प्रेरितों के काम 6
6
सत्ता सेवका केरू चुणियूंणु
1कुछ टैंम बाद जेख्णी चैला केरी गिणती लगातार बधणा लगी तेख्णी यूनानी भाषा बोलणै बाऐ यहूदी चैलै इब्रानी भाषा बौलणारा यहूदी चैला केरै खिलाफ कुड़कुड़ाणा लगै कि हर धियाड़ि रोटी बंडणेरी सेवकाय मझ असेड़ि विधवाईया केरी सुधी ना लियूंथी। 2तां तैन्हैं बारैह खास चैलै यरूशलेम शहरेरै होरनियां विश्वासी चैला केरी सभा ऐपु किनि शदा करि बौलु, “असु खास चैला अपड़ा टैंम परमेश्वरैरा वचन प्रचार कांना जां शिख्रांणा मझ लांणा चेहिंथा, ना कि खिलांणा-पिलांणा मझ मघन भौ गहिया।” 3ऐठणीरै तेईनी हे विश्वासी भाईयो, योकिया मझां सत्ता सच्चा मैहणुवां चुणा जै पवित्र आत्माय जां बुद्धी ला भरौरै भुईया, जेन्हैरै बारै मझ सभ जांणतै भुईया, ताकि असै तेन्हांनि ऐस कंमेरी जिम्मैवारी दी सकिया। 4पण असु ता प्रार्थना जां वचनेरा प्रचार कांना मझ जां शिक्षा दींणा मझ पूरी तराहि सिंउ ध्यान दींतै रींहणु। 5ऐ गल तेन्हैरी सारी सभाय बधिया लगी, तैन्हैं स्तिफनुस नाँईयेरा अक मैहणु जै पेहिलै किनाऐ विश्वासै जां पवित्र आत्माय ला भरौरा थ्या, जां फिलिप्पुस जां प्रखुरूस जां नीकानोर, तीमोन, परमिनास जां अन्ताकिया शहरेरा रींहणार नीकुलाउसानि जै पेहिलै यहूदी बंणी गियौरा थ्या, सै चुणी ल्या। 6जां विश्वासियै सैक्यै खास चैला केरै सांमणै अंणै जां खास चैलै तैन्हे रै तेईनी प्रार्थना करि-करि जां अपड़ै हत्थ तैन्हांं पन रखि करि तेन्हांनि तैस कंमेरी जिम्मैवारी दी दित्ती। 7जां परमेश्वरैरा वचन फैलता ग्या जां यरूशलेम शहरा मझ यीशुरै चैला केरी गिणती बधती गैई; जां बड़ै सारै यहूदी याजकै बि यीशु मसीह पन विश्वास करि-करि वचन मनि ल्या।
स्तिफनुसेरी गिरफ्तारी
8अबै स्तिफनुस अनुग्रह जां शक्ति ला भरी करि मैहणुवां मझ बड़ै-बड़ै अदभुत कम जां चिन्ह लुहाईंथ्या। 9पण किछ मैहणुवें स्तिफनुसैरा विरोध केया। सै तैस यहूदी सभा घरेरै सदस्य थ्यै, जैसनि दासत्व मुक्त बोलींथ्यै। सै कुरेनी शहरा जां सिकन्दरिया शहरा जां किलिकिया जां एशिया प्रदेशा मझ बि थ्यै। ऐ मैहणु स्तिफनुसा सिंउ वाद-विवाद कांना लगै। 10पण तेनी जै किछ बि बौलु, तेन्हैरै बोलै तैसेरिया गला केरा जुबाव ना दिया, केईनी कि पवित्र आत्माय बुद्धी सिंउ बोलणा मझ तेसैरी मजत केयि।
11तेख्णी तैन्हैं गुप्त रूप सिंउ किछ मैहणु राजी कराय जां दासत्व-मुक्त मैहणुवें गुप्त रूप मझ कुछ मैहणुवंनी चुक्कै लई कि सैक्यै स्तिफनुसेरै बारै मझ झूठ बोलिया, “असुवें ऐक्या मूसेरै परमेश्वरेरै विरोधा मझ निंदा बाई गलै बोलता शुणौरा।”
12तैन्हैं स्तिफनुसेरै खिलाफ मैहणु जां यहूदी वुजुर्ग जां यहूदी शास्त्री भड़काय जां तैन्हैं अईछी करि स्तिफनुस पकड़ा जां महासभायरै मैहणुवां केरै सांमणै लै यै 13तैठि तैन्हैं झूठै गवाह खड़ैरै जां जैन्हैं तैस पन ऐ आरोप ला कि, “ऐ मैहणु इस पवित्र मंदर जां मूसेरी व्यवस्थाईरै खिलाफ निंदा काता रींहथा।” 14केईनी कि असै ऐक्या ऐहीं बोलता शुणा कि, “मूं ऐस नासरत ग्राँईयेरै रींहणारै यीशु ऐ मंदर छिढाय दींणा जां सै रीति-रिवाज बदली दींणै जै मूसै असुवंनि दितोरै अत्तै।” 15तां सारै मैहणुवें जै महासभाय मझ बेठोरै थ्यै तैस धेरै घूंरी करि हैरू ता तेसैरा चैहरा स्वर्गदूता केरै चैहरै सैयि चमकता थ्या।
Obecnie wybrane:
प्रेरितों के काम 6: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
