मरकुस 4
4
बी बांणै बाऐरा उदाहरण
(मत्ती 13:1-9; लूका 8:1-4)
1फिरी यीशु गलील झीलिरै किनारै उपदेश दींणा लगा जां ऐतेई बडी भीड़ तैस किनि किट्ठी भौ गैई कि सै तैस झीलि मझ एकि किश्ती पन चढ़ी करि बेशि ग्या, जां सारी भीड़ जमीनि पन झीलिरै किनारै खड़ी रैही। 2जां सै तेन्हांनि उदाहरणा मझ बड़ी सारी गलै शिख्रांणा लगा, जां अपड़ि शिक्षाय मझ तेन्हांनि बौलु, 3“शुणा! अक किसान पट्टि मझ बी बांणा निकोत्था। 4जां बांतै टैंमा कुछ बी बत्तेरै किनारै गियु जां पंछियै अईछी करि खा लियु। 5कुछ घोड़ूली जमीनि गियु जेठि मिट्टी घट थी झट जंमि गियु। केईनी कि मिट्टी डुघी ना थी। 6जेख्णी धुप्पेरा सैक लगा तिहीं शुकि गियु केईनी कि तेन्हैरी सीरै बड़ी कमजौर थी। 7किछ बी ऐतेई जगाय पन गियु जेठि झिल्है थ्यै, बी जमीं गियु जां झिल्है मोटी करि सै ढकि लियु, जां तैस पन फल न लगा। 8पण कुछ बी अच्छी जमीनि पन गियु जां तेनी जमीं करि, तीह गुणा, शठ गुणा, शाउ गुणा फल अंणा।” 9तां ता तेनी बौलु, “जै बि मिंडी गल शुणता, सै ध्यान दी करि शुणियां जां समझिया।”
उदाहरणेरा मतलब
(मत्ती 13:10-17; लूका 8:9-10)
10जेख्णी यीशु अकैला थ्या, ता बाराह चैलै जां सै मैहणु जै तैठि किट्ठै भोरै थ्यै तैस किना तैन्हांं उदाहरणा केरा मतलब पुच्छा। 11यीशु तैन्हांं सेईतै बौलु, “तुहांनि ता मीं परमेश्वरेरै राज्यरी गुप्त सच्चाईरै बारै शुणाउरू आ, पण तैन्हांं मैहणुवंनी जै मूं पन विश्वास ना कातै तेन्हैरै तेईनी सारी गलै उदाहरणा मझ भूंती।” 12जिहीं कि पवित्र शास्त्रा मझ लिखोरू आ “सै मिंडै कम तका करि शिख्रेलै ना, जां मिंडी गलै शुणि करि समझेलै ना; अगर सै समझि गहिया, ता सैक्यै अपड़ै क्यौरै पापा किना पश्चाताप करेलै जां पाप ना कांनेरा फैसला लैलै जां परमेश्वर तेन्हांनि माफ करि सकता।”
बी बांणै बाऐ उदाहरणेरा मतलब
(मत्ती 13:18-23; लूका 8:11-15)
13फिरी यीशु तैन्हांं सेईतै बौलु, “पण अगर तुवे एकि ऐस उदाहरणा ना समझि सकतै ता बाकि तैन्हांं सभनियांं उदाहरणा किहीं समझेलै जैन्हां आंउ शुणांणार आ? 14ऐस उदाहरणेरा मतलब ऐ आ। बी बांणार ऐतिया आ, जिहीं कोई परमेश्वरैरा वचन बोलता। 15कुछ मैहणु ऐतियै अत्तै जैन्हैरी बराबरी तैस बीया सेईतै करि सकतै जै बत्तै मझ पियु। सै परमेश्वरैरा वचन जरूर शुणतै, पण शैतान झटपट अईछी करि तैस चोरी करि लैई गांहथा। 16कुछ मैहणु ऐतियै अत्तै जैन्हैरी बराबरी तैस बीया सेईतै करि सकतै जै पथरीली जमीनि पन पियु। ऐ सै मैहणु अत्तै जै परमेश्वरैरा वचन खुश भौ करि शुणतै जां झटपट मनि बि लींतै। 17पण वचन तेन्हैरै दिला अन्तर तेईनी ना पुजता, सै बस कुछ टैंमेरै तेईनी विश्वास कातै। सै तैन्हांं बुटिया सैयि भूंतै जैन्हैरी सीरै डुघी ना भूंती; जेख्णी कोई हौरा वचनेंरे कारण तैन्हांं पन सताव ऐईंता ता सै मैहणु दुखी भौ करि झटपट परमेश्वरेरै वचना पन विश्वास कांना छडि दींतै। 18कुछ मैहणु ऐतियै अत्तै जैन्हैरी बराबरी असै झिल्है बाई जमींनि सिंउ करि सकतै, ऐ सै मैहणु अत्तै जैन्हैं परमेश्वरैरा वचन शुणा, 19ऐ बड़ी सारिया चीजा केरा लालच करि-करि अमीर भूंणैरी ईच्छा कातै, ऐठणीरै तेईनी सै सिर्फ ऐन्हां चीजा केरी चिंता कातै; ऐहीं सै परमेश्वरेरै संदेशा मझ रूकावट पेईदा कातै जां सै तेसैरी ईच्छाय पन ना चलतै। 20पण कुछ मैहणु उपजाऊ जमींनि पन बाउरू बीया सैयि अत्तै, सै परमेश्वरैरा वचन शुणि करि मनि बि लींतै जां सै ऐत पन विश्वास बि कातै। सै परमेश्वरेरी ईच्छाय पन चलतै। सै तैन्हांं खरा बुट्टा सैयि अत्तै जैन्हैरी पैदावार तीह गुणा, शठ गुणा, जां शाउ गुणा भूंती।”
दीयेरा उदाहरण
(लूका 8:16-18)
21फिरी यीशु तेन्हांनि अक हौरा उदाहरण शुणा, “क्या कोई एकि दीयै जाई करि तैस टोकरी हैट या मंजै हैट रखता तां कि तेसैरू प्रगड़ु छपा सकिया? बिल्कुल ना। एकि दीयै एकि दियुंटा पन रखतै जेठां किना तेसैरू प्रगड़ु चमकिया। 22केईनी कि जै गलै छपाउरी अत्ति सै गलै अक धियाड़ी परमेश्वरा सभनियांं केरै सांमणै अंणनी; जां कुछ गलै जै चोरी-छपि भूंती अक धियाड़ी हर मैहणु तकांणी। 23जै बि मिंडी गल शुणता, सै ध्यान दी करि शुणियां जां समझिया।” 24फिरी तेनी तेन्हांनि बौलु, “चोखै बेशा कि तुवे क्या शुणतै अत्तै? ज्योता ज्यादा ध्यान दी करि तुवे शुणैलै तेउतियै जादा समझ तुहांनि मेईंणी। 25केईनी कि जैस किनि किछ ज्ञान या समझ आ, तेसनी होरी जादा मेईंणी। पण जैस किनि ज्ञान या समझ ना, सै तेसैरी थोड़ी समझ बि चलि गांहणी जै तैस किनि आ।”
जमणै बाऐ बीयेरा उदाहरण
26फिरी यीशु बौलु, “परमेश्वरैरा राज्य एकि किसाना सैयि आ, जै जमींनि मझ बी सुटता, 27जां सै बाउरू बीयेरै बारै मझ बिना फिक्री झुलि ग्या जां बियुझी ग्या। तैस टैंमा बी अपड़ै आप जंमि गियु जां मोटियु ऐठणीरा तैस पता ना लगा। 28जमीन ऐपुवै फसल पेईदा काति, पेहिलै टींरै, फिरी सिल, जां तैस किना बाद सिला मझ दांणै तियार भूंतै। 29पण जेख्णी दांणा पकि गांहथा, ता सै झटपट द्राति ला बढणां लगता, केईनी कि फसल पकि गियोरी आ।”
राईरै दांणैरा उदाहरण
(मत्ती 13:31,32,34; लूका 13:18,19)
30फिरी यीशु बौलु, “असै परमेश्वरेरै राज्यरी बराबरी ऐहीं करि सकतै, आंउ तुहांनि अक उदाहरण शुणांता। 31परमेश्वरैरा राज्य राईरै दांणै बराबर आ: जेख्णी जमीनि मझ बांतै ता धरती पन सभनियांं बीया मझ सभनियांं हल्कु भूंतु। 32पण जेख्णी बा छडतै, ता जंमि करि सभनियांं शाग-पत्रा किना मोटी गांहथु, जां तेसैरी ऐतेई बडी डाई भौ गांहथी कि सुरगेरै पंछी अईछी करि तैसेरी ठंडखे बेशतै।” 33सै तेन्हांनि ऐतियै बडै उदाहरण दी करि तैन्हेरी समझिरै अनुसार वचन शुणाईंथ्या। 34जेख्णी यीशु अपड़ा चैला सिंउ बोलींथ्या, ता सै हरबारी उदाहरणा मझ बोलींथ्या; पण जेख्णी सै सुनसान मझ अपड़ा चैला सेईतै भुईंथ्या, ता तेन्हांनि सभ गलै समझाईंथ्या।
आंधी शांत केयि
(मत्ती 8:23-27; लूका 8:22-25)
35तेसै धियाड़ि जेख्णी संन्हैरा टैंम भुआ, ता यीशु चैला सेईतै बौलु, “ऐईछा असै गलील झीलिरै पार गांहथै।” 36चैलै भीड़ विदा केयि जां यीशु ऐपु सेईतै तेसै किश्ती मझ लै ग्यै जैस मझ सै बेठौरा थ्या। जां होरै मैहणु बि होरनियां किश्तिया मझ तैन्हांं पीछै चलि गियै। 37तां अक बडा तूफान या, जां छालि योउती उठणा लगी ऐड़ि तेईनी कि पांणी ला किश्ती भरी गैई जां डुबणा लगी। 38जां यीशु ऐपु पिचालियें पासै चक्ये पन शिर रखि करि झुलोरा थ्या; फिरी चैलै सैक्या ब्योल्हा जां बौलु, हे! “गुरू, असै सारै डुबणांर अत्तै क्या ताउ कौ चितैण ना!” 39तां तेनी उठिकरि, तूफाननी झिड़खै दित्ती, जां पांणीरिया छालियनी बौलु, “शांत बेशा, रुकि गा!” जां तूफान शांत भौ ग्या जां शांत माहौल भौ ग्या; 40तेनी अपड़ा चैला सेईतै बौलु, “तुवे केईनी डरींतै? क्या तुहां हालै तेईनी बि मूं पन विश्वास ना?” 41सै बड़ै डरि ग्यै जां ऐपु मझ बोलणा लगै, “ऐ केणु आ जेसैरी आज्ञा बुरी आत्माय ना पण हवा जां पांणिरी छालि बि मंनती?”
Obecnie wybrane:
मरकुस 4: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
