प्रेरितों के काम 25
25
फेस्तुसेरै सांमणै
1ऐठां किना बाद फेस्तुस राज्यपाल यहूदिया प्रदेशा मझ या, फिरी सै त्रा धियाड़ि बाद कैसरिया नगरा किना यरूशलेम शहरानि चलि ग्या। 2तां प्रधानयाजके जां यहूदी अगुवे, तेसेरै सांमणै पौलुसा पन दोष लाय; 3जां तैन्हैं तैस सिंउ छंदै कियै कि सै तेन्हैरै पक्षा मझ भौ गहिया, कि सै पौलुसा यरूशलेम शहरा मझ शदवा लिया, केईनी कि तैन्हैं बत्तै मझ तैस मांनेरी सलाह बंणाउरी थी। 4फेस्तुसै उत्तर दित्ता, “पौलुस कैसरिया नगरा पेहरै मझ आ, जां मूं ऐपु जल्दी तैड़ी गांहणु।” 5फिरी बौलु, “तुहां किना जै अधिकार रखतै, सै सेईतै तैड़ी चलिया, जां अगर ऐनि मैहणु किछ गलत क्यौरू आ ता तैस पन दोष लईया।” 6फेस्तुस यरूशलेम शहरा मझ ऐ रैही ग्या, जां तैन्हांं किनि कोई अठ-दश धियाड़ी गलबात काता रिय्हा जां फिरी सै कैसरिया नगरानि ग्या: जां दुईं धियाड़ी न्याय आसना पन बेशि करि पौलुसा अंणनैरी आज्ञा दित्ती। 7जेख्णी पौलुस या ता जै यहूदी अगुवे यरूशलेम शहरा किना यौउरै थ्यै, तैन्हैं आसै-पासै खड़ै भौकरी तैस पन बड़ै सारै भयांकर दोष लाय, जेन्हैरा प्रमाण सै ना दी सकींथ्यै। 8पण पौलुसै उत्तर दित्ता, “मीं ना ता यहूदिया केरी व्यवस्थायरै खिलाफ जां ना मंदरा केरै खिलाफ, जां ना कैसर संम्राटेरै विरूध किछ अपराध क्यौरा।” 9तां राज्यपाल फेस्तुसै यहूदी अगुवे खुश कांनेरी ईच्छाय सिंउ पौलुसा किना पुच्छु, “क्या तु चांहथा कि तिंडै ऐस मुकदमेरी शुणवाई मिंडै सांमणै यरूशलेम शहरा मझ भुईया?”
पौलुसेरी कैसरानि दोहाई दींणी
10पौलुसै बौलु, आंउ कैसर संम्राटेरै न्याय आसनेरै सांमणै खड़ा आ; मिंडै मुकदमेरा ऐठियै फैसला भूंणा चेहिंथा। जीं तु अच्छी तराहि सिंउ जांणता कि मीं यहूदिया केरै विरोधा मझ किछ अपराध ना क्यौरा। 11अगर अपराधी आ जां मारी छडणैरै काबिल किछ कम क्यौरा, ता आंउ मरना किना ना मुकरीऊंता; पण जैन्हां गला केरै बारै मझ ऐक्यै मूं पन दोष लांतै अत्तै, अगर तैन्हांं गला मझ कौ गल सच ना निकई, ता कोसनि बि मूं ऐन्हां यहूदी अगुवो केरै हत्था दींणैरा अधिकार ना। “मिंडी विनती आ कि मिंडा फैसला ऐपु सम्राट कैसरेरै द्वारा भूंणा चेहिंथा।” 12तां फेस्तुसै अपड़ै सलाहकारा सेईतै विचार विमर्श करि उत्तर दित्ता, “तीं जै संम्राटेरै द्वारा फैसला कांनेरी विनती क्यौरी आ ता फिरी तु सम्राटा किनि ऐ नियूंणा।”
राजा अग्रिप्पेरै सांमणै पौलुस
