लूका 2
2
यीशुरा जन्म
1तैन्हांं धियाड़िया मझ रोम देशेरै सम्राटै औगुस्तुसै अपड़ै पूरै साम्राज्यरै मैहणुवां केरी गिणती कांनेरी आज्ञा दित्ती। कि सारै रोमी साम्राज्यरै मैहणुवां केरै नाँ लिखियो। 2ऐकेई पेहिली नाँ लिखाय तैस टैंमा भुई, जेख्णी क्विरिनियुस सीरिया इलाकेरा राज्यपाल थ्या। 3जां सारै मैहणु अपड़ु नाँ लिखांणैरै तेईनी अपड़ै-अपड़ै पूर्वजा केरै नगरानि ग्यै। 4यूसुफ बि राजै दाऊदेरै घरांनेरा जां वंशैरा थ्या, ऐठणीरै तेईनी सै गलील प्रदेशेरै नासरत नगरा किना यहूदिया प्रदेशा मझ राजै दाऊदेरै नगरा बैतलहमनि ग्या, 5कि सै अपड़ि मंगेतरी मरियमा सेईतै जै दुप्रांणी थी नाँ लिखवाईया। 6जैस टैंमा सै बैहतलहम नगरा मझ थ्यै, ता मरियमेरै महीने पुरी ग्यै, 7जां तेसेरै पेहिलै पुत्रैरा जन्म भुआ जां तैन्हैं सै कपड़ै मझ लपैटि करि चरनी मझ झुलियांणी छडा केईनी कि सरांय मझ तेन्हैरै बेशणेरै तेईनी कोई जगह ना थी बचोरी।
स्वर्गदूता केरा पुव्हालानि संदेश
8तैस देशा मझ किछ पुव्हाल थ्यै, जै रातिरै टैंमा द्रबड़ा मझ बेशि करि अपड़िया भ्रैडा केरै झुंडैरा पेहरा दिईंथ्यै। 9जां अचानक परमेश्वरैरा अक स्वर्गदूत तैन्हांं किनि अईछी करि खड़ा भुआ, जां परमेश्वरेरी महिमायरू प्रगड़ु तेंन्हैरै चोउवो पासै चमकु, जां सै बड़ै डरि गियै। 10तां स्वर्गदूतै तैन्हांं सिंउ बौलु, “मेईं डरा; केईनी कि तका, आंउ तुहांनि बड़ै मजैरी खुशखबरी शुणांणनी यौउरा, जै सभनियांं मैहणुवां केरै तेईनी भूंणी, 11कि आज बैतलहमा मझ जै राजै दाऊदेरा शहर आ, तैठि तुवाड़ै तेईनी अक उद्धारकर्ता पेईदा भूंणा, जां सैहै मसीह प्रभु आ। 12जां ऐसेरी तुवाड़ै तेईनी ऐकेई पहचान आ कि तुहां अक बच्चा कपड़ै मझ लपेटोरा चरनी मझ मेईंणा।” 13तां अचानक तैस स्वर्गदूता सेईतै बड़ै सारै स्वर्गदूता केरी मंडली भूंणी जां सै परमेश्वरैरा गुणगान कातै लेहिंथै थ्यै, सै ऐहीं गांतै थ्यै कि, 14“सभनियांं उथड़ै स्वर्गा मझ परमेश्वरेरी महिमा भुईया जां धरती पन जैन्हां मैहणुवां किना परमेश्वर खुश आ तेन्हांनि सुख-शांति मेईया।”
पुव्हाला केरू बैतलहमनि गांहणु
15जेख्णी स्वर्गदूत तैठि तैन्हांं किना स्वर्गनि चलि गियै, तां पुव्हालै योकिया मझ बौलु, “ऐईछा, असै सभ बैतलहम ग्राँ गहि करि ऐ गल जै भुई, जां जै प्रभु असुनि शुणाउरू आ गहि करि तकांतै।” 16ऐठणीरै तेईनी सै झट चलि प्यै जां बैतलहम नगरा पुजि करि मरियम जां यूसुफ तकाय जां चरनी मझ सै बच्चा बि तका। 17तेन्हैरै दर्शन करि-करि तैन्हैं पुव्हालै बच्चेरै बारै मझ स्वर्गदूता केरू मुहां किना शुणोरिया गला केरा हर-जगाय जिकर केया। 18जां जेत्थरै मैहणुवें पुव्हाला केरी गलै शुणि सै सारै जंणै बड़ै हैरान भुवै। 19पण मरियम ऐकेई सारी गलै अपड़ै मंना मझ रखि करि सौचती रैही। 20जां पुव्हालनी जिहीं स्वर्गदूतै बोलोरू थियु, तेतियूंऐ तैन्हैं सभ-किछ शुणु जां तकाउ; ऐठणीरै तेईनी सभ शुणि करि परमेश्वरेरी बडियेई जां गुणगान करि-करि सभ चलि ग्यै।
