रोमियो 8
8
पवित्र आत्माय ला जीवन
1ऐनि वजहि ला अबै जै यीशु मसीह पन विश्वास कातै, तैन्हां पन सजायरी आज्ञा ना। 2केईनी जै पवित्र आत्मा यीशु मसीहरी तरफ सिंउ ऐईंता तैस तुहांनि जीवन दींणा जां तुवे तैस पापा जां मोउती किना आजाद कांने। 3केईनी कि जै कंम मूसेरी व्यवस्थाय असेड़ै पाप बाऐ स्वभावेरै कारण कमजौर भौ-करि ना करियै, सैक्यै परमेश्वरै क्यै। मतलब अपड़ा पुत्र असुवां सैयि भूंणेरै तेईनी जां असेड़ै पापा केरै तेईनी बलिदान भूंणेरै तेईनी भेईजि दित्ता जां परमेश्वरै यीशु मसीहरै शरीरा मझ पापेरी निंदा की जां दण्ड दित्ता। 4ऐठणीरै तेईनी व्यवस्थायरी मांग असु मझ जै पाप बाऐ स्वभावेरै अनुसार ना, पण पवित्र आत्मायरै अनुसार चलतै, पूरी भुईया। 5सैक्यै मैहणु जै पाप बाऐ स्वभावै ला चलायूंतै, सैक्यै पाप बाई गला केरै बारै मझ सौचतै, पण जै पवित्र आत्मायरै अनुसार चलायूंतै, सैक्यै तैन्हां गला सौचतै, जैन्हैं ला आत्मा खुश भूँती। 6जै पाप बाऐ स्वभावेरै अत्तै, तेन्हैरा मंन शरीर बाईया गला मझ लगौरा रींहथा, जेठणीरा नतीजा मोउत आ। 7केईनी पाप बाऐ स्वभावेरै वशा मझ बेशणु, परमेश्वरा सिंउ दुशमणी रखणी आ; केईनी कि ना ता पाप वा स्वभाव परमेश्वरेरी व्यवस्थाईरै आधीन आ जां ना सैक्या तेसैरी व्यवस्थायरा पालन करि सकता।
8जां जै पाप बाऐ स्वभावेरै वशा मझ अत्तै, सैक्यै परमेश्वरा खुश ना करि सकतै। 9पण जेख्णी कि परमेश्वरैरा आत्मा तुहां मैहणुवां मझ वास काता, ता तुवे पाप बाऐ स्वभावेरै वशा मझ नत्तै, पण आत्मायरै वशा मझ अत्तै। अगर कोसक्यै मझ मसीहरा आत्मा ना ता सैक्या मसीहरा ना। 10अगर मसीह तुहां मझ आ, ता पापेरै कारण शरीर मौरा भूंणा पन बि धार्मिकतायरै कारण तुवाड़ी आत्मा जीवित आ। 11जां अगर परमेश्वरैरा आत्मा जेनि यीशु मसीह मौरा मझां जींतैरा, तुहां मझ बसौरा; ता जेनि यीशु मसीह मौरा मझां जींतैरा, तेसै तुवाड़ा नाशवान शरीर बि अपड़ै तेनी आत्माय ला जींता कांना, जै तुहां मझ बसौरा।
12ऐठणीरै तेईनी मिंडै विश्वासी भाईयो, असुवां आज्ञा मनणी आ, असै तैस ना करिया जै असैड़ा पापी स्वाभाव चांहथा। 13केईनी कि अगर तुवे अपड़ै पाप बाऐ स्वभावेरै अनुसार जींतै, ता आत्मिक रूप सिंउ मरि गांहणै; पण अगर आत्मायरी सामर्थी ला तुवे तैन्हां कंमा जै तुवाड़ा पाप वा स्वभाव तुहां किना करांणा चांहथा, तैन्हां बंद करि दींतै, ता जींतै रींहणै। 14ऐठणीरै तेईनी कि जेत्थरै बि मैहणु, जिहीं परमेश्वरैरा आत्मा चलांता, तिहीं चलतै ता सैक्यै-ऐ परमेश्वरेरी संतान अत्तै। 