រ៉ូម 4
4
ចួសប៉ុលអែលរើងចួសអប្រាហាំបឺនរ័កចូវសួរកួយ
1សែមសាយវ៉ឺយ ណា ហៃក្រៃគឹតយ៉ាំងនារ៉ើរើងចួសអប្រាហាំ ចួសហៃរ៉ើដើមបឺនរ័ក? 2បើព្រះពឺតប៉ាយចួសអប្រាហាំកួយរ័ក អាសារកឹចួសអប្រាហាំខំវ័រ័កយ៉ាំងនីយ៉ាំងទោក់ ចួសអប្រាហាំកើតរើងអួតដាក់កួយដែលអឺ ម៉ងបើណាវអួតដាក់ព្រះពឺតអួតម៉ឹបឺនអឺ 3ណា ឡឹងគម្ពីរ៍កើតសសេរដករ៉ើរើងចួសអប្រាហាំយ៉ាំងនា? ឡឹងគម្ពីរ៍កើតសសេរដកប៉ាយ “ចួសអប្រាហាំណាវជើព្រះពឺត កឹអាសារកឹចួសអប្រាហាំណាវជើព្រះពឺត បឺនព្រះពឺតប៉ាយចួសអប្រាហាំកួយរ័ក”#ជំពូក ៤ ខ ៣ ពាក្យណិងកួឡឹងគម្ពីរ៍សញ្ញាតៀតេកជ្រមោះ លោកុប្បត្តិ ជំពូក ១៥ ខ ៦។ 4បេកចាឈ្នួលវ័ចន្ទ័មូយ ពេលណាវបឺនកាក់ ណាវម៉ឹដែលប៉ាយ កាក់អិងកាក់កួយអនណាវទទេអឺ ណាវប៉ាយកាក់អិងកាក់ថ្លៃណាវវ័ 5កឹបេកម៉ឹបឺនខំវ័រ័កយ៉ាំងនីយ៉ាំងទោក់ ម៉ងជើព្រះពឺតព្រះង្គាន់ជោយបេកម៉ឹបឺនគោរពព្រះអនបឺនរ័ក ព្រះពឺតប៉ាយបេកអិងកួយរ័ក ចូវរ៉ើបេកអិងជើណាវ 6ស្ដាច់ដាវីឌកឹបឺនសួររ៉ើរើងបេកបឺនច្អបចម្បអាសារកឹព្រះពឺតប៉ាយកួយរ័កម៉ឹគឹតរ៉ើរើងវ័រ័កដែល ណាវសួរប៉ាយ 7“កួយនាព្រះពឺតអាត់ទោសអន រ៉ើលប់ច្ពស់រើងលឹមវ័លោស កួយអិងបឺនពរ៍ហឺយ 8កួយនាព្រះពឺតម៉ឹគឹតរ៉ើរើងលឹមវ័លោស កួយអិងបឺនពរ៍ហឺយ”#ជំពូក ៤ ខ ៨ ពាក្យណិងកួឡឹងគម្ពីរ៍សញ្ញាតៀតេកជ្រមោះ ទំនុកតម្កើង ជំពូក ៣២ ខ ១ តក់ ២។។
9សែមសាយវ៉ឺយ ណា ពរ៍យ៉ាំងអិង ព្រះពឺតអនកឹបេករែច់ស្បែកវ៉ាក? បេកម៉ឹរែច់ស្បែកណាវម៉ឹអនវ៉ាក? កឹត្ដឹសហៃសួរប៉ាយ “អាសារកឹចួសអប្រាហាំជើព្រះពឺត បឺនព្រះពឺតប៉ាយចួសអប្រាហាំកួយរ័ក” 10កឹព្រះពឺតប៉ាយចួសអប្រាហាំកួយរ័ក ណាវប៉ាយតឹសណា? ណាវប៉ាយញោងចួសអប្រាហាំរែច់ស្បែក រ៉ើប៉ាយក្រោយចួសអប្រាហាំរែច់ស្បែក? ព្រះពឺតប៉ាយចួសអប្រាហាំកួយរ័កញោងចួសអប្រាហាំរែច់ស្បែក ម៉ឹមេនក្រោយចួសអប្រាហាំរែច់ស្បែកអឺ 