मरकुस 13
13
मंदरेरै विनाशैरी भविष्यवाणी
(मत्ती 24:1,2; लूका 21:5,6)
1जेख्णी यीशु जां तेसेरै चैलै मंदरा किना निकूंथै थ्यै, ता तेसेरै चैलै मझांं एकि तैस सिंउ बौलु, “हे गुरू, तका! कियोतै अनोखे घौड़ जां इमारती अत्ति।” 2यीशु तैस सिंउ बौलु, “तुवे ऐस इमारती ऐठि सिधि खड़ी भोरी तकांतै अत्तै! ऐ सारी कंथै जां इमारती नष्ट भौ गांहणी।”
संकट जां कलेश
(मत्ती 24:3-14; लूका 21:7-19)
3जेख्णी यीशु जैतूनेरै पहाड़ा पन मंदरेरै सांमणै बेठौरा थ्या, तां पतरस, याकूब, यूहन्ना जां अन्द्रियासै अलग गहि करि तैस किना पुच्छु, 4“असुनि शुणा कि ऐकेई गलै केख्णी भूंणी? जां जेख्णी ऐकेई सारी गलै पूरी भूंणार भूंणी तैस टैंमेरै कितु चिन्ह भूंणा?”
5यीशु तैहां सेईतै बोलणा लगा, “चोखै भौ करि बेशा कि कौ तुहांनि धोखा ना दिया। 6बड़ै सारा मैहणुवां ऐईणु जां बोलणु कि, ‘आंउ मसीह आ’ जां तैन्हांं बड़ै मैहणु भरमांणै। 7जां जेख्णी तुवे लड़ाईया केरा हूला जां दूरियां लड़ाईया केरी गलै शुणतै, ता डरींतै मेईं। ऐतेई गलै भूंणी। पंण ऐठणीरा मतलब ऐ ना कि अंत भूंणार आ। 8केईनी कि अक जाति होरी जातिरै खिलाफ, जां एकि राज्य होरै राज्यरै खिलाफ लड़ाई कांनी। बड़ी सारिया जगाय मझ भुंजल भूंणै, जां अकाल पूणैं। मैहणुवां केरी पीड़ै जनानिरै बच्चा पेईदा कांनेरी पीड़ेरी शुरूवाति सैयि भूंणी।”
9“पण तुवे अपड़ै बारै मझ तियार भौ गहा; केईनी कि लौका तुवे महासभाईया केरै हवालै कानें, जां तुवाड़ी यहूदी सभा घरा मझ मार-पिटाय भूंणी, जां मिंडी वजहि ला तुवे राज्यपाला जां राजा केरै अघ्रियालीं खड़ै करियूंणै, ताकि तुवे मिंडै तेईनी उगाह दिया। 10पण जरूरी आ कि पेहिलै खुशखबरिरा सभनियांं जातिया मझ प्रचार करियो। 11जेख्णी तुवे गिरफ्तार भूंणैं जां अदालती मझ पेश करियुणैं, ता पेहिलै किना चिंता मेईं कातै कि असु कितु बोलणु। पण जै किछ तुहांनि तैस टैंमा परमेश्वरा तुवाड़ै दिला मझ शुणाणु, सैहै बोलै; केईनी कि बोलणार तुवे ना, पण पवित्र आत्मा भूंणा।”
12तैस टैंमा मैहणुवां अपड़ै विश्वासी भा-भींण पकड़वा दींणै तिहियें मयि-बबा अपड़ै बच्चै मारांणै जां बच्चा अपड़ै मयि-बबेरै खिलाफ साजिश कांनी जां सै मारी छडाणैं। 13जां मूं पन विश्वास कांनेरी वजहि ला बड़ा सारा मैहणुवां तुहां सिंउ नफरत कांनी; पण जै सताईयूंणेरी लाष्टिया धियाड़िया तेईनी मिंडै विश्वासा मझ बंणौरा रैहला, सै बचाई गांहणा।
महांसंकट काल
(मत्ती 24:15-28; लूका 21:20-24)
14“पढनें वा समझि लिया अक धियाड़ि जेख्णी तुवे सैकेई उजाड़नै बाई ऐईड़ी चीजै खड़ी भोरी मन्दिरा मझ तकालै जेठि तैस चीजेरू रींहणु ठीक ना, जां जेसैरी वजहि ला मंदिर उजाड़ बंणी गांहथा। ता जै यहूदिया प्रदेशा मझ भुईया सै पहाड़ा पन नशि गहिया। 15जै छत्ति पन भुईया, सै अपड़ै घरा किना किछ लींणैरै तेईनी हैट न ऐईछिया, ना कोई अन्दरनी गहिया। सै ऐहीं करि-करि अपड़ा टैंम बर्बाद ना करिया। 16जां जै पटिया मझ भुईया, सै अपड़ै लिकड़ै लींणैरै तेईनी पिचालीं न ऐईछिया। 17तैन्हांं धिहाड़िया मझ जै दुपरांणी जां बच्चैनी दुध पिवांती भूंणी, तेन्हैरै तेईनी त्यौतु दर्दनाक भूंणु। 