रोमियून 12
12
परमेश्वरे की सेवा को जीवन
1येक कारण हे विश्वासी भाईयों, मैं तुमून परमेश्वरे की दया याद दिलाभेरन बिनती करछूँ, कि अपून जीन्दगी स ज्यून और पवित्र, और परमेश्वर स निको लागून वालो बलिदान चढ़ा। परमेश्वरे की सेवा करना को योई सच्चा तरीका छै। 2और यो संसाराक लोगून का नियाती जन बना, लेकिन तुमार मनाका पुर बदल जाना ले तुमोरो चाल-चलन ले बदलतनै जौ, कि जेलै तुम परमेश्वर की निकी और ग्रहणयोग्य, और सिद्ध इच्छाकी खोज करनै रौ।
3क्याखिनकि मैं उ दयाक कारण जो परमेश्वर भटे मैंस मिलछ्य, तुमून में भटे हरेक थैं कुछूँ, कि जस समझून चैंछ, उ भटे बढ़भेरन कोई ले अपूनास जन समझा, लेकिन जतुक विश्वास परमेश्वर ले तुमून दीछ, उक अनुसार समझा। 4क्याखिनकि जस हमार शरीर में भौत अंग छन, और शरीरा का सब अंगून को एक काम जस नै हुनो। 5उसीकैं, हम ले जो मसीह में विश्वासी छा, हम सब मसीहक शरीराक अंग छा, और हम सब एक दुसारा भटे जुड़िनाक छै। 6और जब की उ दया का अनुसार जो परमेश्वरे ले हमून दी रैछ, हमून अलग-अलग बरदान मिल र्यान। त जैस भविष्यबाणी को दान मिलीना को छै; ऊस उन बातुन बोलून चैछो, जेमें उ विश्वास करछो की परमेश्वर ले ऊस बताछ। 7अगर दुसरान की सेवा करनाको बरदान मिलर्योछ, त सेवा में लाग रौ, अगर कोई सिखून वाला छन, त उ सिखून में लाग रौ। 8जो उपदेश दीन वालो हो उ उपदेश दीन में लाग रौ; अगर दुसरान की जरूरत स पुर करना को वरदान मिलीनाको छै, त दिल खोल भेरन दान दयो; अगर यो अगुवाई करना को बरदान छै त ऊस लगन लगाभेरन करो, जो दया करो, उ खुशिले करो।
9दुसरान प्रेम करना को दिखावा जन करा; बुराई भटे नफरत करा, और जो भलाई का कामून में लगातार लाग रौ। 10एक दुसरा स परिवार की नियाती प्रेम करा; हरेक और हरेक जन स अपून है बढ़भेरन माना। 11भौत मेहनत करा और आलीस जन बना; और अपून पुर मनेले प्रभु की सेवा करनै रौ। 12जो आश हमार दगाड़ छै उक कारण खुश रौ; मुसीबत में धैर्य राखा, और हर बखत प्रार्थना करनै रौ। 13और परमेश्वरा का लोगून की जेले जरूरत छै, उमें उनेरि मद्दत कर्या; और घर में आईना का लोगून की आदर-खातिदारी करा।
14अपून सतून वालान आशीष दी, लेकिन श्राप जन दीया। 15खुश रून वालान का दगाड़ खुश रया, और रूनवालान का दगाड़ रोईया। 16तुम जसकै अपूनी परवाह करछा, उसकैं एक दुसरा की परवाह करनै रौ। घमंडी जन बँन्या, लेकिन जो गरीब छन, उनार दगाड़ संगति राखून खिन हमेशा तैय्यार रौ। अपूनास बुद्धिमान जन समझा। 17बुराईक बदाला बुराई जन कर्या, जो बात सब लोगून खिन निकी छन उनेरि चिन्ता करा। 18जाँ तक हो सकों, तुम लोगूनका दगाड़ मेल-मिलाप राखिया। 19हे म्यारा विश्वासी भाईयों, अपून बदला जन ली, लेकिन परमेश्वरे स तुमून खिन बदला लीन दी, क्याखिनकि पवित्रशास्त्र में प्रभु कुंनान, “बदला लीन म्येरो काम छै, प्रभु कुंनान मैं बदला द्यूलो।” 20लेकिन पवित्रशास्त्र में यो ले लिख रैछ, “अगर तेरो बैरी भुखो होलो त ऊस खानो खिलो अगर प्यासो होलो त ऊस पानि पिलाये। क्याखिनकि इस करनाले उको खोरो शर्मले झुक जालो।” 21बुराईस अपून मलि में जितून जन दी, लेकिन भलाई करभेरन बुराईस जीत ली।
Obecnie wybrane:
रोमियून 12: SORNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