15केईनी कि जै आत्मा तुहांनि मेऔरा, सैक्या तुहांनि दुबारे पापैरा दास भौ करि डरींणेरै तेईनी ना मेऔरा, पण सैक्या आत्मा असु परमेश्वरेरी संतान बंणाता, जैसनि असै हे अब्बा, हे पिता बोलि करि हक दींतै। 16ऐपु पवित्र आत्मा असेड़ि आत्माय सिंउ ऐस सच्चाईरी गवाहि दींता, कि असै परमेश्वरेरी संतान अत्तै। 17जां अगर संतान अत्तै ता वारिस बि अत्तै, जां परमेश्वरेरै वारिस जां यीशु मसीहरै संगी वारिस अत्तै। अगर असै यीशु मसीहरै तेईनी दुख सहन करिया ता असै तेसैरी महिमाय मझ बि हिस्सैदार भूंणै।
दुखा किना लै-करि महिमा तेईनी
18आंउ ऐ गल अच्छी तरह सिंउ जांणता कि जै महिमा बाद मझ असुनि परमेश्वरा किना मेईणी, सै ऐस दुखा किना जै असै ऐम्हियां सहन कातै अत्तै बड़ी, बडी आ। 19केईनी कि ऐ सृष्टी बड़ी उम्मीद सिंउ तैस टैंमेरा इन्तजार काति आ, जेख्णी परमेश्वरा अपड़ि अउलादि प्रकट कांनी। 20केईनी कि जै किछ बि परमेश्वरै सृष्टी की, तेनी सृष्टी अपड़ि कीमत गवां दित्ती। ऐठणीरै तेईनी ना कि सैक्यै ऐपु ऐहीं चांहथै थ्यै, पण परमेश्वरै ऐपुवै ऐहीं कियु। पण तांबि आशा। 21सृष्टी तैस धियाड़िरा इन्तजार काति आ, जेख्णी तैस मोउती जां विनाश किना छुड़खी करि परमेश्वरेरी संतानियां सिंउ महिमा मझ आजादी सिंउ शामिल भौ गांहणु।
22असु पता कि जेख्णी किना आदमै पाप केया, तेख्णी किना लै-करि ऐम्हीं तेईनी परमेश्वरेरी बंणाउरी सारी सृष्टी एकि लाउखियुंती जनेनी सैयि दुख सहन काति आ। 23जां ऐ सिर्फ सृष्टी-ऐ ना दुख सहन काति पण असै बि, जैन्हां मझ भूंणै बाई महिमाय किना पेहिलै स्वाद चखणेरै रूपा मझ पवित्र आत्मा बसता, पण अबै असै परमेश्वरा भातै अतै कि अबै असुवां अपड़ा सच्चा बच्चा सैयि लै गहिया। सैक्यु तेख्णी भूंणु जेख्णी तैस असैड़ा शरीर मुक्त करि दींणा। मतलब असुनि नवें शरीर दी-करि असेड़ै पुरांणै शरीर आजाद करैला। 24-25जेख्णी असै बचाईयै ता परमेश्वरै असुनि ऐ उम्मीद दितौरी आ। असुनि हालै-तेईनी सैक्यु सभ किछ ना मेऔरू, जेसैरा परमेश्वरै असु सिंउ वायदा क्यौरा; ऐहै वजह आ कि असै ऐम्हियां बि ऐस हासिल कांनेरी उम्मीद कातै अत्तै। ऐठणीरै तेईनी असै इस टैमा असै सब्र सिंउ भातै अतै, ज्यो-तेईनी असै ऐस हासिल ना करीं लींतै।
26ऐहींयै-चारै पवित्र आत्मा बि असेड़ि मजत काता, कि जेख्णी असैड़ा परमेश्वरा मझ विश्वास कमजौर भूंता। केईनी असै ना जांणतै कि प्रार्थना किहीं-चारै कांनी चेहिंथी; पण सैक्या आत्मा ऐपुवै आशु भरी-भरी करि जै शब्द ब्यान ना करि सकतै, असेड़ै तेईनी विनती काता। 27परमेश्वरा ऐस गलैरा पता कि पवित्र आत्मा कितु बोलता; केईनी कि सैक्या पवित्र मैहणुवां केरै तेईनी परमेश्वरेरी ईच्छाईरै अनुसार विनती काता।
