Ezekiel 41
41
1Mapalal thoda man ando cher e Devleko, ta llinda e direkura, ta o bulipe saia trin pole pe iek rig, ta trin pe ogoia rig kai saia o bulipe katar e chara. 2O bulipe katar o udar sai panch pole, ta e riga katar o udar saia len dui pole ta dopas pe suako rig. Ta llinda e pole katar leko lungipe ta saia le bis pole ta des pole ando bulipe saia. 3Ta dia andre ta llinda suako direko katar o udar, ta saia len iek pola, ta o udar saia le trin pole. 4
E sobe kai si pasa o zido
5Mapalal llinda e pole katar o zido e chereko, ta saia le po trin pole ta po dui pole ando bulipe truial katar o cher. 6E sobe kai sea pe iek rig sea thode iek upral pe aver trin droma po tranda, avrial katar o zido saia iek thana te sai istardon upral e sobe ta te na cheren zor po zido. 7Ta suako soba kai saia upral pe aver saia mai buli iek katar aver, e eskalera e chereki kai llala truial likela chak upre andral katar o cher, goleke, o cher saia mai bulo upre. Katar e soba kai saia tele sai likelape kai e soba kai saia po maskaral, ta kotar sai likelape mai upre. 8Ta llindem e pole truial katar o cher ta e barra kai sea telal saia len trin pole sargo iek kaña ando lungipe. 9O bulipe katar o zido kai si avri katar e sobe saia len dui pole ta dopas, ta i e sobe saia len dui pole ta dopas. 10Ta po maskaral katar e sobe saia des pole ando bulipe sogo si truial andral katar o cher e Devleko. 11Suako soba likela karing gua than kai achela, iek udar dela karing o norte, ta aver karing o sur, ta o bulipe katar o than kai achela saia le dui pole ta dopas sogo si truial.
O cher katar e rig kai likel o kham
12Ta o cher kai saia pe rig kai likel o kham angla o than putardo, saia le tranda ta panch pole ta o zido kai saia truial katar o cher saia le dui pole ta dopas ando bulipe ta saia le saranda ta panch pole ando lungipe.
Sa e pole kai saia le o cher e Devleko
13Mapalal llinda e pole katar o cher, ta saia le pinda pole ando lungipe, ta o than kai saia putardo ta o cher ta leke zidura, ta saia le pinda pole ando lungipe. 14Ta o bulipe katar o cher anglal ta katar o than putardo kai saia karing perel o kham saia le pinda pole. 15Ta llinda o lungipe katar o cher kai saia angla o than putardo kai saia pala le, ta e sobe kai sea pe iek rig ta pe ogoia, ta sea pinda pole, ta o cher e Devleko kai saia andre ta e udara katar e bar.
Aver ezgode katar o cher e Devleko
16O than kai delpe andre ta e penllerave tangune ta e sobe kai sea truial po trin iek upral pe aver sea ucharde ande kotora kastune katar e phuv llik kai e penllerave, ta i e penllerave sea ucharde. 17Upral po udar ta llik kai o cher kai si andre, ta avri letar, ta pe sa o zido truial andral ta avrial, llinda e pole. 18Ta cherdea pe lende kerubinura ta palmere, ta maskar suako kerubin saia iek palmera, ta suako kerubin sea le dui muia, 19iek mui manuseko, ta o gua mui lionoko karing e palmera pe ogoia rig, pe sa o cher truial. 20Katar e phuv chak upral po udar sea cherde kerubinura ta palmere, pe sa o zido katar o cher e Devleko. 21Suako direko katar o cher e Devleko saia le star riga, ta anglal katar o santuario saia sargo ogoia rig anglal.
O altar kastuno
22O altar saia le iek pola ta dopas llik upre, ta saia le iek pola ando lungipe, ta saia kastuno. Ta o manus phenda mange:
Gava si o stali kai si angle o Del.
E udara
23O cher e Devleko ta o santuario sea len dui udara. 24Ta pe suako udar saia la dui kotora kai boldena, diu pe iek udar, ta dui pe o gua udar. 25Pe udara katar o cher e Devleko sea cherde kerubinura ta palmere, sargo gola kai sea pe zidura, ta anglal katar e bar kai si avrial saia iek udar kastuno. 26Ta sea penllerave tangune, ta palmere pe iek rig ta pe ogoia rig katar o udar, gia sea e sobe katar o cher ta e udara.
Obecnie wybrane:
Ezekiel 41: BACHRO
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Biblia ande chib Romani © Sociedad Bíblica Chilena, 2018.
