2 कुरिन्थियों 5
5
असैड़ा स्वर्गीय घर (तम्बु)
1केईनी कि असु पता, कि ऐड़ि धरती पन असैड़ा शरीर एकि तम्बु सैयि आ, जैत मझ असै रींहथै, जेख्णी असु मरनु, ता असुनि परमेश्वरेरी तरफ सिंउ स्वर्गा मझां अक ऐतिया तम्बु मेईंणा, जै हत्थै ला ना भूंणा बंणाउरा, जै नाश भौ गांहथा; पण ऐ तम्बु (शरीर) हमेशा स्वर्गा मझ बंणौरा रींहणा। 2असै ऐस शरीरा मझ ता थंणतै रींहथै जां ईच्छा रखतै, कि असुनि अक ऐतिया शरीर मेईया जै असेड़ै स्वर्गीय घरा सैयि भुईया। 3जैस लांणै ला असै नग्गै न भूंणै। 4जां असै इस शरीरा मझ तम्बुरै समान परेशानियां केरै बोझा हैट जिकी करि थणतै रींहथै; केईनी कि असै इस संसारिक शरीरा छडणा ना चांहथै, पण असै चांहथै कि परमेश्वर असुनि स्वर्गीय शरीर दिया।। 5जां जेनि असुनि नवाँ शरीर दींणेरै तेईनी तियार क्यौरा, सैक्या परमेश्वर आ, जेनि असुनि सारै तौरा पन पवित्र आत्मा बि दितौरा। जै ऐ यकीन दिवांता कि परमेश्वरा सै जरूर पूरू कांनु। 6ऐठणीरै तेईनी असै हमेशा हिम्मत रखतै जां ऐ पता, कि ज्यो-तेईनी असै शरीरा मझ रींहथै, त्यो-तेईनी असै तैस घरा मझ ना गहि सकतै, जेठि प्रभु रींहथा। स्वर्गा मझ असै प्रभु सेईतै अत्तै। 7ऐम्हीं असै इस संसारा मझ रींहथै अत्तै, ता असै प्रभु पन विश्वास करि-करि तैस पिचोरै चलतै, ना कि तैस तका करि। 8ऐठणीरै तेईनी असै हमेशा हिम्मत रखतै जां जेख्णी असु मरनु ता असु ऐक्या शरीर छडि दींणा जां प्रभु सिंउ रींहणु होरू बि बधिया आ।
मसीहरा न्याय
9ऐठणीरै तेईनी असेड़ै मंनेरी ईच्छा ऐ आ, कि चाहै असै तैस सेईतै स्वर्गा मझ रिय्हा चाहै असै इड़ि इस धरती पन रिय्हा, पण असै प्रभु खुश कातै रिय्हा। 10केईनी कि जरूरी आ कि असु सभनियांं केरा न्याय मसीह करिया कि हर मैहणुनी अपड़ै-अपड़ै भला बुरा कंमा केरा जै तेनी शरीरै ला क्यौरै अत्तै, प्रतिफल मेईया।
परमेश्वरा सिंउ मेल मिलाप
11ऐठणीरै तेईनी प्रभुरा डर मनि करि असै मैहणुवंनी सचाई पन विश्वास कांनेरै तेईनी बोलतै जां परमेश्वर असु अच्छै तरीकै सिंउ जांणता, जां मूं उम्मीद आ, कि तुवाड़ी अन्तर आत्मा बि असु अच्छै तरीकै सिंउ जांणति। 12तां बि असै अपड़ि तारीफ तुवाड़ै सांमणै ना कातै; पण असै चांहथै कि तुवे असु पन गर्व करिया, ताकि तैन्हांं मैहणुवंनी तुवे जुबाव दी सकिया, जै मंना केरी गला पन ना, पण दिखावटी चीजा पन गर्व कातै। 13अगर कोई बोलिया कि असैड़ा दिमाग सही ना, ता ऐ परमेश्वरेरै तेईनी आ; जां अगर दिमाग सही आ, ता ऐ तुवाड़ी भलाईरै तेईनी आ। 14केईनी कि यीशु मसीहरा प्रेम असु चलांता; ऐ पक्की गल आ, कि अक मैहणु सभनियां मैहणुवां केरै तेईनी मरि ग्या, ता सभ मैहणु बि मरि ग्यै। 15जां ऐहीं चारै यीशु मसीह सभनियां केरै तेईनी मरि ग्या; ऐठणीरै तेईनी अबै जै जींतै अत्तै, सैक्यै अपड़ि खुशिरै तेईनी जींण ना जिआ; पण तैन्हांं तैस खुश कांनेरै तेईनी जींणु चेहिंथु, जै तैन्हांं सभनियां केरै तेईनी मरि ग्या जां परमेश्वरै सैक्या दुबारा जींता करि दित्ता।
मसीह मझ नवीं सृष्टी
16ऐठणीरै तेईनी अबै किना असै कोसेरा बि संसारिक नजरियै सिंउ न्याय ना कातै, जां अगर असै मसीह बि शरीरेरै अनुसार जांणीथ्यै, तां बि अबै किना सैक्या तेनी हिसाबै ना जांणना। 17ऐठणीरै तेईनी अबै कोई मसीह पन विश्वास काता, ता तैस मझ अबै अक नवाँ स्वभाव आ; असैड़ा पुरांणा स्वभाव मुकि ग्या, अबै सैक्या सारा स्वभाव नवाँ भौ ग्या। 18जां सारी गलै परमेश्वरेरी तरफ सिंउ अत्ति। परमेश्वरै मसीहरै जरियै ऐपु सिंउ असेड़ै बिच नवाँ रिश्ता बंणा दित्ता जां अबै मैहणुवां केरा रिश्ता परमेश्वरा सिंउ जौड़नेरै तेईनी असुनि ऐ सेवकाय दी दित्ती। 19परमेश्वर संसारेरै सभनियां मैहणुवां केरै तेईनी अक बत्त बंणाता थ्या; कि जै किछ बि यीशु मसीह कियु, तेनी ला परमेश्वरा सिंउ अक मिलन बंणी गहिया; जां मैहणुवां केरै पापा केरा दोष तैन्हांं पन ना लगिया जां परमेश्वरा सिंउ असैड़ा रिश्ता दुबारे बणांणेरै तेईनी ऐ यीशु मसीहरी खुशखबरी असुनि दी दित्ती। 20ऐठणीरै तेईनी असै यीशु मसीहरै राजदूत अत्तै; जां ऐस खुशखबरी पन विश्वास कांनेरै तेईनी असै परमेश्वरेरी तरफ सिंउ मैहणुवां केरै छन्दै कातै, कि परमेश्वरा सिंउ रिश्ता बंणा। 21यीशु मसीह पापैरा पता-ऐ ना थ्या, परमेश्वरै असेड़ै पापा केरै तेईनी मसीह दोषी बंणा दित्ता, ताकि असै परमेश्वरेरी नजरी मझ धर्मी बंणी गहिया, केईनी कि यीशु मसीह असेड़ै पापा केरी सजा ऐपु पन लै लैई।
Obecnie wybrane:
2 कुरिन्थियों 5: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.