28जां असु पता कि, जै मैहणु परमेश्वरा सिंउ प्रेम रखतै जां तेसैरी ईच्छाईरै अनुसार चुणियोरै अत्तै; परमेश्वर तेन्हैरै भलैरै तेईनी सभनियां गला मझ तेन्हैरी मजत काता। 29केईनी कि जै तेनी पेहिलै किना चुणी लै, तेख्णीयैं तेनी ऐ तय बि करि लियौरू थियु कि सैक्यै तेसेरै पुत्रा सैयि भौ गांहणै, ऐठणीरै तेईनी तेसैरा पुत्र सभनियां भाईया मझ पेहिला भूंणा। 30फिरी जेन्हैरै तेईनी परमेश्वरै पेहिलै किना सोचौरू थियु सैक्यै चुणी बि लियै, जां जै चुणै सैक्यै धर्मी घोषित कियै जां जै धर्मी घोषित करियै, तैन्हांं सिंउ तेनी अपड़ि महिमा बि बंडि लैयि।
परमेश्वरैरा अनन्त प्रेम
31ऐ सभ गलै नजरी मझ रखि करि असै बोलि सकतै कि अगर परमेश्वर असु सेईतै आ, ता कोई बि असु हरा ना सकता। 32परमेश्वरै अपड़ा पुत्र अपड़ै तेईनी ना रखा, पण तेनी असेड़ै तेईनी अपड़ै दुशमणा केरै हवालै करि दित्ता। तैस असुनि सैक्यु सभ-किछ बि दींणु जै तेनी असुनि दींणैरा वायदा क्यौरा थ्या। 33कोई बि असु पन परमेश्वरेरै सांमणै आरोप ना ला सकता, केईनी कि सैक्या सैहै आ, जेनि असै धर्मी घोषित कियै। 34कोई बि असेड़ि निंदा ना करि सकता, केईनी कि ऐ सैहै यीशु मसीह आ, जै असेड़ै तेईनी मरि ग्या जां मौरा मझां जींतेरौरा थ्या, अबै परमेश्वरेरी आदर बाई जगाय बेठौरा जां जै असेड़ि तरफ सिंउ असेड़ै तेईनी बि विनती काता। 35कोई बि असु यीशु मसीहरै प्रेमा किना अलग ना करि सकता। ना दुख ना मुसीबत, ना अत्याचार ना कंगालपन, ना भ्रुख ना खतरा, ना तलवार। 36असु सिंउ जै भूंतु आ, सैक्यु ठीक तिहियें भूंतु आ, जिहीं दाऊदै पवित्र शास्त्र मझ परमेश्वरा सिंउ बोलोरू थियु,
“परमेश्वरेरै तेईनी हर धियाड़ी मैहणु असुनि जांनि किना मानेरी धमकी दींतै,
जां असु मैहणुवां सैक्यै बढंणै बाईया भ्रैडा सैयि समझतै।”
37तांबि तेसेरै कारण जेनि असु सिंउ प्रेम केया, ऐन्हां सभनियां गला मझ असेड़ि पूरी जीत आ। 38-39मूं पक्का विश्वास आ कि ना ता मोउत ना जीवन, ना स्वर्गदूत ना असमांणेरी शक्ति, ना वर्तमान ना भविष्य, ना सामर्थ, ना असमांणा मझ ना पाताला मझ कोई शक्ति जां ना पूरी सृष्टी मझ कोई चीज असु परमेश्वरेरै तैस प्रेमा किना अलग करि सकती, जै प्रेम असुनि असेड़ै प्रभु यीशु मसीह ला मेऔरा।
Obecnie wybrane:
रोमियो 8: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
