प्रेरितों के काम 4
4
महासभायरै सांमणै पतरस जां यूहन्ना
1जेख्णी पतरस जां यूहन्ना मैहणुवां सिंउ ऐ बोलतै थ्यै, तां याजक जां मंदरेरै सरदार जां सदूकी मैहणु तैन्हांं किनि पुजै जेठि सैक्यै थ्यै। 2सै बड़ै गुस्सै मझ थ्यै पतरस जां यूहन्ना यीशुरे बारै मझ शिख्रांतै अत्तै कि जै मैहणु मरि गियोरै अत्तै परमेश्वरा सै जींतै करि दींणै, केईनी कि परमेश्वरै यीशु मौरा मझां दुबारे जींता केईथ्या। 3संन्हैरा भूंता थ्या, ऐठणीरै तेईनी सेक्यै गिरफ्तार करि-करि पूरी रातिरै तेईनी जैल्ही मझ बंद करि छडै। 4पण जैन्हैं तेन्हैरा संदेश शुणा तैन्हैं यीशु पन विश्वास केया जां यीशु पन विश्वास कांनारै मड़द लगभग पंज हजार भौ ग्यै।
5होरी धियाड़ी तेन्हैरै अगुवे, यहूदी वुजुर्ग जां यहूदी रीति रिवाजेरै शिक्षक (शास्त्री) यरूशलेम शहरा मझ एकि जगाय किट्ठै भुवै। 6जां जै मैहणु सभाय मझ किट्ठियोरे थ्यै, तैन्हांं मझ महायाजक हन्ना, कैफा, यूहन्ना जां सिकन्दर जां जेत्थरै बि महायाजकेरै घरेरै मैहणु थ्यै, सारै यरूशलेम शहरा मझ किट्ठै भुवै। 7तैन्हैं पतरस जां यूहन्ना बिच मझ खड़ै क्यै जां तैन्हांं किना पुछणा लगै, “ऐस मैहणु ठीक कांनेरै तेईनी तुहैं कोस शक्तिरा जां कोसेरै अधिकारेरा प्रयोग केया?”
8पतरसै पवित्र आत्माय ला भरी करि तैन्हांं सिंउ बौलु, 9“हे मैहणुवां केरै सरदारो जां वुजुर्गो! असुवें एकि बिमार मैहणुरी मजत क्यौरी आ, तां आज तुवे असु किना पुछतै अत्तै कि सै किहीं बचाईया।” 10ता तुवे सभ जां सारै इस्राएलेरा मैहणुवां ऐ जांणि लींणु चेहिंथु कि ऐ कम नासरत वासी यीशु मसीहरा नाँ लै-करि केया। सैहै नासरत वासी यीशु मसीह तुहैं क्रूसा पन लटका छडा, पण परमेश्वरै सै मौरा मझां दुबारे जींतैरा। आज तेसेरू नाँईयें ला ऐ मैहणु तुवाड़ै सांमणै ठीक-ठाक खड़ा आ। 11मसीह यीशु ऐ सै घौड़ आ जै तुहैं राज मिस्त्रियै निकम्मा समझा, जां सैहै घौड़ कूंणैरा घौड़ भौ ग्या। 12केईनी कि स्वर्गा हैट यीशुरै अलावा मैहणुवां मझ होरू कौ नाँ ना शुणाउरू जेनि ला असैड़ा बचाव भुईया।
13तेख्णी तैन्हैं पतरस जां यूहन्नेरी हिम्मत तकाय जां ऐ पता लगा कि सै घट पढ़ै लिखै अत्तै जां सिद्धै-साधै मैहणु अत्तै, ता हरशुन भौ ग्यै; फिरी सेकियै परयांणै कि ऐ यीशु सेईतै भुईंथ्यै। 14पण सैक्या मैहणु जै ठीक क्यौरा थ्या, पतरसा जां यूहन्ने सिंउ तका करि, तैन्हैं मैहणुवें तेन्हैरै खिलाफ किछ ना बोलियु। 15पण तेन्हांनि सभायरै कमरै किना भेईनि गांहणनी बोलि करि सैक्यै योकिया सिंउ गल-बात कांना लगै, 16तैन्हैं बड़ै निराश भौ करि बौलु, “क्या असै ऐन्हां दोईयो मैहणुवंनी सजा दींणैरै तेईनी किछ बि करि सकतै? केईनी कि यरूशलेम शहरेरा सभनियांं मैहणुवां पता कि ऐन्हैं अक अदभुत चिन्ह लुहाऔरा; जां असै नमां ना करि सकतै कि ना लुहाऔरा। 17पण ऐ गल मैहणुवां मझ जादी ना फैली गहिया ऐठणीरै तेईनी असुवां सैक्यै धमकांणै चेहिंथै कि फिरी ऐ दुबारे ऐस नाँईयां किना कोस मैहणु सिंउ गल-बात ना करिया।” 18तां तैन्हैं पतरस जां यूहन्ना शदाय जां तेन्हांनि हुक्म दी करि बौलु, “यीशुरू नाँ लै-करि किछ बि मेईं बोलतै जां शिख्रांतै।” 19पण पतरसै जां यूहन्ने तेन्हांनि बौलु कि, “तुवे फैसला करा कि क्या ऐ परमेश्वरेरै नजरियै मझ ठीक आ कि असै परमेश्वरेरी गल ना मनि करि तुवाड़ी गल मनिया? 