18जां प्रार्थना कातै रिय्हा कि ऐ सरदिया मझ न भुईया। 19केईनी कि सै धियाड़ि ऐतेई कष्ट दींणारी भूंणी कि सृष्टिरी शुरूवाति किना जै परमेश्वरै रचाउरी आ, ऐम्हीं तेईनी ना भौरा ना कदि फिरी भूंणा। 20परमेश्वरै तैस भयांनक टैंमा घटेंणैरा फैसला लियौरा। ना ता कौ बि जींता ना थ्या रींहणा। पण तेनी अपड़ै चुणौरा मैहणुवां केरी वजहि सिंउ तैन्हां धियाड़िया घटेंणैरा फैसला ल्या। 21तैस टैमां अगर कोई तुहां सिंउ बोलिया, ‘तका, मसीह इठि आ!’ या ओठि आ! ता तेन्हैरा विश्वास मेईं कातै 22केईनी कि झूठै मसीह जां झूठै भविष्यवक्ता ऐईंणै, जां चिन्ह जां अदभुत कम लुहानें कि अगर भौ सकिया ता परमेश्वरेरै चुणोरै बि भरमा दींणै। 23पण तुवे चोखै भौ करि बेशा, तका, मीं तुहांनि सारी गलै पेहिलै किना शुणा दितोरी अत्ति।
यीशुरू दुबारे ऐईंणु
(मत्ती 24:29-31; लूका 21:25-28)
24तैन्हांं धियाड़िया मझ, जेख्णी ऐ दुख, संकट भूंणा किना बाद, दीहा जां शुकई दोईयो प्रगड़ु ना दींणु। 25जां सुरगा किना तारै छुड़खणा लगणै जां असमांणेरी सारी शक्ति इदि-ओदि हिलायुंणी। 26फिरी लोका आंउ मतलब मैहणुरा पुत्र महान शक्ति जां महिमा सेईतै बदआ मझ ऐईंता तकाणां। 27तैस टैमां तैस अपड़ै स्वर्गदूत भेईजि करि, तैन्हांं धरतिरी हर जगाय किना अपड़ै चुणोरै मैहणु किठै कांने।
अंजीरेरू बुट्टैरा उदाहरण
(मत्ती 24:32-35; लूका 21:29-33)
28अंजीरेरू बुटा किना ऐक्या उदाहरण शिख्रा, जेख्णी तेसैरी डाई नर्म भूंती, जां जेख्णी तैस पन नवें पतरै निकूंथै, ता तुवे बुझि गांहथै कि वसंत ऋतु यैई। 29ठीक ऐहीं चारै जेख्णी तुहां ऐकेई गलै भूंती तकेणी, ता तुवे बुझि गहि कि सै धियाड़ी नीड़ अत्ति, पण सै गल्लै दुवारा नीड़ पुजि गियोरी अत्ति। 30आंउ तुहां सिंउ सच बोलता, कि कुछ जींतै मैहणु तेख्णी बि जींतै रींहणै जेख्णी ऐक्या दुख भूंणा। 31सुरग जां धरती खत्म भौ गांहणै हमेशा के लिये, पण मिंडी बोलोरी गलै हमेशा के लिये सच रींहणी।
बियुझै रिय्हा
(मत्ती 24:36-40)
32ऐन्हां गला केरै बारै कौ ना जांणता कि सै केख्णी भूंणी, ना स्वर्गेरै स्वर्गदूत जां ना आंउ परमेश्वरैरा पुत्र जांणता, पण सिर्फ मिंडा पिता जांणता। 33ऐठणीरै तेईनी! हर टैंम प्रार्थना कातै रिय्हा! केईनी कि तुवे ना जांणतै कि सै टैंम केख्णी ऐईंणा। 34ऐ तैस मैहणु सैयि आ, जै अपड़ै घरै किना दूर यात्राय पन गांहथा थ्या, गांहणा किना पेहिलै सै अपड़ै दासानि बोलता कि घरैरा सारा ख्याल तु रखै। सै हर कोसनि शुणांता कि तैस कितु कांनु चेहिंथु। फिरी सै दुवारपालनी अपड़ि वापसिरे तेईनी तियार बेशणनी बोलता।”
35“ऐठणीरै तेईनी यीशु अपड़ा चैला सिंउ बौलु, कि तियार बेशा; केईनी कि तुवे ना जांणतै कि घरैरा मालक मतलब आंउ कोस टैंमा अईछी गंहूँ, संन्हैरै, अधि राती, कुखड़ेरी ल्यौ दींणैरै टैंमा, या भियगै। 36ऐहीं ना भुईया कि जेख्णी मूं अजग्गै ऐईंणु, ता तुवे मूं तियार ना मेईया। 37जां आंउ जै तुहांनि बोलता: सैहै सभनियांं सिंउ बोलता, हर टैंम तियार बेशा!”
Obecnie wybrane:
मरकुस 13: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