यीशुरा नामकरण
21बालक यीशुरै जमणां बाद जेख्णी अठ धियाड़ी पूरी भुई जां तेसैरा खतना कानेंरा टैंम या, ता तेसैरू नाँ यीशु रखियु, ऐ नाँ स्वर्गदूतै तेसैरी मयिरू पैटा मझ ऐईंणा किना पेहिलै दी दितोरू थियु।
मंदरा मझ यीशुरा अर्पण
22-24जेख्णी मूसेरी व्यवस्थायरै मुताबिक मरियमेरी शुद्ध भूंणैरी धियाड़ि पूरी भुई, तां सै यरूशलेमेरै मंदरा मझ ग्यै। ऐक्यै प्रभुरै नियमेरा पालन कांनेरै तेईनी घुघिया केरी अक जोड़ी ना ता कबूतरा केरै दो बच्चै लैकरी तैंन्हैरा बलिदान चाढना ग्यै। सैक्यै यीशु बि यरूशलेमनि लै ग्यै कि तैस प्रभुरै सांमणै अर्पण करिया, केईनी कि जिहीं प्रभुरै नियम शास्त्रा मझ लिखोरू आ तिहियें “हर अक पेहिला जमौरा पुत्र प्रभुरै तेईनी पवित्र भूंणेरै तेईनी अलग कांना पूंणा।”
शमौनेरू गीत
25-26तैस टैंमा यरूशलेम शहरा मझ शमौन नाँईयेरा अक मैहणु थ्या, सै बड़ा धर्मी जां भक्त थ्या; जै प्रभु यीशु मसीह ऐईंणैरा इंतजार काता थ्या (जैस भेईजणैरा वायदा परमेश्वरै क्यौरा थ्या) कि सैक्या अईछी करि इस्राएलेरै मैहणुवंनी तस्सली दिया जां पवित्र आत्मा तैस सेईतै थ्या। जां पवित्र आत्माय तैस सिंउ बौलु, कि सै मरना किना पेहिलै प्रभुरै मसीह तकाला। 27पवित्र आत्मायरी अगुवाय मझ सै मंदरानि या जां तेसै धियाड़ी मरियम जां यूसुफ बच्चै यीशु यहूदी व्यवस्थाईरै अनुसार परमेश्वरानि दींणा यौउरै थ्यै। 28तैस टैंमा शमौन बि तैठि हाजिर थ्या, तेनी सै बच्चा यीशु अपड़ै खोक्खा ल्या जां परमेश्वरेरी बडियेई काता बोलणा लगा, 29“हे प्रभु, अबै तु मूं यनी अपड़ै दासा अपड़ै वायदेरै अनुसार शांति सिंउ मरना दै, 30केईनी कि जिहीं तीं मूं सिंउ वायदा क्यौरा थ्या तिहियें मीं सै उद्धारकर्ता तका लियौरा जै तीं सभनियांं मैहणुवां बचांणनि भेईजौरा। 31जै तुहां सभनियांं मैहणुवंनी बचांणेरै तेईनी तियार क्यौरा। 32कि सै होरनियां जातिया केरै मैहणुवंनी सच्चाई लुहानेंरै तेईनी प्रगड़ु सैयि भूंणा, जां तिंडै अपड़ै इस्राएलेरै मैहणुवां केरै तेईनी महिमा लैकरी ऐईछैला।” 33बच्चेरै बारै मझ ऐ गल शुणि करि यीशुरै माँ-बब हैरान भौ ग्यै, 34तां फिरी शमौने तेन्हांनि आशीष दी करि, यीशुरी मयि मरियमै सिंउ बौलु, “तका, सै ता इस्राएल मझ केहिया मैहणुवां केरा नाश जां उद्धारेरै तेईनी परमेश्वरेरी तरफ सिंउ अक ऐतियै चिन्हैरै रूपा मझ भेईजौरा, पण बड़ा मैहणुवां तेसैरा विरोध कांना। 35तेसैरा विरोध करि-करि, तैन्हांं अपड़ै दिलैरै विचार उजागर कांने। जां महान दुख, तलवारी सैयि, अपड़ि आत्माय किना बि गुजरना।”
हन्नाऐरी गवाहि