20केईनी कि ऐ ता असुवां किना ना भौ सकतु, कि जै असै तकाउरू जां शुणौरू आ, तैस असै ना बोलिया।” 21तां फिरी तैन्हैं सैक्यै दुबारे धमका करि छडि दित्तै, केईनी कि मैहणुवां केरी वजहि ला तेन्हांनि सजा दींणी मुश्किल थी, ऐठणीरै तेईनी जै घटना भोरी थी तेनी ला सारै मैहणु परमेश्वरेरी महिमा कांना लगै। 22केईनी कि सै मैहणु, जै चमत्कारेरै चिन्हेरी वजहि सिंउ ठीक भौरा थ्या, तेसैरी उम्र चाहिया साला किना बि जादी थी।
विश्वासिया केरी प्रार्थना
23पतरस जां यूहन्ना छुटि करि अपड़ा साउगिया किनि यै, जां जै किछ प्रधानयाजके जां यहूदी वुजुर्गै तैन्हांं सिंउ बोलोरू थियु, तेन्हांनि शुणा दित्तु। 24तेन्हैरी गलै शुणि करि, पतरसै जां यूहन्ने अक मंन भौ करि उथड़ि आवाजि ला प्रार्थनाय मझ परमेश्वरा सिंउ बौलु, “हे सर्वशक्तिमान प्रभु! तु सैहै आ, जेनि धरती जां सुरग जां समुद्र जां ऐन्हां मझ रींहणार सारै जीव बंणाय। 25तीं पवित्र आत्माय ला अपड़ै सेवका असेड़ै पूर्वज राजा दाऊदेरै जरियै बौलु कि, होरनियां जातिया केरै मैहणुवें केईनी गुस्सा केया? जां देश-देशेरै मैहणु केईनी बेकार मझ साजिश रचतै अत्तै? 26प्रभुरै जां तेसेरै मसीहरै विरोधा मझ धरतिरै राजै जां हाकिम किट्ठै खड़ै भौ ग्यै।
27केईनी कि सच-मझ पवित्र सेवक यीशुरै विरोधा मझ, जेसैरा तीं अभिषेक केया, हेरोदेस जां पुन्तियुस पिलातुस राज्यपाल बि होरनियां जातिया जां इस्राएलिया सेईतै ऐस नगरा मझ किट्ठै भुवै। 28तैन्हैं सैहै कियु जै तिंडि सामर्थी जां मर्जी ला पेहिलै तय भौ गियौरू थियु कि ऐहीं भूंणु चेहिंथु। 29अबै हे प्रभु! तेन्हैरी धमकिया धेरै ध्यान देया; जां अपड़ै दासा केरी मजत कर कि सैक्यै तिंडा वचन हिम्मती सिंउ शुणाईंया। 30जां चंगाईरै तेईनी तु अपड़ा हत्थ बढा जां चिन्ह जां अदभुत कम तिंडै पवित्र सेवक यीशुरू नाँ लै-करि करियो।”
31जेख्णी सै प्रार्थना करि बेठै, ता सै जगा जेड़ी सै किट्ठै थ्यै हिलि गैई जां सै सारै पवित्र आत्माय ला भरी ग्यै, जां परमेश्वरैरा वचन हिम्मती सिंउ शुणांतै रिय्है।
विश्वासिया केरा अकजुट वा जीवन
32जां सभ विश्वास कांनारा केरी मण्डलि एकि दिल्लैरी जां एकि मंनेरी थी, ऐड़ि तेईनी कि कौ बि अपड़ि संम्पति अपड़ि ना बोलींथ्यै, जै किछ बि तैन्हांं किनि थियु सै साझी थियु। 33जां खास चैलै बड़ी शक्ति सिंउ प्रभु यीशुरै दुबारे जींतियुणैरी गवाहि दींतै थ्यै, जां तैन्हांं सभनियांं पन परमेश्वरैरा बड़ा अनुग्रह थ्या। 34जां तैन्हांं मझ कौ बि गरीब ना थ्या, केईनी कि जैन्हां किनि जमीन जां घर थ्यै, सै तैन्हैं बैचि-बैचि करि, बेचोरिया चीजा केरै पेईंसै अणींथ्यै। 35जां खास चैला धेरै दी दिईंथ्यै जिहीं चैला ज्यौति जरूरत भुईंथी, तेन्हांनि तेठणिरै मुताबिक त्यौतु-त्यौतु बंडि दिईंथ्यै। 36जां यूसफ नाँईयेरा अक मैहणु थ्या। सै लेवी गौत्रेरा थ्या जां साइप्रस टापु किना थ्या, खास चैलै तेसैरू नाँ बरनबास रखु, जेसैरा मतलब थ्या, कि अक ऐतिया मैहणु जै होरनियां केरी हिम्मत बधेईंथ्या। 37तेसैरी किछ जमीन थी, जै तेनी बैचि, जां जै पेईंसै बंणै सै अंणि करि जै खास चैलै थ्यै, तैन्हांं धेरै दी दित्तै।
Obecnie wybrane:
प्रेरितों के काम 4: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