13किछ धियाड़ि बीति गांहणा किना बाद अग्रिप्पा राजा जां तेसैरी हल्की भींण बिरनीके कैसरिया नगरा मझ ऐईछी करि राज्यपाल फेस्तुसा सेईतै मुलाकात की। 14तेन्हैरै बड़ै धियाड़ि तैड़ी रींहणा किना बाद फेस्तुसै पौलुसेरै बारै मझ राजैनी शुणाउ, कि “अक मैहणु आ, जैस फेलिक्स केईद ऐ छडि गियौरा। 15जेख्णी आंउ यरूशलेम शहरा मझ थ्या, तां प्रधानयाजके जां यहूदिया केरै वुजुर्गै तैस पन आरोप लाय जां चांहथै थ्यै, कि तैस पन दंडेरी आज्ञा दियो। 16पण मीं तेन्हांनि जुबाव दित्ता, कि रोमियो केरी ऐ रीति ना, कि कोसक्यै मैहणु मांनेरै तेईनी हवालै करि दिया, जेख्णी तेईनी आरोपिनी अपड़ै दोष लांणारा केरै सांमणै खड़ै भौ करि दोषा केरा उत्तर दींणनी मौका ना मेईया।
17ऐठणीरै तेईनी जेख्णी यहूदी अगुवे मूं सेईतै ऐड़ि कैसरिया नगरा मझ यै, ता मीं किछ देर ना की, पण दुईं ऐ धियाड़ि न्याएरी कुर्सी पनि बेशि करि, मीं आदेश दित्ता कि पौलुसा अदालतिनि लै ऐईछा। 18जेख्णी तेसेरै आरोपी खड़ै भुवै, ता तैन्हैं तेसेरै बारै मझ ऐत्तेई बुरिया गला केरा दोष ना ला, जेतिया आंउ समझता थ्या। 19तैन्हैं सिर्फ अपड़ै धर्मेरै बारै मझ तैस सिंउ किछ खींचा-तानी थी, जां यीशु नाँईयेरै एकि मैहणुरै बारै मझ जै मरि गियौरा थ्या, जां पौलुस तेसेरै जींतै भूंणैरा दावा काता। 20केईनी कि मूं पता ना थ्या कि ऐन्हां गला केरी जांच-पड़ताल किहीं कांनी, ऐठणीरै तेईनी मीं पौलुसा किना पुच्छु, क्या तु यरूशलेम गाहला, कि तैड़ि ऐन्हा गला केरा न्याय भुईया? 21पण जेख्णी पौलुसै विनती की, कि मिंडै मुकदमेरा फैसला संम्राटेरै ऐड़ि भुईया; तां मीं आज्ञा दित्ती, कि जां तेईनी आंउ तैस सम्राटा किनि ना भेईजूं, तां तेईनी तेसैरी रखवाली करियो।”
22तां राजै अग्रिप्पै फेस्तुस राज्यपाला सिंउ बौलु, “आंउ बि तैस मैहणुरी शुणना चांहथा।” तेनी बौलु, “तांउ दोत्तीं शुणि लींणु।”
23दुईं धियाड़ी, जेख्णी राजा अग्रिप्पा जां बिरनीके बड़ी धूमधाम सेईतै ऐईछी करि पलटनिरै सरदारा सेईतै जां नगरेरै मुखिया मैहणुवां सेईतै दरबारा मझ पुज्जै। तेख्णी फेस्तुसै आज्ञा दित्ती, कि सै पौलुसा लै ऐईछिया। 24राज्यपाल फेस्तुसै बौलु, “हे राजा अग्रिप्पा, जां ऐड़ि उपस्थित बेठोरै सारै मैहणुवो, तुवे ऐस मैहणु तकांतै अत्तै, जेसेरै बारै मझ सारै यहूदियै यरूशलेम शहरा मझ जां ऐड़ि बि जौरै-जौरै बोलि करि मूं सेईतै विनती की, कि ऐसेरू जींतु रीहिंणु ठीक ना। 25पण मीं जांणि आ लियौरू कि ऐनि ऐतियु किछ ना कियु कि ऐ मारी छडणेरै काबिल आ; केईनी कि ऐनि ऐपुवे संम्राटेरै द्वारा फैसलेरी मांग केईथी, ता मीं तैस रोम शहरानि भेईजणैरा फैसला केईथ्या। 26पण मीं तेसेरै बारै मझ कौ बि ठीक गल ना बुझि कि सम्राटनी लिखूं, ऐठणीरै तेईनी मीं ऐक्या तुवाड़ै सांमणै जां खास-कर हे राजा अग्रिप्पा तिंडै सांमणै अंणौरा, कि जांचणा किना बाद मूंनी किछ ऐसेरै बारै मझ लिखणनी मेईया। 27केईनी कि मूं ऐ सही ना लगु कि कोस बि दोषिनी तेसेरै आरौपा केरै बारै मझ तेन्हांनि शुणांणै बिना आघै भेईजूं।”
Obecnie wybrane:
प्रेरितों के काम 25: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
