लूका 4
4
यीशु की परीक्षा
(मत्ती 4:1-11; मरकुस 1:12-13)
1यीशु बपतिस्मा लीना का बाद पवित्र आत्मा की सामर्थ ले भरि भेरन, यरदन नदी भटे वापस आयान; और पवित्र आत्मा अगुवाई ले बिरान जागान में घुमूनै र्योछ। 2और चालीस दिन तक शैतान ऊस परखनै र्यो। उन दिनून में यीशु ले चालीस दिन और रात केले नै खायो, और जब उन दिन पुर भ्यान यीशु स भुख लागछ्य। 3और तब शैतान ले यीशु थैं क्योछ, “अगर तैं परमेश्वरो को च्योलो छै, त इन ढ़ुगान रोटा बना को हुकुम दे।” 4यीशु ले शैतान स जबाब दीछ, कि पवित्रशास्त्र में यो लिखीना को छै, कि मनुष्य केवल रोटा ले ज्यून नी रौ। 5तब शैतान यीशुस भौत ऊच्चा डाणा में लिजाछो और पल भर में संसार को राज्य दिखूछो, 6और शैतान ले यीशुथैं क्योछ, मैं यो संसारो को पुरो राजपाठ तैंस द्यूलो, क्याखिनकि यो सब म्यारा अधिकार में छै, और जैस मैं चाँ ऊस दी सकछूँ। 7अगर तैं झुकीभेरन म्येरो आदर और मेरि भक्ति करले, तो मैं यो सब कुछ तैंस दीयूलो। 8तब यीशु ले ऊस जबाब दीछ, पवित्र-शासत्र में लिखीना को छै, कि तैं केवल प्रभु अपून परमेश्वरो को आदर कर और उकी अराधना कर। 9तब शैतान यीशु स यरूशलम शैहरा का मन्दिर में लिजाछो और मन्दिरा का किनार में ठाड़ करछो, और यीशु थैं कुंछो अगर तैं परमेश्वरो को च्योलो छै, याँ है फटंग हाण। 10क्याखिनकि त्यारा बारिमें पवित्रशास्त्र में लिखीना को छै, कि परमेश्वर स्वर्गदूतून हुकुम द्योलो कि उन तेरि मद्दत करला। 11और उन तैंस हातून में उठा ल्याला, काँई इसो नै हो कि त्यारा खुट में ले ढूंगा ले ठेस लागो। 12तब यीशु ले शैतान स जबाब दीछ, पवित्र-शासत्र में यो ले लिखीना को छै, कि तैं अपून प्रभु परमेश्वरे की परीक्षा जन करे। 13जब शैतान यीशु की सब तरीकाले परीक्षा कर चुकछै, तब उ कुछ बखत खिन ऊस छोड़भेरन वाँ है न्हैजाछो।
यीशु की सेवा का कामून की शुरूवाद
(मत्ती 4:12-17; मरकुस 1:14,15)
14फिर यीशु परमेश्वरा का सामर्थ में भरि भेरन गलील प्रदेश खिन वापस ग्योछ, और उकी चर्चा आश-पासा का सारा देश में फैल जाछी। 15और यीशु यहूदी सभाघर में उपदेश दीछ्यो, और सब उकी बड़ाई करछ्या।
नासरत में यीशु को अनादर
(मत्ती 13:53-58; मरकुस 6:1-6)
16यीशु नासरत गौं में वापस आछ जाँ उ पालि-पोसी ग्योछ, और अपून रीति अनुसार सबता का दिन यहूदी सभाघर में जाभेरन पवित्र-शास्त्र में भटे पढून खिन ठाड़ भ्योछ, 17और ऊस यशायाह परमेश्वरो को संदेश दिनवाला की किताब पढून खिन दी गै, और उले उमें जाँ इसो लिखीना को छ्यो, पढ़छै।
18कि प्रभु को आत्मा मैंमें छै,
येक कारण कंगालून सुसमाचार
सुणून खिन म्येरो अभिषेक करिना को छै।
और मैंस येक कारण भेजिनाको छै, कि मैं जो कैद में छन उनोरो छुटकार करूँ
और अंधान आँखा
पाना को संदेश दीयू, और
मैं बोझ में दबीना का लोगून छुडूलो,
19और परमेश्वरा का खुश रूना को सालो को प्रचार करूँ।
20तब यीशु ले किताब बन्द करछ्य और सेवक का हात में दी दीछ, और बैठ जाछो, और यहूदी सभाघरा का सब लोगून की नजर यीशु का तरफ छी। 21तब यीशु ले उन लोगून थैं क्योछ, तुमार सुणना ले आज पवित्रशास्त्र को यो लेख ले पुरो है ग्योछ। 22और सब लोगून ले यीशु का तारीफ करछ्य, और भलि बात यीशु का मुँख भटे निकलछ्या, उन बातुन में सब लोगून ताजुब करनान, और कुंनान, “क्या यो यूसुफ को च्योलो नाहतिनी?” 23यीशु ले उनूनथैं क्योछ, तुम मैंथैं यो कहावत जरूर कौला, कि हे वैघ, अपून आपस ठीक कर। और कफरनहूम गौं में जो कुछ करछ्य याँ अपून देश में ले कर। 