मरकुस 7
7
परम्परा जां नियम
(मत्ती 15:1-9)
1फिरी फरीसी जां कुछ यहूदी शास्त्री जै यरूशलेम शहरा मझांं यौउरै थ्यै सै यीशुरै चोउवो पासै किट्ठै भुवै। 2तैन्हैं तकाउ कि तेसेरै कुछ चैलै जै बिजन हत्थ धूणै रोटी खांतै थ्यै, जै यहूदिया केरै रीति-रिवाजेरै अनुसार अशुद्ध थियु। 3केईनी की फरीसी जां सारै यहूदी रोटी खांणा किना पेहिलै हमेशा वुजुर्गा केरै रीति-रिवाजेरै अनुसार हत्थ धोईंथ्यै। 4जां बजारा किना ऐईछी करि सै रोटी खांणा किना पेहिलै हमेशा ऐपु रीति-रिवाजेरै अनुसार धौ करि शुद्ध करींथ्यै। सै अपड़िया कटोरिया अच्छै तरीकै सिंउ धूंणेरै बारै मझ जां होरनियां रीति-रिवाजा केरा पालन बड़ी सावधानी सिंउ करींथ्यै, जिहीं कटोरै, लोटा जां ताम्बेरे भांडै धूणै-मांजणै।
5ऐठणीरै तेईनी तैन्हैं फरीसियै जां यहूदी शास्त्रियै तैस किना पुच्छु, “तिंडै चैलै असेड़ै वुजुर्गा केरै रीति-रिवाजा केरा पालन ना कातै! सै सही तरीकै सिंउ हत्थ धौ करि रोटी ना खांतै।” 6यीशु तैन्हांं सेईतै बौलु, “यशायाह सही थ्या जेख्णी तेनी पवित्र शास्त्रा मझ तुहां जेतिया कवटिया केरै बारै भविष्यवाणी की, जिहीं लिखोरू आ ‘तुवे मैहणु मिंडै बारै मझ बड़ु अच्छु बोलतै, पण तुवे हकीकति मझ मूं सिंउ प्यार ना कातै। 7तेन्हैरी अराधना मिंडै तेईनी कौ मायनें ना रखती, केईनी कि सै परमेश्वरेरी आज्ञा छडि करि मैहणुवां केरी आज्ञा शिख्रांतै।’ 8तुहैं परमेश्वरेरी आज्ञा मंनणी छडि दितोरी अत्ति जां मैहणुवां केरै बंणाउरै रीति-रिवाज मनतै।”
9जां यीशु तैन्हांं सिंउ बौलु, “तुवे अपड़ा रीति-रिवाजा मनणेरै तेईन बड़ी चलाकि सिंउ परमेश्वरेरी आज्ञाय ना मनतै! 10उदाहरण तौर पनि केईनी कि मूसै बोलोरू आ कि ‘अपड़ै मयि जां बबेरा आदर कर’ जै कोई मयि जां बबनी बुरा बोलैला सै जरूर मारी छडणा चेहिंथा। 11-12पण अगर कौ अपड़ै मयि जां बबा सिंउ बोलिया, ‘जै किछ मजत तुहांनि दींणी थी सै मजत मीं परमेश्वरनी दींणेरी कसम खाउरी आ, अबै सै परमेश्वरेरी दितोरी भैंट आ, तुवाड़ी ना, तुवे मूं सिंउ बोलतै कि अबै मयि-बबेरी मजत कांनेरी जरूरत ना।’ 13ऐनि तराहि, जै परम्पराय तुहैं मैहणुवंनी शिख्राउरी अत्ति, तेठणिरै जरियै सिंउ परमेश्वरेरै वचनेरै अधिकारा नष्ट करि दींतै।”
मैहणुवां शुद्ध कांने बाई गलै
(मत्ती 15:10-20)
14फिरी यीशु मैहणु ऐपु किनि शदा करि तैन्हांं सेईतै बौलु, “तुवे सारै मिंडी गल शुणा, जां जै किछ आंउ शुणाता तैस समझणैरी कोशिश करा। 15ऐतियु किछ बि जै मुहां मझ गांहथु सै मैहणु अशुद्ध न कातु, पण जै चीजै मैहणु अंतरां किना निकूंथी, सैहै तैस अशुद्ध काति। 16जै बि मिंडी गल शुणता, सै ध्यान दी शुणिया जां समझिया।”
