1 कुरिन्थियों 7
7
ब्याहेरै बारै मझ स्वाल
1अबै तैन्हांं स्वाला केरै बारै मझ जै तुहैं पुछौरै थ्यै, कि “क्या असेड़ै तेईनी ऐ अच्छु भूंणु कि असै ब्याह ना करिया?” 2पण परीक्षाईया मझ पैई करि अनैतिक कंम कांने असेड़ै तेईनी बड़ी आम गल आ, ऐठणीरै तेईनी मिंडी ता ऐहै सलाह आ, कि सभ मड़द ब्याह करि लिया जां अपड़ि लाड़ी सिंउ ईमानदार रिय्हा।
3ऐ जरूरी आ कि लाड़ा अपड़ि लाड़िरै प्रति अपड़ा फर्ज पूरा करिया जां ऐहींयै चारै लाड़ी बि अपड़ै लाड़ैरै प्रति ईमानदार रिय्हा। 4लाड़िनी अपड़ै शरीरा पन अधिकार ना पण तेसेरै लाड़ैरा अधिकार आ; तिहियें लाड़ैनि बि अपड़ै शरीरा पन अधिकार ना, पण लाड़िरा आ।
5लाड़ा- लाड़ी योकिया शारीरिक सम्बंधा किना दूर ना रखिया; पण किछ टैंम तेईनी योकिया केरी सहमती सिंउ प्रार्थना कांनेरै तेईनी टैंम कढा जां लाड़ा जां लाड़ी सैयि तुवे दुबारे फिरी सेईतै रिय्हा; ऐहीं ना भुईया कि तुवे अपड़ि ईच्छाय काबु ना रखणैरी वजहि सिंउ, शैतान अनैतिक जीवन जींणेरै तेईनी तुवाड़ी परीक्षा करिया। 6आंउ जै ऐ बोलता, ऐ सिर्फ मिंडी सलाह आ, आज्ञा ना। 7आंउ ऐ चांहथा, कि जिहीं कि मीं ब्याह ना क्यौरा, तिहियें सभ मैहणु बि करिया; पण सभनियनि परमेश्वरेरी तरफ सिंउ खास वरदान मेऔरै अत्तै; किछ मैहणुवंनी ब्याह कांनेरा वरदान मेऔरा जां किछ मैहणुवंनी ब्याह ना कांनेरा वरदान मेऔरा।
8जैन्हैरा ब्याह ना भौरा जां विधवाईया केरै तेईनी मिंडी सलाह ऐ आ, कि मूं सैयि ब्याह ना कांना बड़ु छै आ। 9पण अगर सै ऐपु पन रौकथाम ना करि सकतै ता ब्याह करि लिया; केईनी कि ब्याह कांना वासनाय मझ फुकियूंणा किना बधिया आ। 10ब्याह क्यौरै मैहणुवंनी मिंडा ना पण प्रभुरा ऐ आदेश आ, कि लाड़ी अपड़ै लाड़ैनि तलाक दी करि अलग ना बेशिया। 11जां अगर सैकेई अलग भौ गहिया ता तैस या ता कदि ब्याह ना कांना चेहिंथा या फिरी दुबारे अपड़ै लाड़ै किनि चलि गांहणु चेहिंथु। लाड़ा बि अपड़ि लाड़ी किना तलाक दी करि अलग ना बेशिया।
12अबै आंउ बाकि विश्वासिया सिंउ गल काता, जैन्हैं मैहणुवें ऐतिया मैहणुवां सिंउ ब्याह क्यौरा, जै विश्वासी नत्तै; अगर कोसक्यै विश्वासी भाईरी लाड़ी असेड़ै प्रभु पन विश्वास ना काति जां सैकेई जनानि तैस मड़दा सिंउ लगातार बेशणेरै तेईनी राजी आ, ता सैक्या भाई तैस ना छडिया। 13जां अगर कोसक्यै विश्वासी जनानिरा लाड़ा असेड़ै प्रभु पन विश्वास ना काता जां सैक्या अपड़ि लाड़ी सिंउ बेशणेरै तेईनी राजी आ, ता सैकेई जनानि तैस ना छडिया। 14केईनी कि अगर तु अक विश्वासी लाड़ी आ, जै अविश्वासी लाड़ै सिंउ रींहथी, ता तिंडा लाड़ा बि तिंडै विश्वास मझ भूंणै ला प्रभुरा, जां अगर तुवे अक ऐतियै विश्वासी मड़द अत्तै, जै अविश्वासी लाड़ी सिंउ रींहथा, ता तुवाड़ी लाड़ी बि तुवाड़ै विश्वासी भूंणै ला प्रभुरी आ। अगर ऐ सच ना थियु, कि तुवाड़ा अविश्वासी लाड़ा या लाड़ी परमेश्वरेरै अत्तै, ता तुवाड़ै बच्चै बि परमेश्वरेरै ना थ्यै भूंणै। अबै तुवाड़ै बच्चै बि प्रभुरै अत्तै। 