मत्ती 7
7
होरनियां पनि दोष ना लांणा
(लूका 6:37-38,41-42)
1“कोस पनि बि दोष मेईं ला, ता परमेश्वरा बि तुहां पनि दोष ना लांणा। 2केईनी कि जिहीं तुवे होरनियां पन दोष लांतै, तिहियें तुहां पन बि दोष लायूंणा। परमेश्वरा बि तुहां सेईतै तेतिया व्यवहार कांना जिहीं तुवे होरनियां सिंउ कातै।
3तु एकि हल्की गलतिरै तेईनी अपड़ै विश्वासी साथिरा न्याय केईनी काता, जां अपड़ि बडी-बडी गलती ना तकांता? 4जेख्णी तांउ ऐपुऐ मझ यौउता जादा पाप आ, ता ताउ होरनियां केरी केणु मजत कांनी, जै ताउ किना घट पापी अत्तै? 5हे कवटी, पेहिलै तु अपड़ि बुराई अपड़ै अंदरा किना कढ, तां फिरी तु ठीक-ढंगै सिंउ तका करि अपड़ै भाईरी बुराई दूर करि सकता जां होरनियां केरै पाप छडांणा मझ बि मजत करि सकता।
6जै मैहणु परमेश्वरेरै संदेशा शुणना ना चाहंथै तेन्हांनि मेईं शुणा। अगर तुवे ऐहीं कातै, ता ऐ ऐहींं भूंणु जिहीं कौ पवित्र चीज कुत्ता केरै अघ्रियालीं सुटणी या जिहीं सूंरा अघ्रियालीं कौ कीमति चीज सुटणी, जै सिर्फ तैन्हां अपड़ै पैयिड़ा हैट दबि छडणी जां पलटी करि तुहां पन हमला कांना।
मगेलै ता मेईंणु
(लूका 11:9-13)
7जै तुवाड़ी जरूरतै अत्ति तैन्हांं परमेश्वरा किना मगा, सै तैस तुहांनि दींणु; तौपा ता तुहांनि मैई गांहणु; द्वार खड़का ता तुवाड़ै तेईनी खोलि दींणु। 8केईनी कि जै कौ परमेश्वरा किना मगता, सै तेसनी दींता, जै कौ तौपता, तेसनी मेईंतु, जै खटखटांता तेसेरै तेईनी द्वार खुलि गांहणु।
9तुहां मझां कौ बि मैहणु अपड़ै पुत्रानि घौड़ ना दैला अगर सै तुहां किना रोटी मगिया ता। 10अगर तुवाड़ा बच्चा तुहां किना मछली मगिया ता, क्या तुहां मझियां कोई तेसनी जैहरीलै कीड़ै दैला? 11ऐठणीरै तेईनी जेख्णी तुवे बुरै भौ करि अपड़ै बच्चानि अच्छी चीजै दींणी जांणतै, ता तुवाड़ा स्वर्गीय पिता अपड़ै मगणै बाऐनी अच्छी चीजै किना दैला? 12ऐठणीरै तेईनी जेतिया बर्ताव तुवे चांहथै कि, मैहणु तुहां सिंउ करिया, तुवे बि तैन्हांं सिंउ तेतिया ऐ बर्ताव करा। केईनी कि मूसेरी व्यवस्था जां भविष्यवक्ता केरी शिक्षाईया केरा मतलब बि ऐक्या ऐ आ।
हिट्टी जां चौड़ी बत्त
13परमेश्वरेरै राज्य मझ गांहणैरी बत्त हिटु द्वारै बत्तै आ, केईनी कि बडु आ सै द्वार जां चौड़ी आ सै बत्त जै विनाशा धेरै लैई गांहथी; ऐठणीरै तेईनी बड़ै सारै मैहणु अत्तै जै तेदि बत्तै गांहथै। 14केईनी कि हिटु आ सै द्वार जां मुश्किल आ सै बत्त जै अनन्त जीवना धेरै गांहथी; ऐठणीरै तेईनी बड़ै घट मैहणु अत्तै जै तेदि बत्तै गांहथै।”
