi urasintam aryi teleb dinyi akwe kunururnyi kurur uca, nunda er dam kun nang ababyi Er Imtamnyi biryi, “Ni mabwe nermabwe,” tenen dobdobsou nang kunub. Tonda, nun Du Yesus bira teleb kanya boboka Er Imtamnyi dam kururnyi kurur uca, nunda er dam kun nang ababyi kilibdob kanya boboka Er Imtamnyi dam kun nang kunub. Tonda, nun Du Yesus bira ninyi Lemsinanyi kibsou uca, nunda Er dam kun nang ara nun Du Yesus biryi lebdeibsou nang kunub. 31Nun Nai Imtamnyi biryi a dinyi nirya muna karebsou deyok aryi, nunci nun damnyi erebdeibdandoka, “Nunda bikdob nang kunub,” ebibyei. Eda, Er Imtamnyi Uram umbura aryi kerek sekeibmou to kunubkwayeb. Ara, Er Imtamnyi Uram umbura aryi ato esurur. “Unanyi-unaner ara, ‘Kisal dangna uram ton lak ebtinyi,’ tenebingnyi ura, a nang ara nun Nai Arungdeirisururnyi bisi si weik eboka kisal dakwanung,” ebmou.
Obecnie wybrane:
1Korintus Uram 1: MTG
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
@LAI 2007 (New Testament), @LAI2022 (Old and New Testament)