यहूना 7
7
यीशु और उका भाई
1इन बातुन का बाद यीशु गलील प्रदेश में घुमन-फिरनै र्योछ, क्याखिनकि यहूदी अगुवा ऊस मारना की साजिश करून मरेछ्या, येक कारण उ यहूदिया प्रदेश में घुमून नी चाछ्यो। 2और यहूदी लोगून को झोपड़िन को त्यार#7:2 झोपड़िन को त्यार यो पर्व उनून याद दिलून खिन छ्यो कि उनारा पूर्वज चालीस साल तक तम्बून में रूछ्या। यो आठ दिनून तक चलछ्यो और फसह को पर्व का छ: मैना का बाद शुरू हो जा छ्यो। नजिक छ्यो। 3येक कारण यीशुका भाईन ले उथैं क्योछ, “तुम यो जाग छोड़िभेरन यहूदिया प्रदेश खिन न्हैजा, कि जो भल काम तुम करछा, उनून तुमार शिष्य ले देखून। 4अगर तुम चाँछा उ कि लोग तुमार बारिमें जाणनू, त तुमून सबून का सामुनि भल काम करून चैंनान। अगर तैं काम करछै त दुनिया का सामुनि कर।” 5क्याखिनकि यीशुका भाई ले यीशु में विश्वास नी करछ्या। 6तब यीशु ले उनूनथैं क्योछ, म्येरो बखत आजि नै आर्यो; लेकिन तुमून खिन त कोई ले ठीक बखत छै। 7संसारा का लोग तुमार दगाड़ बैर नै कर सकूना, लेकिन उ मैं खिन बैर करनान, क्याखिनकि मैं उनार बारिमें में यो बात की गवै दी छूँ कि उक काम बुर छन। 8तुम लोग त्यार मनून खिन जा; मैं एल यो त्यार मनून खिन नै आ सकनू, किलैकी म्येरो बखत नै आर्यो। 9यीशु ले उनूनथैं यो बात कैभेरन उ गलील प्रदेश में रुकि ग्यो।
झोपड़िन का पर्व में यीशु
10लेकिन उक भाई त्यार में न्हैग्या, त यीशु ले उ त्यार में ग्योछ, लेकिन बिना कैसे बताये वाँ भटे न्हैग्यो। 11उ त्यार में यहूदी लोग यीशुस खोजून मरेछ्या, उनूनले लोगून थैं पुछ्छै, “क्या उ या आ ग्योछी?” 12और लोग यीशु का बारिमें खुश-फुसाट करभेरन बात करून मरेछ्या। उनूनमें भटे कोई कुछ्या कि “उ भौत निको आदिमी छै।” और कुछ लोग कुछ्या, उ त लोगून गुमराह करछो। 13तब ले यहूदीन अगुवान का डर का कारण कोई ले आदिमी यीशु का बारिमें खुलभेरन नी बोलछो।
पर्व का दिन यीशु को उपदेश
14और जब त्यार का आधा दिन बितिग्यो; त यीशु मन्दिर में जाभेरन लोगून उपदेश दिन लागछ। 15उक उपदेश स सुणभेरन यहूदी लोग ताजुब करून लाग्यान, और कुन लाग्यान, “येस बिना पवित्रशास्त्र पढ़ीना को यो ज्ञान काँ भटे मिलछ्य।” 16यीशु ले उनून जबाब दीछ, “म्येरो उपदेश म्येरो अपूनो नाहतिनी, लेकिन यो पिता परमेश्वरा का तरफ भटे छै जैले मैंस भेज रैछ। 17अगर कोई आदिमी परमेश्वर की मरजी में चलून चाछो, त उ यो उपदेशा का बारिमें जाणि जालो कि यो परमेश्वरा का तरफ भटे छै, या मैं अपून तरफ भटे कुछूँ। 18जो अपूनी तरफ भटे के कुंछूँ, उ अपूनी बड़ाई चाँछो; लेकिन जो अपून भेजून वाला की बड़ाई चाँछो उई सच्चो छै, और उमें के बेमानी नाहातिन। 19क्या परमेश्वरो को संदेश दिनवाला मूसा ले तुमून नियम-कानून नै दियाई? तब ले तुमून में भटे कोई ले नियम-कानून में नै चलनो। तुम किलैं मैंस मार डालून चाँछा?” 20लोगून ले जबाब दीछ; “तैंमें भूत लागिना को छै! को तैंस मार डालून चाछ?” 21यीशु ले उनून जबाब दीछ, “मैंले सबत वाला दिन एक चमत्कारो को काम करछ्य, और तुम सब ताजुब करछा।
22तुम कुँछा कि मूसा ले तुमून खतना करना को आदेश दीछ, योई कारण तुम सबता का दिन आदिमी को खतना करछा। यो नै कि उ मूसा का तरफ भटे छै लेकिन यो पुरखान भटे चलिना को छै। 23तुम सबता का दिन आदिमी को खतना येक कारण करछा कि मूसा का नियम-कानून तोड़ी नै जून, लेकिन तुम येक कारण मैं खिन गुस्सा करछा, कि मैंले सबता का दिन एक आदिमी स पुरी तरीका ले ठीक करछ्य। 24तुम भ्यारो को रूप देखिभेरन न्याय जन करा, लेकिन सच्चाई ले ठीक-ठीक न्याय करा।”
क्या यीशु ही मसीहा छी?
