2 कुरिन्थियों 10
10
पौलुसेरा अधिकार
1आंउ पौलुस मसीह सैयि नम्र जां दयालु भौ करि तुहां मैहणुवां सिंउ विनती काता; पण किछ मैहणु बोलतै कि आंउ तुवाड़ै सांमणै डरफौक भूंता, पण तुहां किना दूर गहि करि निडर भौ गांहथा। 2किछ मैहणुवें बौलु, कि असै संसारैरा मैहणुवां सैयि कंम कातै अत्तै, ऐठणीरै तेईनी जेख्णी मूं ऐईंणु ता, मूं उम्मीद आ, कि मूं तैन्हांं सिंउ कठोर भूंणु पूंणु। आंउ तुहां सिंउ विनती काता, कि जेख्णी मूं ऐईंणु ता तुहां सिंउ कठोर बर्ताव ना कांना पुईया। 3बेशक असै इस संसारा मझ रींहथै, पण तांबि असै अपड़ा दुशमणां सिंउ तिहीं ना भिड़ियूंतै, जिहीं इस संसारेरै मैहणु हथियार लै-करि भिड़ियूंतै। 4केईनी कि असै जै हथियार लै-करि भिड़ियूंतै, सैक्यै मैहणुवां केरै बंणाउरै हथियार नत्तै; पण सैक्यै परमेश्वरेरै शक्तिशाली हथियार अत्तै, जै हर प्रकारेरै गढ़ जां किलै नष्ट करि दींतै। 5ऐठणीरै तेईनी असै तैन्हांं गला जै दिमाका मझ ऐईंती जां हर अक घमण्ड बाई चीज, जै असु परमेश्वरा परियांणना ना दींति, तैन्हांं सभनियां चीजा असै दूर करि दींतै; जां हर-अक ईच्छाय पन अपड़ा कब्जा करि-करि, असै यीशु मसीहरै आज्ञाकारी बंणी गांहथै। 6जां तियार बेशतै, कि जेख्णी तुवे पूरी तरह सिंउ मसीहरी आज्ञा मंनणार भौ गहिया, ता तैस हर मैहणुनी जै आज्ञा ना मनतै, तैन्हांंनि सजा दिया।
पौलुसेरै अधिकार
7तुवे भेईरीं दिखावट तकांतै, अगर कोसक्यै ऐपु पन भरौसा, कि आंउ मसीहरा, ता सैक्या ऐ बि जांणि लिया, कि जिहीं सैक्या यीशु मसीहरा, तिहियें असै बि तेसेरै अत्तै।। 8केईनी कि अगर आंउ तैस हक्केरै बारै मझ हौरा जादा घमण्ड लुहाउं, ता मूं शर्म ना भूंणी; केईनी कि ऐ हक मूंनी तुवाड़ा विश्वास मुकांणेरै तेईनी ना दितौरा, पण तुवाड़ी मजत कांनेरै तेईनी दितौरा, ताकि तुहां विश्वासा मझ मजबूत करि सकूँ। 9तुवे ऐहीं मेईं समझतै, कि आंउ चिट्ठियै ला तुहां डरांणा चांहथा। 10केईनी कि किछ मैहणु बोलतै, कि “तेसेरी चिट्ठी ता कड़क जां प्रभावशाली अत्ति; पण सैक्या जांनिरा कमजौर आ जां तेसैरी गलै बेकार अत्ति।” 11ऐठणीरै तेईनी जै ऐहीं बोलतै, सैक्यै ऐ समझ रखिया, कि जै तुहां किना दूर बेशि करि असै चिट्ठिया मझ वचन लिखतै, तेतियै तुवाड़ै सांमणै असेड़ै कंम बि भूंणै। 12केईनी कि असु मझ त्यौती हिम्मत ना कि जै मैहणु अपड़ि तारीफ ऐपुवै कातै, तेन्हैरै बराबर भौ गहिया। सैक्यै अपांणा योकिया नापी-तौलि करि योकिया सिंउ तुलना करि-करि मूर्ख बंणी गांहथै।
13असुवां तैन्हांं कंमा किना भेईर जै जै परमेश्वरै असुनि दितोरै अत्तै, कदि घमण्ड ना कांना, पण असुवां सिर्फ तैस कंमेरै बारै मझ घमण्ड कांना, जैस कांननी परमेश्वरै असै भेईजोरै अत्तै जां तुवे तैस कंमेरै हिस्सैदार अतै।
14केईनी कि असै अपड़ि हदि किना भेईर अपांणा बधींणा ना चांहथै, जेतियु कि तुहां किनि ना पुजणेरी हालती मझ भूंणु थियु, पण तुहांनि मसीहरी खुशखबरी शुणाणेरै तेईनी कुरिन्थ शहरा तेईनी यात्रा कांने बाऐ असै पेहिलै मैहणु थ्यै। 15जां असै हदि किना जादा होरनियां केरी मैहनती पन घमण्ड ना कातै, पण असु उम्मीद आ, कि जिहीं-जिहीं तुवाड़ा विश्वास बधता गांहणा, तिहीं-तिहीं असै अपड़ि हदिरै अनुसार तुवाड़ी वजहि तुवाड़ै आस-पास होरनियां बड़ा मैहणुवां तेईनी खुशखबरी पुजांणा मझ कामयाब भूंणै। 16कि असै तुवाड़ा नगरा किना परि दूर-दूर इलाका मझ गहि करि बि खुशखबरी शुणाईया जां असै होरनियां केरै नगरा मझ जै कंम भोरै अत्तै, तैन्हांं पन गर्व करिया। 17जिहीं पवित्र शास्त्रा मझ लिखोरू आ; कि अगर तुवे गर्व कांना चांहथै अत्तै, ता प्रभुरै बारै मझ गर्व करा। 18केईनी कि जै अपड़ि तारीफ काता, सैक्या ना; पण जेसैरी तारीफ प्रभु काता, सैक्या प्रभुरी नजरी मझ अच्छा आ।
Obecnie wybrane:
2 कुरिन्थियों 10: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.