जेतियु बुट तेतिया फल
(लूका 6:43-44; 13:25-27)
15“झूठै भविष्यवक्ता किना बचि करि रिय्हा, सै भेड़ियै सैयि अत्तै जैन्हैं अपांणा भ्रैडा केरी खल्लै ला ढकौरा आ, सै भेड़ियै अत्तै पण सै भ्रैडा सैयि लेहिंथै जै मैहणुवां पन हमला कातै। 16तुवे तेन्हैरै कर्मै ला तैन्हांं परियांणी लैलै। क्या कौ झिल्हा किना अंगूर या ऊंटकटारै किना अंजीर त्रोड़तै? 17ऐहियें चारै हर एकि बधिया बुटा पन बधिया फल लगतै, जां निकम्मु बुटा पन ऐयिड़ै फल लगतै। 18बधिया बुटा पनि ऐयिड़ै फल ना लगतै, ना निकम्मु बुटा पनि बधिया फल लगतै। 19जैस बुटा पनि बधिया फल ना लगतै, सै बढि करि आगी मझ सुटियूंणु। झूठै भविष्यवक्तानि बि तिहियें सजा मेईंणी। 20ऐहियें चारै तेन्हैरै कंमै ला तुवे तैन्हांं परियांणी लैलै।”
21जै मूं सिंउ हे प्रभु, हे प्रभु, बोलतै, तैन्हांं मझिंया हर-अक स्वर्गेरै राज्य मझ ना गांहणा, पण सैहै गांहणै जै मिंडै स्वर्गीय पिताऐरी ईच्छा पूरी कातै। 22न्याएरी धियाड़ी बड़ा सारा मैहणुवां मूं सिंउ बोलणु, “हे प्रभु, क्या असै तिंडै नाँईयें ला भविष्यवाणी ना केयि? जां तिंडै नाँईयें ला बुरी आत्माय ना कढि, जां तिंडै नाँईयें ला बड़ै सारै सामर्थैरै कंम ना कियै?” 23पण मूं तेन्हांनि खुलि करि बोलि दींणु, कि मीं कदि ना मनुं कि तुवे मिंडै अपड़ै अत्तै “हे कुकर्म कांनारो, मूं किना दूर भौ गहा।”
घर बणांणार दो मैहणु बुद्धिमान जां मूर्ख
(लूका 6:47-49)
24ऐठणीरै तेईनी जै कौ बि मिंडै ऐन्हां शब्दा शुणता जां ऐन्हां पन चलता तेसैरी तुलना तैस बुद्धिमान मैहणु सेईतै भूंणी जेनि अपड़ु घर चट्टांनी पन बंणाउ, 25जां झड़ी पैई जां हड़ यूँ, जां बियार चलि, जां तैस घरानि टकरै लगी, पण सै ना छिढु, केईनी कि तेसैरी खाई चटांनि पनि खंणियोरी थी। 26जै मिंडी गलै ता शुणता पण तैन्हां पन ना चलता, सै तैस मूर्ख मैहणु सैयि भूंणा जेनि अपड़ु घर रैती पन बंणाउ। 27जां झड़ी पैई जां हड़ यूँ, जां बियार चलि, जां तैस घरानि टकरै लगी जां सै घर पुरूवै छिढि गियु।
28यीशु जेख्णी ऐ गलै बोलि बेठा, ता ऐतियु भूं कि बड़ै मैहणु तेसेरै उपदेशै ला हैरान भौ गियै। 29केईनी कि सै तेन्हैरै यहूदी शास्त्रिया सैयि ना पण अधिकारी सैयि तेन्हांनि उपदेश दिईंथ्या।
Obecnie wybrane:
मत्ती 7: CDJNT
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