25तब यरूशलम शैहरा का थ्वाड़ा लोग कुन लाग्यान, “क्या यो उई आदिमी नाहतिनी, जैस यहूदी अगुवा मारना का फिराक में छन। 26लेकिन देखा, उ भीड़ का लोगून थैं खुलेआम बात करछो और कोई उथैं के नै कुनो, इसो त नाहातिनी कि यहूदी अगुवान ले सच्ची में जाण हालछ्य कि योई मसीह छै? 27क्याखिनकि हम त जाणनू, कि यो काँ भटे ऊँछो; लेकिन मसीह अब आलो, त कोई ले नी जाण पालो कि उ काँ भटे आछ।” 28तब यीशु ले मन्दिर का खाला में उपदेश दीन बखत जोरले क्योछ, “तुम मैंस जाणछाई और यो ले जाणछा की मैं काँ आरयूँ। मैं त खुद नै आरयूँ, लेकिन म्यारा भेजून वाला सच्चो छै ऊस तुम जाणछा। 29लेकिन मैं जाणछूँ; क्याखिनकि मैं उक तरफ छूँ और उलेई मैंस भेज रैछ।” 30यो बात में अगुवा ऊस पकड़ून चाँछ्या, तब कैले ऊस नै पकड़ीयो, क्याखिनकि उको मरना को बखत एक तक नी आईना को छ्यो। 31और भीड़ का भौत लोगून ले उमें विश्वास करछ्य, और कुन लाग्यान, “मसीह जब आलो, त क्या येहैं ज्यादा चमत्कारा का दिखालो जो येले दिखायान?”
यीशुस पकड़ना कि कोशिश
32फरीसी लोगून ले उक बारिमें यो बातुन चुपचाप ले करनै सुणछ; और प्रधान याजकून ले और फरीसीन ले ऊस पकड़ून खिन मन्दिर का रखवाला भेज्यान। 33यो बात में यीशु ले क्योछ, “ मैं थ्वाड़ा देर तलक और तुमार दगाड़ छूँ; उक बाद मैं अपून भेजून वाला का पास वापस न्हैजूलो। 34तब तुम मैंस खोजला, लेकिन नी पाला; और जा मैं जाछूँ तुम वाँ नै आ सकना।” 35यहूदी अगुवा आपस में कुन लाग्यान, “यो काँ जाछो कि हमून तो दुबारा नै मिल सकूनो? शायद उन यहूदी लोगून पास जो यूनानी शैहरून में तितर-बितर हो भेरन रूनान, और उनूनले उपदेश द्योलो? 36उ कि कुन चाछो कि, ‘तुम मैंस खोजला, लेकिन नी पाला: और जा मैं जाछूँ, वाँ तुम नै आ सकना?’”
जीवन-पानि का नदी
37फिर त्यार का आखिरी दिन, जो खास दिन छै, यीशु ठाड़ भ्योछ और जोरले कुन लागछ, “अगर कोई प्यासो छै त म्यारा पास अ और पीय। 38जो मैमें विश्वास करोलो, जसो पवित्रशास्त्र में लिखीना को छै, उक दिल में भटे पानि की नदी जो जीवन दीछी निकलली।” 39उले यो बात पवित्र आत्मा का बारिमें क्योछ, जो उमें विश्वास करनान उनून मिलून वालो छ्यो, क्याखिनकि एल तलक पवित्र आत्मा उतरीना को नी छ्यो, क्याखिनकि परमेश्वर ले एल तलक यीशु की महिमा स प्रगट नी करिना को छ्यो।
40तब भीड़ में भटे केले-केले यो बातुन सुणभेरन क्योछ, “सच्ची में उ परमेश्वरो को संदेश दिनवाला छै, जैको हम इन्तजार करून मरिया।” 41और उन में कुछ लोगून ले क्योछ, “यो मसीह छै,” लेकिन केले क्योछ, “क्या? क्या मसीह गलील प्रदेश भटे आलोई? 42क्या पवित्रशास्त्र कुंछो कि मसीह राजा दाऊद का वंश भटे और बैतलहम गौं भटे आलो, जा राजा दाऊद रूछ्यो।” 43और यीशु का कारण लोगून में आपस में फुट पड़छी। 44उनूनमें भटे कदुक यीशु स पकड़ून चाँछ्या, लेकिन केले ऊस गिरफ्तार नै कर्यो।
यहूदी अगुवान को अविश्वास
45तब मन्दिर का रखवाला प्रधान याजकून और फरीसी लोगून का पास लौट आयान, और उनूनले उनूनथैं क्योछ, “तुम ऊस क्याखिन नै लाया?” 46उनूनले जबाब दीछ, “कोई ले आदिमी ले कभै इसा बात नै कर्या।” 47फरीसी लोगून ले उनून जबाब दीछ, “क्या तुम ले गुमराह करि गैछा? 48क्या शासकून में या फरीसी लोगून में भटे केले उमें विश्वास करछै? 49लेकिन यो लोग मूसा का नियम-कानून नै जाणना, और परमेश्वरा का द्वारा शापित छन।” 50नीकुदेमुस जो यीशु का पास पैलि आईना को छ्यो। और उनूनमें भटे एक छ्यो, उनूनथैं कुन लाग्छय। 51“क्या हमार नियम-कानून कै आदिमी स जब तक पैलि उकी सुणभेरन जाणनै ले, कि उ कि करछो, दोषी ठैरूछी?” 52उनूनले ऊस जबाब दीछ, “काँई तैंले गलीली त नाहातिनी? पवित्रशास्त्र में खोज तब तैं जाण पालै, कि गलील प्रदेश भटे कोई ले परमेश्वरो को संदेश दिनवाला पैद नै हुनो।”
53तब उन सब लोग अपून-अपून घरून खिन वापस न्हैग्या।
Obecnie wybrane:
यहूना 7: SORNT
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