24तब यीशु ले उनूनथैं क्योछ, मैं तुमूनथैं सच्ची कुछूँ, कि कोई ले परमेश्वरो को संदेश दिनवाला अपून देश में मान-सम्मान नै पानो। 25मैं तुमूनथैं सच्ची कुंछू कि परमेश्वरो को संदेश दिनवाला एलिय्याहा का दिनून जब साढ़े तीन साल तक बरखा नै भै, या तक कि सारा देश में अकाल पड़छ्य, तो इस्राएल देश में भौत विध्वा स्यैनिन छ्या। 26लेकिन परमेश्वरो को संदेश दिनवाला एलिय्याह स इस्राएल देश में कोई ले विध्वा पास नै भेजि ग्यो, केवल सिदोन शैहरा का सारफत इलाका में रून वाली एक विध्वा का पास। 27और एलिशा परमेश्वरो को संदेश दिनवाला का दिनून में इस्राएल देश में भौत कोढ़ी छ्या, लेकिन परमेश्वर ले सीरिया देशा का गैर-यहूदी नामान स छोड़भेरन कैसे ले चंगो नै कर्यो। 28इन बातुन सुणिभेरन जदुक यहूदी सभाघर में छ्या, सब गुस्सा ले भरि जानान। 29और यीशुस वाँ भटे भ्यार निकाल दीनान, और जो डाण में उनोरो नगर बसिना को छ्यो, उन यीशुस डाणा का किनार में ली ग्यान, कि ऊस वाँ भटे तलि खितीभेरन मार दीयूलो, 30लेकिन यीशु उनार बीच है निकल भेरन न्हैजानान।
भूत लागिना को आदिमी स चंगो करून
(मरकुस 1:21-28)
31फिर यीशु वाँ भटे गलील प्रदेशा का कफरनहूम गौं खिन ग्यान; और सबता का दिन लोगून उपदेश दिन मरेछ्या। 32और सुणून वाला उक उपदेश सुणिभेरन हैरान रैग्या, क्याखिनकि उको बचन सच्चा अधिकार का दगाड़ छ्यो। 33यहूदी सभाघर में एक आदिमी छ्यो, जैस भूत ले अपून बश में कर राँछ्यो। उले जोर-जोरले चिल्ला भेरन क्योछ, 34“हे नासरत के यीशु, तैं हमून किलैं परेशान करून मरेछै? क्या तैं हमून नाश करून खिन आ रैछै? मैं तैंस जाणछूँ कि तैं को छै? तैं परमेश्वरो को पवित्र च्योलो छै।” 35यीशु ले उ भूत स डांटिभेरन क्योछ, चुप रौ, और यो आदिमी में भटे भ्यार निकल जा। तब भूत उ आदिमी स जोरले मरोड़भेरन ऊस बीच में पटक भेरन बिना नुकशान करे उमें भटे भ्यार न्हैग्यो। 36यो देखिभेरन यहूदी सभाघरा का सबै लोग भौतै हैरान हो भेरन, एक-दुसारा थैं पुछून लाग्यान, कि यो कतुक ताकतवर और सामर्थी बचन छन, क्याखिनकि उ सच्चा अधिकार ले और सामर्थ का दगाड़ भूतून हुकुम दीछो, और उन निकल जानान। 37इसीकैं यीशु की चर्चा आश-पासा का इलाकान में हुन लागछ्य।
पतरस की सासू और दुसारा लोगून चंगो करून
(मत्ती 8:14-17; मरकुस 1:29,34)
38फिर यीशु यहूदी सभाघर भटे उठाभेरन शमौना का घर जानान। उ बखत शमौन की सासू स भौत बुखार आ रियोछ, और उनूनले यीशुथै बिनती करछ्य कि उको ज्वर ठीक करा। 39तब यीशु ले उक पास जाभेरन ज्वर स डाँठ छै और शमौन को सासू बुखार ठीक है ग्यो, और उ उनेरि आदर-खातर करून लागछ्य।
40और ब्याल बखत लोग कई प्रकाराक बिमारीन यीशु का पास ल्यान। यीशु ले एक-एक में हात राखभेरन उनून चंगो कर दीछ। 41भौत लोगून भटे भूत चिल्ला भेरन और यो कुँनै निकलग्या, कि “तैं परमेश्वरो को च्योलो छै।” लेकिन यीशु उनून डाँटछो और बोलून नी दीछ्यो, क्याखिनकि उन जाणि छ्या कि उ परमेश्वरो को च्योलो मसीह छै।
अराधनालय में प्रचार करून
(मरकुस 1:35-39)
42और दुसारा दिन रात्तैनि एक बिरान जागा में न्हैजानान, और भीड़ की भीड़ यीशुस खोजून-खोजून यीशुका पास पुजनान और यीशुस यो कैभेरन रोकून लागना कि हमून छोड़भेरन जन जा। 43लेकिन यीशु ले उनूनथैं क्योछ, “मैले और ले गौं और नगरून में जाभेरन परमेश्वरा का राज्य को सुसमाचार सुणून ले जरूरी छै, क्याखिनकि मैं यो काम खिन भेजिनाको छूँ।”
44और यीशु गलील प्रदेशा का उन यहूदी सभाघर में प्रचार करनै रयान।
Obecnie wybrane:
लूका 4: SORNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