15अगर अविश्वासी लाड़ा या लाड़ी, विश्वासी लाड़ै या लाड़ी किना अलग भूंणा चहिया, ता तैन्हांं अलग भूंणा दिया। जेख्णी ऐत्यु भूंतु ता, विश्वासी तैस ब्याहेरै रिश्तै किना आजाद आ। पण यदि संभव भूं ता अपड़ै अविश्वासी लाड़ै या लाड़ी सिंउ ब्याहेरै रिश्तै मझ बणि रिय्हा, केईनी कि परमेश्वरै असै योकिया सिंउ शांति सेईतै जीवन जींणेरै तेईनी शदाउरै अत्तै। 16हे विश्वासी लाड़ियो, तुहां याद रींहणु चेहिंथु कि शायद तुवाड़ी वजहि तुवाड़ै लाड़ै बि अपड़ै पापा किना पश्चाताप करि करि मसीही बंणी सकतै। जां हे विश्वासी लाड़यो तुहां बि याद रींहणु चेहिंथु कि शायद तुवाड़ी वजहि तुवाड़ी लाड़ी बि अपड़ै पापा किना पश्चाताप करि करि मसीही बंणी सकती।
परमेश्वरै जिहीं शदाउरै अत्तै तिहीं चला
17जै आंउ बोलता, तेसैरा मतलब ऐ आ, कि हर अक मैहणु जैस हाला मझ परमेश्वरै शदाउरा, तेसै हाला मझ बंणी बेशिया जां तेसनी प्रभु किना जै वरदान मेऔरा, तेठणीरै अनुसार-ऐ जींण जिआ। आंउ सभनियां कलीसियानी ऐहै नियम तय काता। 18उदाहरणेरै तेईनी जेख्णी अक यहूदी प्रभु यीशु पन विश्वास काता, ता तैस ऐ गल छपाणैरी कोई जरूरत ना कि तेनी खतना क्यौरा या ना क्यौरा। अगर ना कराउरा भुआ ता तैस करांणैरी कोई जरूरत ना। 19कौसकेरा खतना भौरा या ना भौरा, ऐनि ला कोई फर्क ना पूंता; पण परमेश्वरेरी आज्ञा मनणी बड़ी जरूरी आ।
20हर अक मैहणु जैस हाला मझ परमेश्वरै शदाउरा, तेसै हाला मझ बंणी बेशिया जां तेसनी प्रभु किना जै वरदान मेऔरा, तेठणिरै अनुसार-ऐ जींण जिआ। आंउ सभनियां कलीसियानी ऐहै नियम तय काता।। 21अगर कौ मैहणु दास आ, जां प्रभु पन विश्वास काता, ता तुहां ऐस गलैरू बुरू ना लगणु चेहिंथु, हालांकि, अगर तुवाड़ा स्वामी तुहांनि बोलता कि तुवे स्वतंत्र भौ सकतै, ता गहि सकतै। 22केईनी कि एकि दासेरै तेईनी जै प्रभु शदाउरा, सैक्या प्रभुरै द्वारा पापेरी शक्ति किना आजाद क्यौरा मैहणु आ; तिहियें चारै अक आजाद मैहणु जै परमेश्वरै शदाउरा; सैक्या मसीहरा दास आ। 23परमेश्वरै तुवाड़ै तेईनी बड़ी कीमत दितोरी आ, ऐठणीरै तेईनी मैहणुवां केरै दास ना पण परमेश्वरेरै दास बंणा। 24विश्वासी भाईयो, हर-अक मैहणु जै जैस हाला मझ शदाउरा, सैक्या तेसै हाला मझ परमेश्वरा सिंउ बेशिया।
जैन्हैं ब्याह ना क्यौरा जां विधवाईयानी सलाह
25अबै जै तुहां कुंवारै मैहणुवंनी लिखोरू आ; मूं किनि आज्ञा ना, पण परमेश्वरै अपड़ि दयाय ला मूंनी बुद्धी दितोरी आ, जैत पन आंउ भरौसा करि सकता जां अपड़ि सलाह दींता। 26केईनी कि इस टैंमा हर जगाय विश्वासी मैहणुवंनी मुश्किलियै बाई गलै भूंती अत्ति। मूं लगतु आ, कि तुवाड़ै तेईनी ऐहीं कांनु अच्छु आ। कुंवारै मैहणुवंनी आंउ ऐ सलाह दींता, कि सैक्यै ब्याह ना करिया। 27अगर तीं ब्याह क्यौरा, ता तु अपड़ि लाड़ी किना अलग भूंणैरी कोशिश मेईं काता; जां अगर ब्याह ना क्यौरा, ता ब्याह कांनेरी कोशिश मेईं करै। 28पण तांबि अगर तुवाड़ा ब्याह भौ गहिया, ता ऐत मझ कोई पाप ना; जां अगर कुंवारिरा ब्याह भुईया तांबि पाप ना। हलाँकि ब्याह क्यौरै मैहणुवां अपड़ै जीवना मझ बड़ै कष्टा केरा सांमना कांना पूंणा, ऐठणीरै तेईनी आंउ चांहथा, कि तुवे ऐतेई परेशानि किना दूर रिय्हा।