17जेख्णी सै भीड़ि किना निकोहि करि घरा मझ ग्या, ता तेसेरै चैलै ऐस उदाहरणेरै मतलबरे बारै तैस किना पुच्छु। 18यीशु चैला सिंउ बौलु, “क्या तुवे बि ऐतियै नांसमझ अत्तै? ऐस गलै समझा! मैहणु जै चीज खांता, सै तेनी ला अशुद्ध ना भूंता। 19केईनी कि सै तेसेरै मंना मझ ना पर पैटा मझ गांहथी जां शरीरा किना भेईर निकोहि गांहथी?” ऐहीं बोलि करि तेनी सारी खांणेरी चीजै शुद्ध ठहराई। 20फिरी तेनी बौलु, “ऐकेई ऐ सै बुरी चीजै अत्ति जै कोसक्यै मैहणुरै दिमाका किना निकूंथी, जै तैस अशुद्ध काति। 21केईनी कि अंतरां किना यनी कि मैहणुरै दिला किना बुरै-बुरै विचार, व्यभिचार, चोरी, हत्या, परनारी गमन, 22लालच, दुष्टता, छल, लुचपन, बुरी नजर, निंदा, घमंड, मूर्खता निकूंथी।” 23पण ऐ सारी बुरी गलै मैहणुरै दिमाका किना निकूंथी जै मैहणु अशुद्ध काति।
सुरूफिनीकि जातिरी जनेनिरा विश्वास
(मत्ती 15:21-28)
24फिरी यीशु जां तेसेरै चैलै तेठां किना चलि ग्यै जां सूर जां सैदा नाँईयेरै शहरेरै आसै-पासेरै इलाके मझ ग्यै। फिरी सै एकि घरा मझ चलि ग्यै जां सै ऐ ना चांहथा थ्या कि कोसक्यै पता लगिया सै तैठि रुकौरा थ्या। पण मैहणुवां झट पता लगी ग्या कि सै तैठि रुकौरा। 25जां तुरंत अक जनानि जेसैरी हल्की छोकरी मझ बुरी आत्मा थी, तेसैरी चर्चा शुणि करि यैई जां तेसेरै पैयिड़ा पन पैई। 26सै जनानि यहूदी ना थी। सै सीरिया प्रदेशेरै सुरूफिनीकि नाँईयेरै इलाके मझ जमोरी थी। जां तेनी यीशु सेईतै विनती की कि मिंडी छोकरी मझां बुरी आत्मा कढि दै। 27यीशु तैस सेईतै बौलु, “घरेरै छोकरूवा जै यहूदी अत्तै तैन्हांं पेहिलै रजि करि रोटी खांणा दै, केईनी कि छोकरूवा केरी रोटी लै करि कुत्ता केरै आघै सुटणी ठीक नत्ती।” 28सै जनानि समझि गैई कि यीशु गैर यहूदियानि कुत्ता जां यहूदियानि बच्चा बौलु, ऐठणीरै तेईनी जनानि यीशुनि उत्तर दित्ता, “ऐ सच आ प्रभु; तां बि ता कुत्तै बच्चा केरै मेजा हैटां पेउरै रोटिरै टुकड़ै खा लींतै।” 29तां यीशु तैस सेईतै बौलु, “ऐ गलै बोलि करि तीं मूं पन अपड़ा विश्वास लुहाआ ऐठणीरै तेईनी मीं तिंडि छोकरी मझांं बुरी आत्मा कढि लयि, अबै तु अपड़ै घरेनी चलि गा।” 30पण तेनी अपड़ै घरै अईछी करि तकाउ ता छोकरी मंजै पन पेउरी आ जां बुरी आत्मा निकई गियोरी आ।
टाउंणा जां तोतला मैहणु ठीक केया
31फिरी यीशु जां तेसेरै चैलै सूर प्रदेशेरा इलाका छडि करि सैदा नगरा किना जां दिकापुलिस इलाके बत्तै गांहथै गलील झीलिरै किनारै पुज्जै। 32जां मैहणुवें अक टांउणा जै तोतला बि थ्या, तैस किनि अंणि करि विनती कि, कि सै ठीक भौ गहिया। 33फिरी सै तैस भीड़ि किना अलग लै ग्या जां अपड़ि उंगलि तेसेरै कंन्ना मझ सुट्टी, फिरी तेनी अपड़ु थुक अपड़ि उंगलि पन लउ जां तेनी ला तेसैरी जिभ छुत्ति। 34जां सुरगा धेरै तका करि आह भरी। फिरी तेनी तैस मैहणु सेईतै बौलु, “इफ्फत्तह!” मतलब “खुलि गा!” 35सै झटपट शुणना लगा जां सै बिना परेशानि साफ-साफ बोलणा लगा। 36यीशु मैहणुवां सेईतै बौलु, कि सै कोस सेईतै ना बोलिया कि तेनी कितु आ क्यौरू। पण जेत्थरै तेनी सै समझाय त्योताऐ सै प्रचार कांना लगै। 37जां सै बड़ै हैरांन भौ करि बोलणा लगै जै तेनी कियु सभ ठीक कियु; सै टांउणनि शुणनैरी जां टट्टानि बोलणैरी शक्ति दींता।
Obecnie wybrane:
मरकुस 7: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