36हन्नाह नाँईयेरी अक जनानि परमेश्वरेरी भविष्यवाणी शुणांणारी थी, सै अशेरेरै गौत्रा मझ फनुएलैरी छोकरी थी। सै बि तैस टैंमा तैठि मंदरा मझ बेठौरी थी जां सै बड़ी बुढी थी। जेख्णी तेन्हैरा ब्याह भोरै सत्त साल भौ गियोरै थ्यै तैस टैंमा तेसेरै लाड़ेरी मोउत भौ गियोरी थी तां सै विधवा थी। 37अबै सै चुरासिया सालैरी थी; जां सै मंदरा छडि करि कदि कोई ना गहींथी, उपवास जां प्रार्थना करि-करि रात-धियाड़ी परमेश्वरेरी उपासना करींथी। 38तैस टैंमा हन्ना बि तैठि अईछी करि परमेश्वरेरी स्तुति कांना लगी। फिरी तेनी गहि करि तैन्हांं सभनियांं सिंउ, जै यरूशलेम शहरेरै मैहणुवां छडांणेरै मसीह भेईजणैरा इन्तजार कातै थ्यै, तेसेरै बारै मझ गलै कांना लगी।
नासरतनि वापस गांहणु
39जेख्णी यीशुरै मयि-बबै प्रभुरी व्यवस्थाईरै अनुसार सभ किछ पूरू कियु, तेठां किना बाद सै गलील प्रदेशेरै नासरत नगरा मझ अपड़ै घरेनी वापस चलि यै। 40जां सै बच्चा कद काठी मझ मोटियूंता जां बलवान भूंता ग्या, जां ज्ञानेरियै गल्लै ला भरियूंता ग्या; जां परमेश्वरैरी खास कृपा तैस पनि थी।
बालक यीशु मंदरा मझ
41यीशुरै माँ-बब हर साल फसहेरै त्यौव्हारा मझ यरूशलेम शहरानि गहियां करींथ्यै। 42जेख्णी यीशु बाराह सालैरा भुआ ता, सै त्यौव्हारेरै नियम अनुसार यरूशलेमनि गियै। 43जां जेख्णी त्यौव्हार खत्म भौ ग्या ता यीशुरै माँ-बब वापस चलि ग्यै जां यीशु यरूशलेम शहरा मझ रेय्ही ग्या, पण ऐस गलैरा तेसेरै मयि-बबा पता ना थ्या। 44सै ऐक्यु समझि करि कि सै होरनियां यात्रिया सेईतै भूंणा, अक धियाड़ि निकोहि गांहणा किना बाद तैन्हैं सै अपड़ा रिश्तैदारा मझ जां जांन पेहचान वा मझ तौपणां ला। 45पण जेख्णी सै ना मैआ ता सै तैस तोपतै-तोपतै वापस फिरी यरूशलेमनि चलि ग्यै। 46जां त्रियां धियाड़िया किना बाद तैन्हैं सै मंदरेरै आंगणा मझ उपदेश दींणै वा केरै बिच बेठौरा जां तैन्हांं केरी गलै शुणता जां तैन्हांं सिंउ सवाल काता लधा। 47जां जै मैहणु तेसैरी गलै शुणतै थ्यै, सै सभ तेसैरी समझि बाई गला किना जां उतरा किना हैरान थ्यै। 48तां यीशुरै माँ-बब तैस तका करि हैरान भौ ग्यै जां तेसैरी मयि तैस सिंउ बौलु, “पुत्र! तीं असु सिंउ ऐतियु केईनी कियु? तका, तिंडा बब जां आंउ परेशान भौ करि ताउ तोपतै थ्यै।” 49तेनी तैन्हांं सिंउ बौलु, “तुवे मूं केईनी थ्यै तोपतै? क्या तुहां यौउता पता ना थ्या कि मूं अपड़ै पिता परमेश्वरेरै घरा मझ भूंणु जरूरी आ?” 50पण जै गलै यीशु तैन्हांं सिंउ बोलि तैन्हांं सै समझ ना येई। 51तां फिरी सै तैन्हांं सिंउ ग्या जां नासरत नगरा मझ या जां तेन्हैरै वशा मझ रिय्हा; जां तेसैरी मयि ऐकेई सारी गलै अपड़ै मंना मझ रखि। 52जां यीशु बुद्धी जां शरीरा मझ, जां परमेश्वरेरी जां मैहणुवां केरी कृपाय मझ मोटयूंता ग्या।
Obecnie wybrane:
लूका 2: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