11ព្រះពឺតអនចួសអប្រាហាំរែច់ស្បែកដកវ័ចៀសញ្ញាប៉ញ្ជាក់រ៉ើរើងចួសអប្រាហាំបឺនរ័កអាសារកឹជើ កឹរើងចួសអប្រាហាំបឺនរ័កអាសារកឹជើ ណាវបឺនតាំងរ៉ើណាវន្ទាន់រែច់ស្បែកអឺ កឹអាសារកឹណាវបឺនរ័កតាំងរ៉ើន្ទាន់រែច់ស្បែកយ៉ាំងអិងហឹយ បឺនណាវកើតចៀអូវបេកជើម៉ឹបឺនរែច់ស្បែក កឹបេកជើម៉ឹបឺនរែច់ស្បែកអិង ព្រះពឺតណាវប៉ាយកួយរ័កយ៉ាំងចួសអប្រាហាំដែល 12កឹចួសអប្រាហាំណាវអូវបេករែច់ស្បែកដែល ម៉ងទាល់កឹបេកអិងរែច់ស្បែកឡង់ ជើយ៉ាំងចួសអប្រាហាំលឹមន្ទាន់រែច់ស្បែកឡង់ បឺនបេកអិងកើតចៀកនចួសអប្រាហាំបឺន។
ចួសប៉ុលសួររ៉ើរើងចួសអប្រាហាំបឺនចន្ទ័ៗលឹមព្រះពឺតសន្យាអាសារកឹណាវជើ
13រើងព្រះពឺតសន្យាប៉ាយអនចួសអប្រាហាំ រ៉ើអនកនចៅចួសអប្រាហាំក្ដែកណិងតឹងក្លាំដកវ័ចៀកេរ ព្រះពឺតណាវម៉ឹបឺនដាក់ច្បាប់ន្ទ័មូយអនបេកអិងវ័តូនអឺ បើប៉ាយណាវអនបេកអិង ណាវអនអាសារកឹបេកអិងបឺនរ័កអាសារកឹជើអឺ 14បើប៉ាយព្រះពឺតដាក់ច្បាប់ន្ទ័មូយអនបេកអិងវ័តូនបឺនណាវអនក្ដែកណិងតឹងក្លាំវ័ចៀកេរ បេកអិងម្បាច់ពឹងរបៀបជើអឺ កឹព្រះពឺតកឹម្បាច់សន្យារ៉ើបេកអិងដែល 15កឹច្បាប់ម៉ឹកើតកួយនាវ័តូនបឺនអឺ កើតកឹវ័អនព្រះពឺតច្លក់រ៉ើកួយអឺ កឹតេកណាម៉ឹកើតច្បាប់ តេកអិងម៉ឹកើតកួយវ័លោសរ៉ើច្បាប់ដែល។
16សែមសាយវ៉ឺយ យ៉ាំងអិង ព្រះពឺតអនកនចៅចួសអប្រាហាំចន្ទ័ៗ ណាវអនអាសារកឹបេកអិងពឹងរបៀបជើណោ កឹព្រះពឺតអនបេកអិងពឹងរបៀបជើយ៉ាំងអិង ចូវរ៉ើណាវស្អៀអនបេកអិងចន្ទ័ៗទទេ យ៉ាំងអិង បេកអិងណាវណង់កឹបឺនចន្ទ័ៗលឹមព្រះពឺតសន្យាមេនទេនដែលអឺ កឹបេកអិងម៉ឹមេនកឹបេកកួក្ដបអំណាចច្បាប់ចួសម៉ូសេម្អិងអឺ កើតសាសន៍ផ្សិងៗបេកជើយ៉ាំងចួសអប្រាហាំឡង់ កឹចួសអប្រាហាំណាវអូវហៃតឹងម៉ាត់ឃ្នា 17កឹក្រៃរ៉ើពាក្យសសេរដកឡឹងគម្ពីរ៍ប៉ាយ “កឺរីសអែលម៉ៃអនវ័ចៀអូវកួយក្លឹងសាសន៍”#ជំពូក ៤ ខ ១៧ ពាក្យណិងកួឡឹងគម្ពីរ៍សញ្ញាតៀតេកជ្រមោះ លោកុប្បត្តិ ជំពូក ១៧ ខ ៥។ កឹបើគឹតខាងព្រះពឺត ព្រះចួសអប្រាហាំជើ ព្រះប៉្រោះកួយក្ចែតអនត្មង់ចៀក្រោយ ព្រះសួរចន្ទ័ៗអាន្ទាន់កើតចូវអនកើតចូវ ចួសអប្រាហាំណាវអូវបេកជើមេន 18កឹចួសអប្រាហាំ ម៉ឹប៉ាយកើតរើងក្លឹងវ័អនណាវម៉ាត់សង្ឃឹម ម៉ងណាវណង់កឹជើ ណង់កឹសង្ឃឹម កឹណាវកើតចៀអូវកួយក្លឹងសាសន៍ កឹក្រៃរ៉ើពាក្យលឹមព្រះពឺតសួរដកប៉ាយ “ពោះកីម៉ៃកើតកនចៅក្លឹងយ៉ាំងអិង”#ជំពូក ៤ ខ ១៨ ពាក្យណិងកួឡឹងគម្ពីរ៍សញ្ញាតៀតេកជ្រមោះ លោកុប្បត្តិ ជំពូក ១៥ ខ ៥។ 19ម្សាចួសអប្រាហាំអាយុបៀតតឹងមូយរ័យក្ម ណាវដិងប៉ាយចាក់ណាវឆុបជាងប៉ង្កើតកន រ៉ើដិងប៉ាយស្បូនយាក់សារ៉ាកឹស្វឹតម៉ាត់ដែល ម៉ងរើងណាវជើម៉ឹក្សោយចៀក្សោយអឺ 20ចួសអប្រាហាំណាវម៉ឹឆុបជើ រ៉ើម៉ឹសុងសៃរ៉ើរើងលឹមព្រះពឺតសន្យារ៉ើណាវអឺ មេនទេនអៃ វ័អនណាវជើច្នាប់ចៀច្នាប់ រ៉ើវ័អនណាវសសើរព្រះពឺតច្នាប់ចៀច្នាប់អឺ 21កឹណាវដិងច្បាស់ប៉ាយ ចន្ទ័ព្រះពឺតសន្យា ព្រះពឺតជាងវ័បឺនដែលអឺ 22យ៉ាំងអិងហឹយ បឺនកើតសសេរដកប៉ាយ “អាសារកឹចួសអប្រាហាំជើព្រះពឺត បឺនព្រះពឺតប៉ាយចួសអប្រាហាំកួយរ័ក” 23កឹតេកសសេរប៉ាយ “ព្រះពឺតប៉ាយចួសអប្រាហាំកួយរ័ក”អិង ម៉ឹមេនសសេរដកអនកឹចួសអប្រាហាំខ្នាក់អឺ 24សសេរដកអនហៃបេកព្រះពឺតប៉ាយកួយរ័កដែល កឹព្រះពឺតប៉ាយហៃកួយរ័ក ចូវរ៉ើហៃជើព្រះពឺត ព្រះលឹមប៉្រោះព្រះយេស៊ូវទ្រេងហៃអនត្មង់ចៀក្រោយ 25កឹអាលឹមព្រះពឺតអនកួយអែលព្រះយេស៊ូវចៀកម្ចែត អាសារកឹហៃវ័លោសរ៉ើណាវអឺ ម៉ងណាវម៉ឹដកអនព្រះយេស៊ូវក្ចែតរហូតអឺ ណាវប៉្រោះអនត្មង់ចៀក្រោយដែលអឺ កឹអាសារកឹណាវប៉្រោះព្រះយេស៊ូវអនត្មង់ចៀក្រោយ បឺនណាវជាងប៉ាយបេកជើកួយរ័ក។
Obecnie wybrane:
រ៉ូម 4: KNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2020, Wycliffe Bible Translators, Inc. All rights reserved.
