Daniel 9
9
O Daniel molilpe pala po foro
1Ando purvo burs katar o gazdaripe e Darioko, chaurro katar o Asuero, kai saia katar e vicha katar e medura, kai reslo te avel charo pe charoina katar e kaldeura, 2ando purvo burs kana vou charoila, me o Daniel dikhava ande lila e bursa kai phenda o Del e Jeremiaseke, cheres e eftavardes burs kai saia te nakhel o Jerusalem ande zatranie. 3Ondaka thodem mo mui karing o Del amaro Gazda, rodiem le ando molipe ta ando alluno, thodem patave zalosne ta beslem po prajo. 4Ta molisailem e Devleke mo Gazda ta phendem leke so saia ande mo lio gale alavenchar:
Devla Gazda barea, kai si tut sa e zor, kai kana de cho alav chere le ta sikave cho volipe e llenenge kai volin tut ta kanden che alava,#Nej 1.5-11; 9.6-37. 5amen cherdam o bilachipe ni kandiam ta durilam katar che zakonura ta katar che alava. 6Ni thodam sama che slugenge e poraukura, kai ande cho anav die orba amare charonenge ta amare llenenge kai gazdarina, ta amare puranenge ta sa e foroke katar e phuv. 7Chiro si o chachipe ta amaro si o lallao. O lallao kai allive si sa e llenenge katar o Juda ta sa e llenenge kai zivin ando Jerusalem ta sa o Israel, gola kai si pase ta gola kai si dur ande sa e phuvia kai tradian len cheres lengo bilachipe, soke vazdinaile pe tute. 8Ioi Devla, amaro si o lallao ta amare puranengo ta amare gazdengo ta amare charonengo, soke sa cherdam o bilachipe chuke. 9A tu amaro Del ta amaro Gazda, si tut volipe ta prostipe, i kana amen vazdinailam pe tute 10ta ni kandiam o avazi e Devleko amaro Gazda te sai kanda leke zakonura kai vou anda angla amende pe profetonenchar leke sluge. 11Sa o Israel ni kandia cho zakono ta durilo te na kandel cho avazi, goleke pela pe amende e armaia ta e sovel kai si pisime ando zakono e Moiseseko, sluga e Devleko, soke cherdam chuke o bilachipe.#Lv 26.14-39; Dt 28.15-68. 12Ta tu cherdan te peren pe amende sa che alava soke amen ni kandiam so phendan amenge, ta ni amare gazda ni kandie tut. Goleke avilo gava baro bilachipe pe amende soke nikada ni cherdila telal katar o miloso iek bilachipe gia baro po Jerusalem. 13Sa gava bilachipe avilo pe amende, gia sar si pisime ando zakono e Moiseseko. Ta amen ni manglam tutar Devla amaro Gazda, te muka amaro bilachipe ta te lla pala cho chachipe. 14Goleke tu Devla, dikhlan amaro bilachipe ta cherdan te perel pe amende, soke tu Devla amaro Gazda san chacho pe sa e ezgode kai chere, a amen ni kamlam te asuna tut.
15Akana Devla amaro Gazda, tu kai sikadan chi bari zor kana ikandan katar o Ejipto che foro, ta cho anav cherdilo pinllardo llik allive, a amen cherdam o bilachipe. 16Devla, amen llana kai tu san lacho. Manga tutar te trade katar o Jerusalem chi joli, soke vou si cho foro, cho santo burdo. Sa e llene katar e phuvia kai si truial maren espurnia katar o Jerusalem cho foro, pala amaro bilachipe ta pala o bilachipe amare puranengo. 17Akana Devla, asun o molipe katar cho sluga ta so mangel. Ta pala cho volipe, cher cho mui te klichil pe cho santuario kai si zatrime. 18¡Thou sama Devla, ta asun amen! ¡Putar che akha ta dik amari zatrania ta po foro katar mangliol tutar! Moli amen chuke, na soke si amen vera ande amaro lachipe, moli amen soke si amen vera ande cho baro volipe.#Nej 9.17-19,27-28; Sal 51.1-4; 57.1-3; Is 54.8-10; Tit 3.5. 19¡Devla, Devla! ¡Asun amen, prostisar amen! ¡Thou sama Devla ta cher le oma pala chiro volipe, soke ande gava foro molinpe chuke, ta i che manusa cheren le!
E porauka katar e eftavardes semane
20Kana me moliva man ta phenava mo bilachipe ta o bilachipe katar mo foro o Israel, ta moliva man pala leko santo burdo. 21Ta kana moliva man, o Grabiel kai sikadiloia mange omanglal sargo ando suno, avilo furiando oma kote kai sema kana saia o saiato kai delpe o kurbano pasa e racha.#Lk 1.19-26. 22Ta cherda man te acharav ta phenda mange: Daniel avilem akana te dav tut bizaipe ta te achare.
23Kana thodan te moli tut phendilo o alav ta me avilem te sikavav tut, soke o Del volil tut but. Asun o lav ta achar so dikhlan sargo ando suno.
24Eftavardes semane si chinade
pe cho foro ta po santo foro katar o Jerusalem,
ta te gotovil o bilachipe ta te thovel o son e bilachimake,
ta te lel o prostipe katar o bilachipe
ta te anel o chachipe ostade,
ta te sellilpe so dikhila sargo ando suno ta e poroka,
ta te unjin e Santo katar e santura.
25Morabi te llane ta te achare gaia ezgoda:
Kai kana ka likel o alav
te lachardol ta te vazdiniaol o Jerusalem
llik o Mesias Gazda,#9.25 ande aver lila ni thoven malluskula
ka aven efta semane
ta sovardes ta dui semane
pale ka vazdiniaol e plasa
ta o zido ande vremura dukhade.
26Ta mapalal katar e sovardes ta dui semane
ka len o zivoto katar o Mesias na vou petar.
O Jerusalem ta o cher e Devleko ka aven zatrime
ta o foro katar iek charo kai ka avel
ka zatril o foro ta o santuario,
ta leko son ka avel bare paiea,
ta llik o son katar o maripe ka aven e zatranie.
27Ta pala aver semana
ka chachare po alav kai dia bute llenenchar,
pala o dopas katar e semana
ka achavel e kurbanura ta e ofrende.
Mapalal bute bilachimaia
ka avel gua kai zatril
lligo ni ka avel o son
ta so si chinado te perel pe gua kai zatril#Dn 11.31; 12.11; Mt 24.15; Mk 13.14.
Obecnie wybrane:
Daniel 9: BACHRO
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Biblia ande chib Romani © Sociedad Bíblica Chilena, 2018.