1 थिस्सलुनीकियों 3
3
तीमुथियुस भेईजणा
1केईनी कि असै तुहां तकांणै बिना ना बेशियु, ऐठणीरै तेईनी असुवें एथेंस नगरा मझ अकेलै रूकणैरा फैसला केया। 2जां असै तीमुथियुस तुहां किनि भेईजा जै मसीहरी खुशखबरी मझ असैड़ा भाई आ जां परमेश्वरैरा सेवक आ, ताकि मसीह मझ मजबूती सिंउ विश्वास कांनेरै तेईनी तुवाड़ी मजत करिया जां तैस पनि विश्वासा मझ बंणी रींहणेरै तेईनी तुहांनि होंसला दिया। 3जेनि ला कोई बि विश्वासी ऐन्हैं मुश्किलिया ला परेशान ना भौ गहिया; केईनी कि तुवे अच्छी तराहि सिंउ जांणतै कि परमेश्वरै तय क्यौरू आ कि असै ऐहीं-चारै सताईयो। 4जेख्णी असै तैठि थ्यै असै ताउ सिंउ बोलियां करींथ्यै कि असु पन सताव ऐईंणै जां ऐ ठीक तिहियें भौरू बि आ, तुवे ऐ ता जांणतै बि। 5ऐनि कारणै जेख्णी मूं किना बिना जांणने बगैर कि तुवे केतिये अत्तै जां ऐ मिंडै बोलै सहन ना भूं ता तुवाड़ै विश्वासैरा हाल पता कांनेरै तेईनी मीं तीमुथियुस तुहां किनि भेईजा, केईनी कि असु डर थ्या कि किहींक्यै ऐहीं ना भुईया कि परखणै बाऐ शैतानै तुवे परखौरै भुवै, जां असेड़ि मैहनत बेकार भौ गियोरी भुईया।
तीमुथियुसेरै जरियै समाचार मेईंणा
6पण तीमुथियुस तुहां किना वापस अईछी करि असु किनि पुज्जा जां तेनी असुनि तुवाड़ै विश्वासेरी जां प्रेमेरै बारै मझ खुशखबरी शुणाय। तेनी असुनि शुणांउ कि तुवे हमेशा असुवां प्रेम सिंउ याद कातै जां असु सिंउ मिलणैरै तेईनी बड़ै बेचैन अत्तै, ज्योतै असै तुहां मैहणुवां सिंउ मिलणैरै तेईनी बेचैन अत्तै। 7ऐठणीरै तेईनी मिंडै विश्वासी भाईयो असु अपड़ै दुखा जां मुश्किलिया मझ तुवाड़ै बारै मझ तीमुथियुसा किना शुणि करि कि तुवे विश्वासा मझ मजबूत अत्तै ता असुनि बड़ी हिम्मत मेयि। 8केईनी कि अबै ऐ पता लगणा कि तुवे प्रभु मझ मजबूती सिंउ खड़ै अत्तै, ऐ असेड़ै तेईनी नवें जीवना सैयि आ। 9अबै असै तुवाड़ै तेईनी अपड़ै परमेश्वरैरा धन्यवाद दी सकतै तुवाड़ै कारण असै तैस आनन्देरा धन्यवाद दींतै जै असुनि तेसेरी उपस्थिति मझ मेईंता।
कलीसियेरै तेईनी प्रार्थना
10असै अपड़ै पूरै दिल सिंउ लगातार परमेश्वरा सिंउ ऐ प्रार्थना कातै रींहथै कि तुहां दुबारे तका सकिया, ताकि प्रभु यीशु मसीह पनि हौरा ज्यादा मजबूती सिंउ विश्वास कांना मझ तुवाड़ी मजत करिया। 11असै प्रार्थना कातै कि असैड़ा पिता परमेश्वर जां असैड़ा प्रभु यीशु तुहां किनि ऐईंणेरै तेईनी बत्त तियार करिया। 12असै ऐ बि प्रार्थना कातै कि प्रभु ऐतियु करिया कि, जेतिया असै तुहां सिंउ प्रेम कातै, तिहियें तुवे बि योकिया सिंउ प्रेम करा, जां सभनियांं मैहणुवां सिंउ तुवाड़ा प्रेम हौरा बि बधिया, जां प्रभु तुवाड़ा प्रेम बधैई दिया। 13असै प्रार्थना कातै कि असैड़ा प्रभु यीशु मसीह तुवाड़ै मंना मजबूत करिया कि जेख्णी सै फिरी अपड़ै पवित्र मैहणुवां सेईतै वापस ऐईछिया ता तुवे असेड़ै पिता परमेश्वरेरै सांमणै पवित्र जां निर्दोष भुईया।
Obecnie wybrane:
1 थिस्सलुनीकियों 3: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.