29विश्वासी भाईयो, आंउ तुहां मैहणुवां सिंउ ऐ बोलता, कि मसीहरै ऐईंणा मझ अबै जादा टैंम ना बचौरा। तेठणिरी वजहि ला तुवाड़ी लाड़ी आ या ना, ऐसेरै बारै मझ जादा परेशान मेईं भुआ; पण प्रभुरी सेवा कांनेरै बारै मझ सौचतै रिय्हा। 30जै मैहणु दुख मनांतै या जै मैहणु खुश अत्तै या जै मैहणु अपड़ै तेईनी चीजै खरीदते, तैन्हांं ऐन्हां सभनियां चीजा केरै बारै मझ चिन्ता कांनी चेहिंथी। केईनी कि ऐ सारी गलै तुवे प्रभुरी सेवा कांनेरै तेईनी भुलि गांहणै। 31जैन्हैरा लैन-देन संसारिक चीजा सिंउ आ, सैक्या तेत मझ व्यस्त ना रिय्हा; केईनी कि संसारैरा वर्तमान रूप मुकता गांहथा।
32आंउ चांहथा, कि तुहां अपड़ै जीवना मझ हर धियाड़ी छोटि-मोटी गला केरै तेईनी चिंता ना कांनी पुईया। जेनि ब्याह ना क्यौरा, तैस ऐहै चितैंण भूंतु कि प्रभु किहीं खुश कांना; सैक्या प्रभु खुश कांना चांहथा। 33जेनि ब्याह क्यौरा, सैक्या संसारिक गला केरै तेईनी चिंता काता। सैक्या अपड़ि लाड़ी खुश कांना चांहथा। 34ऐठणीरै तेईनी दो चीजै जेन्हैरै बारै मझ सैक्या सौचता, कि सैक्या परमेश्वरा किहीं खुश करिया, जां किहीं सैक्या अपड़ि लाड़ी खुश करिया, कुंवारी छोकरी परमेश्वरेरी सेवा कांना मझ चिंता काति रींहथी। जां सै अपड़ै मंना जां अपड़ै शरीरा प्रभुरै तेईनी अलग कांना चांहथी; पण ब्यौहरी जनानि संसारेरी चीजा केरी चिंता काति रींहथी कि किहीं अपड़ै लाड़ै खुश रखिया। 35ऐ गल आंउ तुवाड़ै फायदेरै तेईनी बोलता, ना कि तुहां फसांणेरै तेईनी; पण ऐठणीरै तेईनी कि जिहीं अच्छु आ, तुवे अक मंन भौ-करि प्रभुरी सेवाय मझ लगी रिय्हा।
36अगर केणुक्या ऐहीं समझता, कि तेसेरी कुंवारी छोकरिरा ब्याह लैट भूंणेरी वजहि ला, सैक्या तैस सिंउ अन्याय काता आ; केईनी कि तेसैरी ब्याह कांनेरै उम्र मुकती आ, ता सैक्या तेसनी ब्याह कांनेरै तेईनी बोलि दिया, ऐहीं कांने ला सैक्या कोई पाप ना काता। तैस अपड़ि छोकरिरा ब्याह करवांणा चेहिंथा। 37पण जैस बबेरा मंन मजबूत आ, जेसैरी कोई बि मजबूरी ना जां अपड़ि ईच्छाय अनुसार चलणार आ, अगर तेनी अपड़ै मंना मझ सोचौरू आ, कि अपड़ि छोकरिरा ब्याह ना कांनेरा फैसला क्यौरा, तेसैरा फैसला बि सही आ। 38ऐठणीरै तेईनी जै अपड़ि बिन ब्यौहरी छोकरिरा ब्याह काता, ता तेसैरा फैसला बि सही आ जां जै तेसैरा ब्याह ना करांणैरा फैसला काता, सै होरू बि छै आ। 39ज्यो-तेईनी कोसक्यै जनानिरा लाड़ा जींता, त्यो-तेईनी तैस अपड़ै लाड़ै सिंउ ब्याहेरै रिशतै मझ बंणी रींहणु चेहिंथु। अगर लाड़ा मरि गांहथा, ता सै आजाद भौ गांहथी जां जैस सिंउ चहिया ब्याह करि सकती, पण सै बि तेसै सिंउ, जै प्रभु मझ विश्वास काता भुईया। 40अगर सैकेई दुबारे ब्याह ना काति, ता मिंडै विचारा मझ ता सैकेई होरी जादा धन्य आ जां मूं लगतु आ, कि परमेश्वरैरा आत्मा मिंडी अगुवाय काता।
Obecnie wybrane:
1 कुरिन्थियों 7: CDJNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.